ازيكوا جميعاً
دي وصفة ماما في تحضير كفتة الرز اللي باخلص نصها وانا باحمرها
معلش مافيش صور لان الموبايل عندي في مشكلة بس الطريقة سهلة جدا
المقادير
كيلو لحمة
كيلو رز
بقدونس ..حوالي 3 حزم
بصل وتوم .. حوالي بصلتين او تلاتة كبار وراس توم كبيرة
بهارات .. ملح وفلفل وكمون
زيت للقلي
الطريقة
1- اول حاجة ناخد الرز ونغسلة كويس جداً ، ونفرده على قماشة في وش الهوا ينشف خالص وبعدين نجيب المطحنة بتاعة الكمون ونطحنة فيها
لحد ما يبقى عامل زي السكر كده
2- هنجيب البقدونس ونغسلة كويس جدا ونقطعه ، والبصل نقطعة مكعبات ، التوم نسيبة فصوص زي ما هوه
3- اللحمة تتقطع مكعبات
4- نستخدم المفرمة او الكبة ، ونفرم فيها اللحمة مع البقدونس والبصل والتوم ونضيف البهارات
5- نقلب الرز المطحون مع اللحمة والبقدونس والتوم المفرومين
6- بعد ما قلبنا كل المكونات هنعيد عليها كلها في الكبة مع بعض ، وبعد ما نخلص هنحط على الخليط ده شوية زيت حوالي 3 معالق كبار
ونخلط كله مع بعضه كويس اوي
7- نبدأ نصبع الكفتة صوابع صغيرة أد صبع ايدك الصغير
ملحوظة مهمه : واحنا بنصبع يبقى جنبنا طبق فيه شوية زيت ونحط على ايدينا منه عشان الكفتة ما تلزقش وهتلاقيها بتتصبع معاكي بسهولة باذن الله..
8- بعد ما صبعنا هنجيب طاسة ونحط فيها زيت للقلية ونحطها على النار ونستنى دقيقة تسخن ونحط الكفتة
ملحوظة مهمة اوي : عشان الكفتة تطلع ناجحة معاكي ، هتهدي النار لحد ما تاخد وش تحمر بسيط وتستوي وبعدين تعلي النار عشان يبقى لونها بني
9- تحضري مصفه وتحتها صينية او طبق وتطلعي دور بدور فيها وتسيبيها تتصفي وتدوقي منها بقى
كده الكفتة جاهزة وتطبخ في الخضار أو تتاكل تشالي كده مقرمشة
طبعاً الكمية دي كبيرة فأنتِ تجيبي كياس وتخزنيها في الفريزر وتطلعيها على الطبخ
أكتر حاجة باحبها لطبخها مع البطاطس
تجيبي الصلصة وتحطي الكفتة فيها تاخد غلوة على الهادي وتقطعي البطاطس مكعبات وتحطيها معاها
وتسيبيها لما البطاطس تستوي مع الكفتة
وبالهنا والشفا
مواضيع هذا القسم برعاية
SLSoLa SLSoLa فتكات رائعة Fatakat 526464 الاسكندرية – مصر