فتوكاتي حبايبي ازيكم انا النهاردة عزماكم على كاليماري محشي بالجمبري وقطع الكاليماري مع رز بالجمبري بس ليا عندكم طلب ونصيحة اولا النصيحة خدي بالك من الجمبري الصيني اللي في السوق يعني وانتي بتشتري الجمبري اتاكدي منه وياريت تجيبيه من حد موثوق فيه
ثانيا الطلب لو عجبكم الموضوع ياريت تقييموه نفسي الموضوع يتثبت
خلاص خلاص ما تزقيش انتي وهي هدخل في الموضوع أهو
اولا نغسل الكاليماري كويس بالخل والليمون عشان الزفارة طبعا
ثانيا نبدأ في تجهيز الخلطة اللي هنحشي بيها وهي عبارة عن بصل مبشور وفلفل أخضر وكاليماري قطع صغيرة وجمبري وجزر وطماطم مقشرة ومقطعة مكعبات
الطريقة هنسيب البصلة تدبل شوية تبدا تصفر ونضيف بعد كدة الكاليماري والجمبري والفلف الاخضر وممكن معاه قرن فلفل حار والجزر والطماطم ومكعب مرقة وملح وكمون وكاري ونقلبهم مع بعض شوية ونزود شوية مية صغيرين ونسيبها تستوي وبعدين نسيبها تبرد شوية ونشيل جزء من الخليط دة على جنب هنحتاجه للرز
وبعد كدة نحشي الكاليماري بالخليط دة ونقفلها كويس زي الحمام المحشي بالخيط ونكون مجهزين حلة فيها مية وحبهان ومستكة وورق لورا واول ما تغلي نحط الكاليماري ونسيبها لحد ما تستوي وبعد كدة نحمرها بس خدي بالك وانتي بتحمريها غطي الطاسة لانها بتفرقع انا نبهتكم عشان انا مش مسئولة عن الاصابات ههههههههههههههه
نيجي بقى للرز فاكرين الجزء اللي سيبناه من الخلطة هنحطه في حلة على النار ونغسل الرز ونضيفه للخليط ونشوحهم مع بعض شوية وبعدين نضيف المية ونسيبه يستوي زي الرز عادي بس يستحسن نهدي النار من بدري شوية عشان ميتحرقش
وبعدين نغرف الرز في الأطباق ونحط معاه الكاليماري وبالهنا والشفا
ممكن نستبدل الكاليماري بالسيبيا وناخد الشراشيب بتاعتها هي اللي نقطعها ونحطها مع الخلطة ولو حسيتي ان الجزء بتاع الخلطة اللي هنضيفه للرز الجمبري فيه قليل ممكن تزوديه جمبري وتشوحيه على النار قبل ما تضيفي الرز
ومتنسوش التقييم
مواضيع هذا القسم برعاية
المشتاقة الى ابنتها المشتاقة الى ابنتها 577010_6.gif سوبر فتكات Fatakat 577010 بورسعيد – مصر
سبحان الله و بحمده