مبدايا كده انا مش من عشاق الفشة….ههههههههه
لكن جوزى بقى بيموت فيها انا ببقى شايلة هم طبخ الفشة و لحمة الراس بعد كل عيد اضحى لأنى بطبخهم بالعافية…و هوه يفضل يدوقنى و يقولى طب كلى دى ,دى تحفة…و يفضل يغنى على الطعامة و الحلاوة طول الأكل…
و ساعات باكل منها لما بيتحايل عليا…عشان كده حبيت اعملها بطريقة جدية يمكن تعجبنى…و اهو تغيير
هتتقطعى الفشة قطع صغيرة…انا بعمل الخطوة دىى بالمقص بتاع المطبخ
و تحطيها تتسلق فى ميه عليها ملح و خل…
و بعد كده تصفيها من ميتها ,انا كمان شطفتها شطفة كده ع الماشى عشان الريم اللى كان متبقى…بس مش تغسلوها…تعدى المية ع الريم كده
انا سبتها لحد ما بقت ناشفة…على ما سويت الكبدة و وطيت عليها كانت نشفت
جبت طاسة تيفال واسعة…عشان الفشة تبقى مفرودة فيها كويس …و حطيت زيت بسيييييييط و بدأت اشوحها فيه
هتلاقوه بعد شوية ريحة بسيطة من تشويحها تقوموا تحطوا البهارات اللى هيا كمون و كزبرة ناشفة و قرفة مطحونةوبودرة توم و سماق بسيط…مش فاكرة بقى حطيت بابريكا كمان و لا لأ…لأنى بحط الصف كله…هههههههههه
و تشوحوها بالبهرات لحد ما تشموا ريحة التوابل…و بعدين تحطوا البصل يتشوح(انا كنت هحطه فلى الأول بس نسيت فقلت هحطه برضه و طلعت جمييلة اوى)
بعد ما تشموا ريحة التوابل اللى اتشوحت شوية تحطوا شوية خل بسيطة…تعمل تششششش
بعد ما الخل يتبخر قلبوا شوية و لما الفشة تكون اتحمشت و اتحمرت كده تحطوا الصويا صوص و تقلبوها هتلاقوها بتتبخر بسرعة بعد ما تكون غلفت الفشة بطبقة رقيقة ادتها طعم
كده الأكلة خلصت…بس ساعة الأكل حسيت ان جوزى كان حابب يبقى فيها شوية صوص ياكله مع الرز…
ف تانى يوم بقى جبت شوية دقيق و قلبته فى ماية دافية و حطت ع الفشة شوية صويا صوص و علهم الدقيق و سبته يتقل شوية ع النار…كانت تحففففففففففففففففففففففففففففففففة
اصلا يوم ما كنت باعملها جوزى دخل المطبخ يقوللى اييه الريحة الجميلة دى عشان طبعا الكمون لما اتشوح فى الزيت ادى ريحة حلوة اوى…كمان الخل اللى بيتش على البهارات المتشوحة بيخلى ريحة المطبخ جنان…
معلش انا مصورتش….على ما اذكر يعنى…لما اروح البيت لو لقيت صورة ع الكاميرا هنزلها لأنى عند ماما دلوقتى
جربوها بجد هتعجبكم اوى
و اللى عايزة تحط البصل قبل الفشة عادى…لأن الطاسة هتبقى كبيرة و كله هيتشوح مظبوط…بس انا عجبتنى الفشة و هيا متحمرة كده…لأنها طبعا قعدت وقت اطول فى التشويح على ما البصل اتشوح كمان
الفشة هتبقى متحمصة كده و بجد اول مرة استطعمها…
ملحوظة اللى بيحب البصل مطبوخ ع الاااااااخر يبقى يغطيها دقيقة كده و لا دقيقتين و الصويا صوص معاها عشان البصل يتهرى
متنسونيش فى الدعاء و اللى يجربها و تعجبه يقول هنا… مواضيع هذا القسم برعاية
sundew sundew 159424_2.gif فتكات هايلة Fatakat 159424 القاهرة – مصر