صباح الفل علي الفتوكات
جايبة لكم النهاردة وصفة حلوة اوي وسهلة اوي
صنية سمك فيليه انما ايه جنان
واللي عايز طريقة السمك الفيليه البانية هتلاقوها عالرابط دة
سمك فيليه بانيه(مقلي) من مطبخ Lara وبالصور يا قمرات
نشوف مع بعض
المقادير
كيلو سمك فيليه متقطع ومتبل بليمونة وملح وكمون
وكسبرة ناشفة وشطة وبهارات سمك لو عندك معندكيش مش مشكلة
مقادير الخلطة
طماطتين
واحدة فلفل اخضر كبيرة
بصلاية متوسطة
3فصوص ثوم
وكلهم متقطعين قطع صغيرة
كسبرة خضراء مفرومة
الطريقة
اسهل ما يكون
هنجيب صنية ونحط فيها شوية زيت زيتون او اي نوع زيت
ونحط الخضار المتقطعة كلها ماعدا الكسبرة ونتبلهم بنفس تتتبيلة السمك ماعدا الليمون
ونسيبهم عالنار لحد ما تدبل شوية
ونطفي النار عليهم ونضيف الكسبرة الخضراء ونقلب كويس
مش قادرة اقولكوا علي الريحة التحفة اللي بتعملها الكسبرة للاكل نكهتها قوية اوي وطعمها رائع
المهم هنقسم الخلطة نصين نص هنسيبه في ارضية الصنية وهنرص فوقه السمك
والنص التاني من الخلطة هنحطه فوق السمك
التسوية بقي
هتغطي الصنية بورق فويل وتدخليها الفرن لحد ما السمك يستوي وينزل ميته
وبعدين تشيلي الفويل و تطفي الفرن وتشغلي الشواية عشان الشمك يتحمر والمية الزيادة اللي فيه تنشف
ممكن يا قمرات تدخلوا صنية السمك في الفرن منغير فويل
وهيستوي برضه بسرعة بس انا بحب اغطيه عشان النكهة بتاعة الخلطة
دة الشكل النهائي لصنية السمك روعة مش كدة ولا الريحة الجامدة والطعم الحكاية
والطريقة سهلة جدا وسريعة
اتمني تعجبوا الطريقة ومستنية رايكم يا حبايب قلبي والتقييم لو عجبتكوا الوصفة
مواضيع هذا القسم برعاية
(Lara) (Lara) 265722_27.gif فتكات غالية قوي Fatakat 265722 الرياض – السعودية