الصنف الرئيسي كفتة مشوية
تجيبي لكيلو اللحم المفروم بصلة واحدة كبيرة و ثمرة طماطم متوسطة
(اللحم المفروم مايكونش عليه دهن كتير)
(نص كيلو اللحمة المفرومة ليه بصلة متوسطة و طمطماية صغيرة)
ابشري البصلة ناعم
و هاتي الطماطم و صفي الميه منها خالص و ابشريها منغير قشر
اعجنيها بايدك مع اللحم مع الملح و الفلفل و البهارات
و سيبيهم شوية
هتطلعلك في المتوسط حوالي 23-27 صباع كفتة متوسط
بعد كده هاتي صاج كبير و صبعي الكفتة إما زي الكبيبة أو على سيخ أو ستيك و بعدين اسحبيها و نزليها في الصينيه علشان تبقى شبه الكفتة الجاهزة
و علشان يبقى مقاساتهم متساوية قسمي العجينة كورتين و كل كورة لكورتين و هكذا لغاية ما توصلي للحجم اللي يطلع صباع كفتة كويس ..مع ملاحظة انها بتكش شوية في السوي
ولعي النار على البوتاجاز فوق و ضعي الصاج او الصينيه و ربع معلقة صغيرة زيت و سيبي الكفتة تستوي على نار هادية
هي هتطلع ميه و هتستوي فيها و سيبيها وقت كفاية و يا ريت تغطي الصاج علشان تستوي حلو
و كل شوية تحركي الصينية علشان الكفتة تتقلب منغير ما تتجرح
بعد ما تنشف خالص ممكن تحمريها على شواية الفرن
سخني فحمة على نار البوتاجاز و سيبيها تحمر
جنبي الكفتة في جنب الصينية و سيبي الزيت في الجنب التاني او فضي الزيت اللي طلع من الكفتة في ورقة فويل و حطيها على الصينيه
اطفي الفحمة في الزيت و غطي الصينيه و سيبيها خالص
هاتي بقدونس و قطعيه و رصي عليه الكفتة
ثطعي بصل و طماطم و فلفل و خيار شرايح
سلطة الطحينة جهزيها بالخل و الميه و ملح و ثوم و فلفل و شوية بهارات خفيفة و كمون
و ممكن بس ميه و خل و ملح و فلفل و بهارات
و حطي العيش فوق الكفتة علشان يشرب من ريحتها
هتدوقيها احسن من أحسن حاتي في مصر إن شاء الله
الحلو
قطع كورواسون جاهز او من الخباز
قطعيه قطع متوسطة و غلفيه بزبدة بسيطة قوي و حطيه في الفريزر
هاتي اي صينيه حوافها عاليه و غلفيها من جوه بالفويل
اعملي مهلبية شوكولاتة بقطع شوكولاتة خام او كاكاو نوعه كويس و معاه معلقة صغيرة زبدة
بس زودي الشوكولاتة
صبي طبقة من المهلبية اللي نسبيا باردة مش سخنة
و رصي قطع الكورواسون بشكل عشوائي
صبي باقي المهلبية و حطيها في التلاجة
و طبعا يتقدم بارد مع شاي او عصير او كاكاو بارد..و ألف هنا
بمناسبة الكاكاو البارد..طريقة حلوة جدا و مميزة
حطي معلقة كبيرة كاكاو و السكر زي ما بتفضلي في الكوباية و عليه شوية ميه صغيرة جدا و قلبيهم كويس لغاية ما يبقى زي كريمة الشكولاتة
و بعد كده ضيفي اللبن و قلبيه ..لا كلاكيع كاكاو و لا فقاقيع على الوش و لونه و طعمه شوكولاتة مظبوطة
اللي تجرب تفرحني بالنتايج
مواضيع هذا القسم برعاية
عسجد عسجد 264423_2.gif فتكات رائعة Fatakat 264423 عادي برده – عادي عادي