اخواتي الفتوكات الحلوين
النهاردة جايبالكو وصفة هايلة ومجربة ، عملتها يوم الجمعة اللي قبل اللي فاتت وطلعت وهمية وعجبت جوزي وابني جدا
هيا اسمها فطيرة السمك ، شفتها في قناة فتافيت عملتها الشيف سلمي وبصراحة خلتني اقوم اعملها فورا مش جمال شكل الطاجن
يالا يا حلوين ندخل علي المقادير :
حوالي كيلو الا ربع سمك فيلية ( انا عملت قشر بياض )
1 بصلة كبيرة مبشورة او مقطعة مكعبات صغيرة
3 فصوص ثوم ( دي حسب الرغبة) ممكن متحطيش ثوم
2 حبة جزر مكعبات
2 ملعقة كبيرة زيت زيتون
150 ملل كريمة طازجة
100 غرام جبنة بارميزان مبشورة ( عادي ممكن تحط اي نوع جبنة بتحبية ومتوفر زي الجودة، شيدر) بس بصراحة البارميزان ملهاش حل لما بتسيح في الفرن
1 ملعقة صغيرة مسطردة
ملح وفلفل أسود حسب الرغبة
عصير 1 ليمونة كبيرة
¼ كوب بقدونس مفروم
5 حبة بطاطس حجم كبير، مسلوق ومهروس ومضاف إليها ملح، فلفل أسود وشوية لبن
كيس سبانخ مجمد او فريش يكون افضل ودي اجمد طعم في الوصفة
استو بس متخافوش ، متستغربوش السبانخ مع السمك ، انا كنت مستغرباها برضة زيكوا كده بس الطعم بجد جامد
التطبيق
الاول نجيب طاجن بايركس وترصي فيه السمك الفيلية وتتبلية بشوية ملح وفلفل بس وتسيبية حوالي 10 دقايق لحد ما تخلصي باقي الطبق
تجيبي زيت الزيتون من غير ما يقدح علي البارد كده تحطي البصل والثوم وتشوحيهم لحد ما لونهم يبقي دهبي ويدبلوا وبعدين تحطيلهم الملح والفلفل
وبعدين تضيفي الجزر المبشور ، هيا في الوصفة الاساسية حطت الجزر مكعبات ، بس انا بشرتة احسن عشان يبقي وسط الاكل مش ملحوظ لان ابني مش بيعرف ياكلة ، وكمان لقيت شكلة احلي وبيستوي اسرع
وبعد ما تحسي انه اتشوح شوية هتجيبي الكريمة اللباني وتحطيها علي الخليط ده وتسيبيها علي النار تغلي مرة واحده بس وترفعيها من علي البوتجاز
وبعدين تضيفي المسطرده + الليمون+الجبنة+ البقدونس
اخر خطوة بقة ، تجيبي السبانخ ، لو كيس جاهز يبقي تعصرية من الماية الزايده وتفرشيها علي وش السمك الفيلية في البايركس اللي احنا سايبينة علي جنب ( اللي بقالة 10 دقايق ده
بعد ما حطينا السبانخ هنحط فوقيها الخلطة اللي احنا عملناها في الطاسة اللي فيها البص والجزر ، وبعد كده آخر طبقة في الفطيرة هيا البطاطس المهروسة بشوية زبدة ولبن
طبعا ممكن تعمليها بريقتين ، ممكن تفرديها عادي بإيدك وتمسحي ايدك بشوية ماية وتفرديها علي وش الطاجن ، الطريقة الثانية انك تحطيها في كيش الكريم شانتية وتعمليها علي شكل وردات علي وش الطاجن
مش هتفرق كتير ، ورشي شوية جبنة علي الوش وحطيها في فرن درجة حرارات 200 لمده ربع ساعة او لما الوش يتحمر
وبألف هنا وشفا وبجد جربوها وقولولي مواضيع هذا القسم برعاية
el 3asfora el 3asfora images/flowersavatars/avatar0024.jpg فتكات نشيطة Fatakat 485158 التجمع الخامس – القاهرة