بسم الله الرحمن الرحيم
انهاردة حيبالكم طريقه فراخ بالبطاطس انما ايه روعه وجربوها وادعولىىىىىىىىىى
بصى يا ستى انتى تجيبى زعتر اخضر وكام فص توم وفلفل اسود حب وشويه ملح وياريت لو واحدة مكعب دجاج وتفريمهم فى الكبه كويس وتكون مقطعه الفراخ وعصرة عليها لمونه ونقعاها وتقطعى البطاطس صوابع وبعدين تحطى خلطه التوم والزعتر على الفراخ والبطاطس وتبليهم كويس وبعدين تجى رشه شويه زيت على الوش وتيجى لفاها بفويل وتجى حطاها الفرن ومتحطيش عليها ولا نقكه ميه وتسيبها نص ساعه وبعدين بالف هنا انا عملت معاها برام رز وشويه سلطه وبألف هنا اسيبك مع الصور
دى البطاطس والزعتر والتوم والزيت والفلفل الاسود الحب بس نسيت اصور الملح
فى الكبه وافرمى الزعتر والتوم والفلفل والملح
هنا خلطت الخلطه بالبطاطس والفراخ
وهنا شكلها بعد ما خرجت من الفرن وان شاء الله حنزلكم قريب طريقه برام الرز على الطريقه الدمنهورى غييييييييييييييييييييييييييير
ولا اقولكم انزلهم بالمرة طريقه سهله تجيبى البرام ولا الطاجن اللى حتعملى فيه وتعايرى الرز التلتين من البرام من حجمه يعنى وتغسليه الرز فى البرام عادى وبعدين تملحيه وبعدين تحطى 90% لبن و10% ميه وتدوبى حته قشطه لان اللبن المبستر دة ولاالعادى بيبقى فيه قشطه وتدخليه الفرن وبعد مايستوى تطلعيه تفرطيه من النص وتيجى حطه السمن البلدى وترجعيه تانى الفرن لمدة عشر دقايق واسيبكم مع الصور يمكن الفكرة توضح
دة الرز فى البرام الفلاحى
وهنا انا مقربه عشان تشوفوا المعيار
هنا غسلت الرز وملحته عادى جدا
هنا غليت اللبن ودوبت فيه قشطه
ودة الشكل النهائى مواضيع هذا القسم برعاية
السرطانه والعقرب السرطانه والعقرب 100579_2.gif سوبر فتكات Fatakat 100579 6اكتوبر – مصر