وحشتونى اوى يا فتوكات
جمعة مباركة عليكم بأذن الله
بقى لى كتير منزلتش موضوع جديد
النهاردة جبت لكم وصفة سهلة جدا
تنفع غدا وممكن عشا
المقادير
نصف كيلو لحمة مقطعة مكعبات او زى الشاورما
3 بصلات
قرن فلفل حامى
ملح وفلفل
وبس
مقادير سهلة جدا
والطريقة اسهل واسهل
اللحمة متقطعة زى الصورة
نقطع البصل مش حنبشره
قطعيه باى طريقة لانه حيتهرى ومش حيبان فى الاخر
نشوح البصل فى شوية زيت نباتى
نحمرها كويس زى الصورة كده
علشان هى اللى حتدى الطعم واللون لكباب الحلة
وننزل بقرن الفلفل الحامى
وننزل باللحمة على نار عالية علشان تتشوح مع البصلة كويس
نشوحها كويس لغاية ما تنزل ميتها وتشربها تانى
هنا نزلت المية بتاعتها
نحط لها الفلفل الاسود ومنحطش ملح خالص دلوقتى
علشان ميأخرش سوى اللحمة
وهنا شربت ميتها
طبعا لسه ما استوتش
ننزل عليها بمية سخنة (_مهم جدا)
ونغطيها ونسيبها تستوى على نار هادية
كل ما تشرب ميتها نزود تانى وبرضة مية سخنة
هنا خلاص قربت تستوى وضيفت لها الملح
وهنا ممكن نسيب فيها شوية صوص معاها وتتاكل مع رز ابيض وخضار
او ننشفها خالص وتتاكل مع مكرونة او بطاطس محمرة
ودى الصورة النهائية للطبق
مفيش اسهل من كده
ومش بتاخد وقت كتير لان اللحمة متقطعة صغيرة
وبألف هنا وشفا
يارب تكون الوصفة عجبتكم
واكون افدتكم ولو بمعلومة بسيطة
مواضيع هذا القسم برعاية
فتاة المهمات الصعبة فتاة المهمات الصعبة 190913_15.gif Fatakat 190913 الرياض – السعودية