حبيباتي الفتوكات …..
أولا ربنا يرزقكم الحمل السليم المعافى ويفرحكم بيه …. أنا عندي خبرة بسيطة بقواعد التغذية لأني بدرس أصلا في الجامعة وبدي مقررات ليها علاقة بالغذاء والتغذية وهجاوبكم في حدود معلوماتي وباقي العضوات ممكن تثري الموضوع أكثر ….. وربنا يتم حملنا بالخير والسلامة
الموضوع ده كان ردي على أخت لينا حامل وبتستفسر عن شوي حاجات ايه اللي تاكلوا وايه اللي ما تاكلوش وقلت أعمله موضوع مستقل عشان الكل يستفيد منه
ما تنسوش لو عجبكم الموضوع دعوة بظهر الغيب والتقييم
نبدأ باسم الله الرحمن الرحيم
بصي يا ستي الحامل دي بنعاملها زي البيبي الصغير ولازم تعرفي إن اللي هتاكليه هياكل منه البيبي ومكونات الأكل اللي هتاكليه هتنتقل عبر المشيمة للبيبي فلو فيه أي حاجة غلط هتأثر عليكي مرة اعرفي إن تأثيرها على البيبي مضاعف 10 مرات …..
مش هطول عليكم هرد عليكم على طول بخصوص الحاجات اللي ممكن ناكلها في أول شهور الحمل والحاجات المفضل الإبتعاد عنها وبرده بأكد ان اللي يمشي في أول الحمل ممكن يمشي لآخر شهور الحمل :
بالنسبة للجبنة القريش ما فيهاش مشكلة خاااااالص بس تجيبيها من ناس كويسين عشان نضمن نظافتها ولو مش هتعرفي تعملي الكلام ده اعملي الجبن القريش في بيتك بنفسك (2 كيلو لبن واغليهم كويس وبرديهم وشيلي وش القشدة بتاعتهم وبعدين دفي اللبن شوية وضيفي كباية زبادي صغيرة وقلبي وخلي الحلة زي ماهية في مكان دافي لحد ما تتجبن وبعدين في كيس مخدة قديم نظيف حطي الحاجات دي جواه وعلقيها في الحوض أ حطيها على ظهر صينية واضغطي عليها بحلة من فوقها بحيث تنزل ميتها شوية وسيبيها طول الليل وتاني يوم قطعيها وحطيها في علبة وشوية من الماية اللي نزلت مكان التصفيه زودي عليهم شوية ملح وغطي الجبنة بيها)…
الجبنه الرومي والموزاريلا والشيدر بلااااااش علشان أصلا همة في خطوات صناعتهم بيتصنعوا غالبا من لبن بقري غير معامل حراريا يعني من لبن خام وده بيخلي فيه ميكروبات اسمها الليستيريا ودي بعد الشر في حالة تواجدها ممكن تسبب الإجهاض بالإضافة لأنهم صعبين في الهضم شوية
السوسيس واللانشون والبسطرمة بالبيض المقلي والبلوبيف بالبيض برده لااااااااااااااااااا خالص وده عشان كل اللحوم ومصنعاتها بيضاف لها أثناء خطوات الصناعة مادة النترات والنيتريت عشان تديهم اللون المحمر اللي بنشوفه وفي نفس الوقت بتعتبر من المواد الحافظة والمادة دي من خصائصها انها مع الحرارة زي ما بنعمل البيض بالبسطرمة المادة دي بتتحول لمادة مسرطنة وتأثيرها علينا ممكن نتحمله بس على الأجنة ممكن تعمل تشوهات
البيض نفسه ممكن ناكل بيضة مش هيحصل حاجة ولازم نفرق بين الزلال اللي بييجي للحامل وزلال البيض ده مجرد تشابه أسماء
الكاتشب والمايونيز والمسترده والتونة طبعا لااااا عشان دي معلبات وفيها مواد حافظة وكل المواد الحافظة بتأثر على عملية تكوين خلايا المخ للأجنة
طبعا المخلل والفسيخ والسردين والرنجة والأنشوجة بلاش وده عشان الملح ما يعليش الضغط ويأثر عالجنين
الزبادي مفيهوش مشكلة خالص بالعكس ده بيحافظ على الميكروبات المفيدة الموجودة جوة معدتنا وبيزودها وبيحسن خصائص الهضم والإستفادة من المواد الغذائية اللي بناكلها
والبصل والتوم برده ما فيهلون عشان بيسببوا انتفاخ بس العادي انك لو هتحطيهم في الأكل يفضل يكونوا مستويين قدر الإمكان
الرز والمكرونة ممكن بس بلاش نكثر عشان ما يجيبوش إمساك عالفاضي ويزيد الوزن في مرحلة ما نحبهاش
التوابل قللي من التوابل الحريفة زي الشطة والحبهان عشان بتهيج شوية جدار المعدة وممكن تسبب لك ضيقة بس عامة مفيش منها مشاكل
الكشري والفول والطعمية برده مفيش منهم مشاكل إلا لو عندك القولون عشان الإنتفاخ .
الكبدة يفضل أول 3 شهور مناكلش منها وده عشان الكبدة غنية بفيتامين أ بنسبة كبيرة وده زيادته قد تؤدي لحدوث إجهاض
السمك المشوي والمقلي ما فيهوش مشكلة بس لو بتحبي مصمصة الراس بلاش تاكلي الراس عشان لو فيه أي ملوثات بتتركز في الراس فالمفروض نبعد عنها
السجق البلدي المعلب والسمبوسك ما فيش فيهم مشكلة بس يفضل وانت بتحضري السجق ما تحطيش سمن أو زيت وتكتفي بالدهن اللي هينزل منه وطبعا قدر الإمكان ما تاكليش الدهن ده ولو عرفت تجيبي سجق الجزار هيكون أفضل من المعلب عشان المواد الحافظة والسمبوسك برده عادي ما فيهاش حاجة
مرقة الدجاج والإندومي دول سرطان في البيت حتى الناس العادية المفروض تبعد عنهم ولو هتاكلي اندومي كليها من غير كيس التوابل بتاعها لأن مرقة الخضار وتوابل الإندومي فيهم مادة الميتا باي سلفات ودي مادة مسرطنة هية بتضاف عشان تحسن طعم الأكل وتدي طعم مميز لكن الأبحاث حذرت منها..
واكياس شوربة الخضار واكياس تتبيلة البانيه والكفته والشاورمة والباشاميل الجاهز والذي منه بصراحة مش شايفة ليهم لازمة انك تشتريهم اصلا لطالما تقدري تعمليهم بنفسك في البيت بس عامة عشان احنا مش بنستخدمهم كل يوم ممكن تشتغلي بيهم عادي مش هيحصل حاجة بس طبعا لما الحاجة تكون طازة وانت عاملاها بتفرق كثير حتى لو كان طعمها مش قد كدة بس لما نقارنها بدرجة أمان الأكل اللي بنحضره يبقى الطبيعي يكسب
اللب والمكسرات وزبده الفول السوداني ما فيش فيهم مشكلة بس ما نزودش منهم عشان زيادة الوزن وبرده لازم تعرفي ان المكسرات زي الجوز واللوز والبندق والكاجو لما تاخدي منهم لحد 10-12 واحدة بتساعد في تشكيل الجهاز العصبي للجنين وتطور خلايا المخ ليه بطريقة ممتاااازة.
ايه احسن حاجة الحامل المفروض تاكلها عشان يكون الجنين كويس وتكون صحتها كويسه ؟؟؟ الفاكهة خاصة التفاح وتبتعدي تماما عن العصائر المحفوظة وعصير الأناناس سواء طازة أو معلب وبلاش التمر عشان بيعمل انقباضات في عضلات الرحم ممكن تأثر على ثبات الجنين والدليل إن السيدة مريم العذراء بعد ولادة سيدنا عيسى عليه السلام كان غذائها التمر – الخضار كله كويس خاصة الخيار والخس بس بلاش تكثري من الجزر والبروكلي عشان فيه برده نسبة عالية من فيتامين أ – اللبن والزبادي كويسين جداااا – السمك ما عدا التونة والماكريل قللي منهم وابعدي عن الراس – الفراخ بس بلاش ناكل الجناح خااااالص عشان بتتركز فيه الهرمونات والملوثات اللي بتيجي للفراخ من العليقة اللي بياكلوها في المزارع – اللحوم الحمراء زي البط واللحمة كويسة بس بلاش نكثر منها
وايه المشروبات الكويسة عشاني : الماء العادي مش أقل من 3 ليتر في اليوم ولو حبيتي تعملي زي ما جدتي زمان كانت بتعمل كان في ازازة كدة تحط نقطتين ماء ورد عالماية واشربي الماية دي عادي – عصائر طبيعية ما عدا الأناناس والتمر – لبن بأي إضافات تحبيها – الليمون – النعناع – الينسون – الكاموميل بس مش كثير يعني فنجان كويس قوي –
وايه المشروبات اللي ابعد عنها؟ القرفة – الزنجبيل – الحلبة عشان دول ليهم تأثير حريف أو بيتعب المعدة للحامل – الشاي الأخضر – الشاي – القهوة ومشتقاتها – الكاكاو – مشروبات الشيكولاتة – مشروبات الطاقة- المشروبات الغازية – العصائر المعلبة – مشروبات الدايت عشان فيها سكر صناعي – السنامكة وأي مشروبات أو خلطات للتخسيس عشان بتنزل الماية من الجسم .
واشرب ايه لو جالي اسهال او امساك او مغص او صداع او دوخه ؟؟ أي حاجة روبات المتاحة عندك الكويسة
وبالنسبة للحلبة والينسون والنعناع والقرفة والكاكاو باللبن عادي لو شربت منهم ولا ممنوع؟
وانا عندي صديد في اللثة من اسناني لو ده ادى انه لاقدر الله حرارتي ارتفعت شوية اتصرف ازاي؟ عادي تقدري تاخدي بنادول العادي بس يعني لا بنادول اكسترا ولا أي حاجة تاني بنادول العادي وممكن تاخدي مضاد حيوي آمن أثناء الحمل زي الأوجمنتين بس مش تزودي الجرعة غالبا الدكتور هوة اللي بيحددها ليكي وطبعا يفضل تاخدي فيتامين عشان اللثة ممكن تاخدي فيتامين سي أقراص فوارة
وهل ينفع افتحه عند دكتور اسنان اليومين دول ولا لا؟ عادي بس قولي للدكتور انك حامل عشان لو فيه بنج واللا حاجة يقلل للحد المسموح بيه
بالنسبة لسدة النفس والترجيع والحاجات دي فده حاجة طبيعية بسبب تأثير هرمونات الحمل ما تفكريش فيها كثير وممكن تستمر معاكي أول 3 شهور وممكن تكمل للشهر التاسع وممكن تكوني زيي يعني أول 3 شهور أماااااااااان ومن الشهر الرابع لحد دلوقتي تعب وترجيع وغممان نفس ….. فكري في النواحي الإيجابية زي إن شعرك هيكون مظهره أحلا وإن الماية اللي بتشربيها دي هتنور وشك وتخلي بشرتك مشدودة وشكلك هيكون أحسن وبعدك عن الشاي والقهوة وشرب اللبن هيفرق في لون أسنانك وكدة يعني …..
بالنسبة طبعا لو انتي بعدتي عن الممنوعات وكلتي في حدود المعقول من الحاجات المسموح بيها وزنك إن شاء الله مش هيزيد وما تقلقيش تغذية الجنين مش هتتأثر خاااااااااالص لأنه هياخد احتياجاته في كل الأحوال ان مكنش من الغذا هيكون منك ….
يارب أكون عملتلك موضوع وافي بأسئلتك وتحت أمرك
وهعمل بعد إذنك الرد ده موضوع مستقل عشان الكل يستفيد منه إن شاء الله
nanya1984 nanya1984 فتكات نشيطة Fatakat 1177228 القاهرة – مصر