‘ ‘ ‘ ‘ ريجيم الـ 4×1 كينج الريجيمات ‘ ‘ ‘ ‘ خلى حاجه تشيل حاجه ؛-) 2024.

بسم الله والحمد لله والصلاة والسلام على رسول الله

كل عام وانتم بخير اللهم بلغنا رمضان وأعنا فيه على الصيام والقيام

لكل واحده زهقت ومش عارفه راسها من رجليها فى موضوع الدايت من كتر اللى بتقرأه وبتسمعه وبتجربه ..

انا قعدت أمخمخ مع نفسى وقلت هجمع كل حاجه قريتها وسمعتها وعرفتها وجربتها فى نظام واحد عشان أخلص من التشتت ده وأطلع بنظام مريح ولذيذ ومحفزات كتيييييييييييير

*ان شاء الله الموضوع هعمله على هيئة فهرس عشان لو كان طويل عليكوا انكوا تقرأوه مره واحده ~معلش بس جسمك يستاهل تبذليله جهد عشان تحسى بأنوثتك وجمالك وان شاء الله يبقى موضوع خفيف على قلبكوا~ وده لأنى هتكلم كتيير عشان كل واحده تخرج مقتنعه باذن الله بالنظام لأنه مش نظام تجويع ولا حرمان احنا بنحاول على اد ما نقدر اننا نفهم جسمنا واحتياجاته صح وخليكى كلك تفاؤل وأمل عشان النفسية بتلعب دور كبييير اوى فى نزول الوزن يعنى لو من جواكى مش مقتنعه ومش مرتاحه مش هتعرفى تنزلى بسهوله وعشان كدا هكتب كل كلمه اعرفها لعلها بفضل الله تفيد اى حد // وبترجااااااكى بجد مش هزار قبل ما تقرأى اى حاجه تقومى تجيبى ورقه وقلم تكتبى فيهم كل حاجه استفدتيها بفضل الله وتكتبى فيها اهدافنا سوا العلماء ما بيعترفوش بأى انجاز غير مكتوب وده لأنه اللى بتكتبيه بيترسخ فى عقلك الباطن وبيبدأ يبأه جزء من حياتك وانتى مش حاسه واللى هنكتبه هنقرأه كل يوم الصبح اول ما نصحى وقبل ما ننام بالليل وانا مش بألف الحاجات دى فعلا اتعلمتها من خبراء لعلم النفس كنت حضرت محاضرات ليهم فى التنميه البشريه وبالتوفيق ان شاء الله

ومعلش يا بنات انا بتضايق من الناس اللى بتدخل تتأفف وتخرج عشان الموضوع الطويل ولا بتقدر المجهود اللى مبذول فيه حتى يعنى انتى هتقرأى بس لكن حاول تتخيلى اللى بتكتب الموضوع حضرتله وجمعت افكارها وكتبته ونسقته فى اد ايه ومجهود اد ايه وسايبه حالها ومحتالها عشان كل اللى عيزاه انها تفيدكوا مش اكتر فأحنا بنعد على فتكات بالساعات اعتبرى انك قريتى موضوع فى القسم ده وبعديه موضوع فى القسم ده وهكذا بس مضمومين فى موضوع واحد احنا اصلا بنعد نقرأ ونكتب هنا عشان نفيد بعض ما بنعملش حاجه تانيه ممكن اما تتعبى تركنى الموضوع على جنب وتقرأى غيره وارجعيله تانى تقبلوا مناقشتى لو سمحتوا

هنتكلم فى النقط دى ان شاء الله:..

* مكونات الريجيم

* معلومات عن مكونات الريجيم للتحفييييز

* مدة التحدى

* وليه مده عشوائيه او ايه اساسها اللى عملت بناءا عليه الموضوع بكل ثقه

* نقط مهمه استفدتها من المينى الدايت اللى عملته

* خطوات الـ 4×1

* هنعمل ايه لو فى صيام وده هتنقسم لقسمين

– لو صيام يوم واحد .. – لو صيام كذا يوم ورا بعض

* محفزات اخرى لا حصر لها بأذن الله

* النقاط اللى هنتبع بيها سوا ان شاء الله

((( بسم الله )))

*مكونات الريجيم:..

نظام يوم ويوم

نظام الصيام العكسى

نظام الأكل كل 3 ساعات

نظام اللقيمات

*معلومات عن مكونات الريجيم:..

طبعا قرأتوا عنهم هنا كتير ودى نبذات مختصره عن كل نظام

نظام يوم ويوم : بمعنى ان يوم نقلل فيه جامد جدا جدا جدااا وفى المقابل اليوم اللى بعده بناكل فيه براحتنا فما بنحسش بحرمان اووى لأن كل اللى علينا ان نستنى لبكره مش اكتر

نظام الصيام العكسى: بأننا نتعشى بدرى ونقفل الأكل بدرى ماكسيمام الساعه 7 او 8 لحد فجر تانى يوم او تانى يوم الصبح وده بيعتبر صيام من المغرب للفجر وطبعا بيجيب نتايج رهيبه وسريعه لا حصر لها هنا فى المدونة

نظام الأكل كل تلات ساعات: وده عشان الحرق يفضل شغال كل ما ناكل الجسم يبقى جاهز للحرق مش يركن الأكل على ما يسخن لسه

نظام اللقيمات: هناخد جزء منه وهو ان كل حاجه هناكلها هتبقى فى حجم تلت الكف حتى لو نفسك هفتك على حاجه حلوه مش هيبقى فى مشكله ان شاء الله

مدة التحدى:..

انا مش هقولكوا هنعمل مده معينه وهننزل فيها كذا لأ أحنا هنعمل مده ونمشى عالنظام وكل واحده تبذل قصارى جهدها ونشوف النتيجه مين هيتفوق فيها ويبقى حافز لغيره بعد كدا

ان شاء الله هنبدأ من النهارده ولمدة 60 يوم لبعد رمضان

وكمان عشان كل ما تحسى انك عايزه تاكلى تشجعى نفسك بأن المده الى حد ما بسيطه كلها 60 يوم بس وهرجع اكل تانى بس وانا حابه نفسى وحابه جسمى وكمان فاهمه أكلى كويس ومرجعش زى ما كنت تانى

* وليه مده عشوائيه او ايه اساسها اللى عملت بناءا عليه الموضوع بكل ثقه طالما انى معرفش هننزل اد ايه فيها!!..

انا زدت حوالى 20 كيلو فى سنه !!!!!!

وروحت لدكتوره فى الأول بس ما مشيتش على نظامها لأنى احبطت جداااا اما عرفت وزنى اللى ما كانش عندى خلفيه انه وصل للدرجه دى

فضلت بعديها شهرين بشتغل نفسى بمعنى انى بقنع نفسى انى مقلله وانا مش مقلله ولا حاجه يعنى باكل كوااااارث بس بحكم انها قلت حاجه بسيطه اوووى عن قبل كدا بقنع نفسى ان ده دايت ضيعت شهرين عالأرض .. والناس اشتغلت فى الايحاء ان كل ما حد يشوفنى يقولى انتى خاسه وانا مش حاسه انى بخس بس كل ما يحد يقولى كدا اروح احتفل واكل هههههههههه

جيت بعدها لقيت الموضوع زايد عن حده والهدوم ما بتوسعش ومش لاقيه اى حاجه البسها وكل ماروح اشترى مش لاقيه حاجه مريحانى

قلت لأ هروح لدكتوره تانى بس هشد بأه واحاول انتظم معاها

روحت لدكتور تانيه وكنت فاكرانى بقه نزلت زى مالناس بيقولولى وزى ما بقنع نفسى انى بعمل دايت

لقيتنى زدت اربعه كيلو عن الوزن اللى كنت زايده فيه حاجه وعشرين كيلو عن وزن زمان اللى بردو ماكنتش فيه عصايه قال ايه كنت ساعتها بحس نفسى مليانه بطررررر

انا تابعت فتره قليله اوى ما جبتش شهر معاها وكان كلامها ان الشهر الأول المفروض ننزل 10 كيلو والشهر التانى بيبقى فى حدود 7 كيلو

وفعلا انا اما مشيت عالنظام نزلت 2كيلو و100 جرام فى 6 أيام وده لأنهم كانوا من أصعب أيام حياتى فى الأكل ودى حاجه بتثبت ان الواحد لو بذل قصارى جهده ممكن يعمل نتيجه جميله اووى

جيت تانى 10 ايام ما مشيتش على نظامها خاااالص لأنى طبعا كان نفسى اتقطعععع من اول 6 ايام .. فبدأت اما اعك احاول اعوض بحاجه تانيه يعنى مثلا اشرب مشروبات حارقه كتير .. ازود المايه اللى بشربها اللى هى فى الأساس 10 كوبايات .. الغى وجبه .. اقلل خالص اليوم اللى بعده زى نظام يوم ويوم .. احاول امشى شويه او ماتعشاش وماكلش لتانى يوم

ووالله العظيم يا بنات تانى 10 ايام دول الحمد لله نزلت فيهم اتنين كيلو مع انى ما كنتش ماشيه مع نظامها خالص كنت بألف مع نفسى ووالله انى كنت واكله 3/4 علبة شيكولاته لوحدى ومش اى شيكولاته شيكولاته Lion اللى يعرفها فيكوا اكيد عارف هى مفتريه ازاى كانت جيالنا من بره وانا اصلا بعشقهههها وقلت مش هضيع الفرصه دى عشان الدايت

يعنى مثلا كان بيجيلى ايام اكل 3 تمرات و3 شيكولاتات بسسس

فاهمين حاجه تشيل حاجه زى ما بقولكوا يعنى مش اكل محشى ومكرونه وبيبسى وشيكولاته فى يوم واحد لأ والله كنت باكل الحاجات دى كلها بس كل حاجه فى يوم وبناءا على انى كلتها اقلل فى الحاجات التانيه وازاود فى الحاجات المفيده

ومع الهبل اللى كنت بهبله ده نزلت 2 كيلو وده اعجاااااااز الحمد لله ما شاء الله ولا قوة الا بالله ادعولى بالبركه

وبكده رجعت للوزن اللى كنت وزناه عند الدكتوره الأولانيه من كام شهر ومازال قدامى حاجه وعشرين كيلو عايزه انزلهم

وبعد التجربه دى قررت انى هاكل اللى نفسى فيه بس بذكاء مش هحرم نفسى من حاجه وقررت نشارك بعض التحدى ده

* نقط مهمه استفدتها من المينى الدايت اللى عملته:..

– اول حاجه واهم حاجه الماااااااااااااااااء .. طبعا ياما قرأت هنا عن اهميه المايه وان الجسم لما بيبقى بيجيله مايه قليله بيبدأ يشتغل باّلية دفاع عشان يحمى نفسه من الجفاف وهو انه بيخزن المايه تحت الجلد زى الجمل كدا لكن لما بتديله حاجته وزياده ما بيخزنش حاجه وطبعا تخزين المايه تحت الجلد بينفخ الجسم وبيزود وزنه

ثانيا انه بيشغل الجسم صحححح سواء الأعضاء والوظايف بتحسى باختلاف فى كل حاجه داخليه او خارجيه

كنت بقرأ كلام كتييير جدا فى كل حته عن اهمية الموضوع ده بس طبعا زيى زى غير بكسل وبكبر

لكن لما الدكتوره الزمتنى بـ10 كوبايات فى اليوم وكنت بشرب فى الكوبايات الكبيره 2 منهم قبل كل وجبه حسيت فعلا بالفرق

لأنه بيعلى التمثيل الغذائى وبيخلى الجسم ينجز ويشتغل بسرعه ويتخلص من فضلاته سريعا سريعاااا مش يركنها لأنك مش مدياله اللى محتاجه واللى يساعده

الفضلات مش المايه بس زى ما كل الناس فاهمه وكمان لو عندك امساك هتحسى بتغيير جامد جدااا

جربى اشربى عشر كوبايات مايه فى اليوم 3-4 ايام ورا بعض واعملى احصائيه بالورقه والقلم وشوفى معدل دخولك الحمام هيختلف ازاى ومعدتك هتريحك ازاى عن الأول بفضل الله

– تانى حاجه ودى كنت فعلا قريت لوحده هنا كاتبه وجهة نظرها عن موضوع اننا شايفين ان فى ناس بتاكل وتتخن وناس مهما كلت ما بتتخنش وفعلا لقيت ان كلامها صح 100%

الناس اللى بتاكل وما بتتخنش دى ممكن تعد قدامك تاكل بأاااااااد كدا حلويات شيبسى وبيبسى وشيكولاته وغيره بس ممكن تكون هى دى اكلتها طول النهار *زى يوم الشيكولاته كدا ماحرمتش نفسى منها بس ما كلتش غيرها* .. لكن احنا ناكل حلويات معاهم ونروح نكمل محشى ومكرونه وغيره وغيره ونتعشى عشوه بردو كد بنت لذينا .. هما اما بيكتئبوا ما بياكلوش احنا اما بنكتئب بنطلع همنا فى الاكل كاااااااااارثه وده فعلا كله صح

احنا بناكل رغيف الصبح وطبق مكرونه اد كدا وممكن رغيف بالليل وفى الاخر نقولك ده احنا مقللين وعاملين دايت ما بننزلش ليه !!!

نقول هناكل فاكهه صحيه ومفيده ومش بتتخن تلاقى الواحده قعدت كلت البطيخه وهى قاعده هههههه

فى حين ان الدكتوره قالتلى اما اكتبلك ثمره وتكون حاجه مينفعش تتعد خدى منها على اد كوباية شاى يعنى بطيخ عنب كدا اللى يملا كوباية شاى دى ثمره يعنى احنا بناكل اضعاف اضعافها بحجه ان الفاكهه مفيده!!!

* خطوات الـ 4×1

طبعا انا هقول النظام اللى توصلتله وشيفاه مناسب لو حاجه فيه مش عجباكى ممكن تعدليها وتعوضيها بحاجه تانيه زى ما اتفقنا

انا هرفعلكوا صوره دلوقتى ان شاء الله وهسيبها كبيره زى ما هى مش هصغرها وده عشان تنزلوها عندكوا وتعملوا زوم وتقرأوا كويس وتفهموا قصدى

هنقسم النظام Day1 , day2 >> زى ما قلنا واحد لينا وواحد علينا واحد هيبقى كل دايت والتانى فيه نفس شويه ((( بس حاليا هنشد على نفسنا شويه على ما ننزل حبه حلوين وبعدها نزود النفس اللى فى اليوم التانى اما نبدأ فى مرحلة التثبيت باذن الله )))

اليوم اللى علينا اللى كله دايت

الفطار: .. الساعه 8 الصبح .. بردو كلام الدكتروه انك حتى لو مش بتصحى بدرى قومى الساعه 8 كلى وكملى نوم معدل الحرق بيبقى عالى جدا وكمان احنا فاهمين غلط موضوع النوم بعد الأكل ده انه ممنوع لأن هى وكذا دكتور قال نقوم ناكل ونكمل نوم دى عادى

كوب لبن خالى الدسم + بيضه مسلوقه
(( ممكن طبعا حاجات تانيه بس بنحاول ناكل الحاجات اللى احنا فى العادى مقصرين فيها زى البيض واللبن ))

او

5 تمرات + كوب لبن خالى الدسم
(( طبعا كل الناس ببتفزع من التمر لأنه كله سكريات بس الدكتوره كانت كتبالى كدا فى الفطار فى اول اسبوع وكمان التمر مفيييد جدااا والبيت من غير تمر اهله جياع وحلو اووو للبيريود ولتسهيل الولاده وده قرأته على صفحة دكتور معروف ودليله على ان السيده مريم اما جالها المخاض الله سبحانه وتعالى أمرها تهز جذع النخل عشان تاكل تمر يسهل الولاده ))

الـ Snack >> بعدها بتلات ساعات زى ما اتفقنا يعنى الساعه 11

هناكل ثمرة فاكهه وزى ما قلتلكوا الثمره فى الحاجات اللى ما ينفعش نعدها على اد كوباية شاى فقططط ولما نقول مثلا ثمرتين يبقى كوبايتين وهكذا

الغدا:.. الساعه 2

طبعا قبلها كوبايتين مايه زى الفطار

هناكل سلطه

وخضار *طبيخ .. من غير سمنه ولا زيت انا لسه هعمل موضوع على ان السمنه والزيت دول وهم فى ان كل الناس متخيله ان هما اللى بيدوا طعم للأكل لأنى طبخت من غير ولا نقطه ودوقته لهم فى البيت محدش خد باله ان فى فرق خطوه بسيطه وصحيه حطى البصله على نار هاديه عادى من غير حاجه وحتى لو اتلسعت متخفيش مش هتأثر فى الطعم خاااالص

البروتينات: نوع اللحوم اللى موجود بس ططبعا مش مقلى ممنوع منعا باتا المقليات دى كارثه لو عامله بانيه مثلا جربى تشوحيه فى نقطه سمنه وافضلى قلبى فيه لحد ما يستوى وطلعا بتقفلى عليه وتتطمنى عليه كل شويه من غير مايه ولا حاجه هيطلع زى المشوى بالظبط

والنشويات: 4 معالق رز او مكرونه او ربع رغيف

الحاجات دى كلها هتشبعك وده لأنك زودتى السلطه والطبيخ الخضار اللى متعودين منجيش يمته هيملى معدتك ده بجانب المايه اللى قبل الأكل حاولى ما تشربيش مايه بعد الأكل على طول

الـ Snack الأخير او العشا هيكون بردو بعد الغدا بتلات ساعات // الساعه 5 وهنا هنقفل أكل لحد الفجر *صيام عكسى

كوبايتين مايه

زبادى + ثمره

او اى حاجه بسيطه وصحيه

Day2 اليوم اللى لينا

بالنسبالى ان شاء الله هخلى الفطار كوباية لبن خالى الدسم صغيره

وهلغى السناك الأول واكل حاجه حلوه فى ميعاده عشان يبقى قدامى اليوم كله حركتى تحرق فيه

وهاكل حاجه حلوه واحده مثلا مولتو او لمبادا

وفى الغدا هلغى النشويات

والعشا زبادى او حاجه خفيفه

وطبعا بين الوجبات شاى اخضر وبالليل مشروب حارق فى اليومين

وانتى رتبى اليوم التانى زى ما تحبى المهم زى ما اتفقنا خلى حاجه تشيل حاجه

انا هكتفى بالقدر ده دلوقتى وهستنى اشوف رأيكوا وتقييماتكوا للموضوع اذا كنت أكمل ولا لأه عشان انا تعبت ولسه قدامى كتييير لو تعبى بفايده مش هلاقى اغلى منكوا اتعبله بس طمنونى انه بفايده انا قاعده مستنيه اهو ..

فى رعاية الله

[/color][/color][/color]

يا مؤمنين صلوا عليه يا مؤمنين صلوا عليه 567605_42.gif سوبر فتكات Fatakat 567605 لا إله إلا الله وحده لا شريك له، له الملك وله الحمد وهو على كل شئ قدير – لا حول ولا قوة إلا بالله. – سبحانك اللهم وبحمدك لا إله إلا أنت أستغفرك وأتوب اليك – لا إله إلا أنت سبحانك إنى كنت من الظالمين.

سبحان الله و بحمده