اجمعوا هنا يا فتوكات
انهارده هاقولكم علي سر من اسراري المطبخيه الجباره ..ههههههههههه
وهي الزيتون المخلل اللي اي حد بياكل منه بينبهر من الطعامه بتاعه…قولوا ماشاء الله
الزيتون فمصرالموسم بتاعه بيبدأ من نص شهر اغسطس وممكن يفضل في السوق
لحد آخر شهر اكتوبر ، يعني احنا لسه في الموسم خصوصا ان السنه دي رمضان جه بدري والناس مالحقتش تعمل زيتون
انا لسه عامله خزين السنه دي الاسبوع اللي فات
في اكتر من طريقه للتخليل وتقريبا جربتها كلها بس هي دي الطريقه الوحيد
اللي اعتمدتها ومابعملوش الا بيها
في انواع كتيره اوي من الزيتون الاخضر ، لو هاتاكلي الزيتون علي طول ومش عاوزه
تخزنيه لطول السنه فاممكن تجيبي نوع اسمه الزيتون التفاحي وده وبتبقي الزيتونه
مدورة وكبيره في الحجم وتحسيها طريه من كتر اللحم بتاعها بس مش بيستمر فتره
طويله وبيتهري ومابيبقاش حلو لو اتخزن فتره طويله
نوع تاني اسمه الزيتون العزيزي وده الزيتونه بتاعه صغيره في الحجم وانشف
شويه من التفاحي وميزته انه ممكن يستمر معاكي طول السنه ومش
بيتهري بسرعه ( عندي منه زيتون من موسم السنه اللي
قبل اللي فاتت ولسه ماشاء الله جميل جدا)
ندخل علي المهم طريقة التخليل ( وهي واحده للنوعين )
هانحتاج :
طبعا الزيتون
ملح خشن ( تقريبا 5 كيلو زيتون بياخدوا نص كيلو ملح خشن او اكتر شويه ) كان فيه كيس لشركة النصر كيلو ب 50 قرش ( اللي في الصوره) بس السنه دي لقيتهم نزلوا اكياس الكيس نص كيلو بربع جنيه
خلطه باجيبها من العطار عباره عن( حبة البركه وعُصفر او العقده الصفراء وشطه بنسبة 1:2:1 ) تقريبا الكيس ب 2 جنيه وبنحتاج نصه بس ( ينفع يتشال في التلاجه للسنه الجايه )
خل
عصير ليمون
قشر الليمون اللي عصرناه
فليفلة خضراء حامية
وبرطمان فاضي بحجم مناسب
ملعقتين من اي زيت نباتي وممكن زيت زيتون
الطريقه :
يغسل الزيتون جيدا ويشق من كل جانب علي شكل علامة x
ينقع في الماء لمده 3 او 4 ايام مع تغيير الماء اكثر من مره يوميا للتخلص من
المراره الموجوده فيه وماتقلقيش لو الشقوق لونها اغمق شويه لما يتخلل كلها هاتبقي
لونها اصفر
بعد فترة النقع يصفي من الماء ، ونحضر كل المكونات الاخري والبرطمان الفارغ
يرص الزيتون بالتبادل مع الفليفلة وقشر الليمون وخلطة العصفر وقليل من الملح
وملعقة عصير ليمون وملعقة خل
وهكذا ترص طبقات الزيتون وفوقها باقي المكونات بالتبادل حتي
نملأ البرطمان مع الضغط جيدا عليه حتي لا نترك اي فراغات هواء بين الزيتون
نراعي ان تكون الطبقه الاخيره من الفليفله و قشر الليمون
نضيف الماء حتي يملأ البرطمان ثم نرجه جيدا حتي يذوب الملح
وبعدين ندوقه ونظبط الملح واذا حسيتي انه محتاج ممكن تضيفي
شويه ملح كمان وترجي البرطمان
وبعد كده نحط الملعقتين الزيت علي وجه البرطمان عشان نمنع
دخول الهواء لطبقات الزيتون ونمنع تعفن الطبقه السطحيه
( وعموما احنا حاطين قشر الليمون عشان لو حصل لا قدر الله عفن نرمي الطبقه اللي فوق )
ثم احكمي غطاء البرطمان كويس اوي وحطيه في اي حته عندك في
المطبخ لمده 10 ايام او اسبوعين علي الاكثر وبعدها ذوقي الذ زيتون مخلل
ولاحظي عدم فتح البرطمان عليه كل شويه لان ده بيدخل هواء وممكن يفسد الزيتون
ملحوظة :
ياريت تحطي البرطمان علي طبق او كميه من ورقة الجرايد او قطعة قماش سميكه لانه في اول يومين بيفور شويه وبينزل شوية ميه صغيرين
وبالف هنا وشفا
ملحوظه للإشراف : الموضوع ده كنت كتبته في منتدي تاني قبل كده يعني مش منقول ولا حاجه مواضيع هذا القسم برعاية
فضفضة فضفضة images/avatars/peppers.jpg فتكات متميزة Fatakat 20992 محافظة الغربية – مصر