رحلتى يوم السبت فى سوق غزة مع المفارش و الكفرتيات للعروسة 2024.

السلام عليكم

يوم الجمعة انا عملتلكم موضوع عن رحلتى فى درب سعادة و حمام التلات

يوم السبت بقى كانت واخدانى الجلالة فقلت اروح سوق غزة

سوق غزة دة يا جماعة فى القاهرة هتركبوا المترو و تنزلوا محطة غمرة و تعدوا الناحية التانية و تركبوا اى حاجة و تقولى عايزة انزل سوق غزة

لجل حظى بقى الميكروباص نزلنى بالظبط عند الباب اللى بيدخل على قسم البطاطين و الكوفرتيات و مفارش السرير

دخلت الباب لقيت محلات و ناس فارشة بقى

تقريبا كدة بتاع 15 محل بالكتير بس عندهم كل حاجة من بطاطين و كفرتيات و مفارش السرير الشتوى و الملايات و مفرش السرير الابيض المطرز السورى و اللى مش مطرز زى المجد

دخلت اول محل و انا لسة مش عارفة عايزة اجيب اية.. اجيب بطانية و لا كوفرتة و لا مفرش السرير

شفت فى اول محل كوفرتة كدة عليها وش نمر بس الوش كبير مالى الكوفرتة كلها

بسأل الراجل فى امان الله بكام؟

قالى ب 360

سألتة على مفرش سرير عجبنى اوى قالى ب 650

قلتلة طب بلاش دول.. عندك بطانية تايجر.. قالى دبل فيس؟؟ قلتلة اة

جبهالى و قلتلة كام؟؟ قالى 400
ههههههههههههههههههههههههه

اخدت منة الكلام دة و مشيت.. قعد يقولى طب انتى اخرك كام قلتلة انت اللى اخرك كام؟؟ مرضيش يقول الا لما انا اقول اخرى كام

قلتلة لا انا مش هقدر اقولك الا لنا الف على باقى المحلات و اشوف الاسعار

و مشيت و سيبتة بعد ما كان طالع من عينى الكوافرتة اللى على وش نمر و البطانية التايجر

اتمشيت بقى و اتفرجت فى باقى المحلات و انا عمالة ادور بعينى على الكوفرتة التايجر او اللى على وش نمر

لكن ملقتهاش متعلقة فى اى محل تانى

بس بدأت بقى فكرة المفرش بتاع السرير تتبلور فى مخى بعد ما فقدت الامل فى الكوفرتة

بصيت على كل المحلات على المفرش و لفت نظرى نفس المفرش اللى شفتة فى اول محل.. و بقيت كل ما اشوفة تانى فى المحلات التانية يعجبنى اكتر

خصوصا انى كنت عايزة المفرش الابيض اللى مش سورى

لانى مش بحب التطريز فى مفرش السرير الابيض بالذات

بحس ان من كتر التطريز اللى علية مش باين بياضة بالعكس باين اللون الفضى المطرز اللى في و الفصوص اللى فية اكتر من اللون الابيض

و سألت على تمن المفارش طول ما انا بتفرج

اللى يقولى 550 على المفرش عللى عاجبنى و اللى يقولى 350 بس كان نوع مفرش تانى غير اللى عاجبنى.. و بصراحة كان شكلة مش اد كدة و اللى يقولى 850 و اللى يقولى 700

كل واحد بقى بيضرب رقم بمزاجة

خلصت المحلات يا اختى

و قلت اخد لفة كمان من الاول للاخر عشان ارسى على بر

رجعت تانى لاول محل

قلتلة المفرش بكام اخرك؟؟ المفرش اللى عاجبنى خلوا بالكم

قالوا ب 600

قلتلة 600 اية؟؟ دة احنا شفنا الصف كلة محدش قال اعلى من 550.. قالى لا اخرة 600 المهم الخامة قلتلة لا بقى انا مش مهم عندى الخامة فى مفرش السرير.. المهم شكلة.. دة هيتحط يوم واحد و هيتشال.. حتى مش هنلحق نحط ايدينا علية عشان نشوف خامتة..بردة مرضيش ينزل و بيحاول يحلية فى عينى بقى و الخامة و مش الخامة..

قلتلة طب اخرك فى الكوفرتة اية؟ قالى 350 بردة .. طبعا مرضيش ينزل لما لقى انى رجعتلة تانى و عايزة نفس الكوفرتة

سبتة و مشيت

و رحت المحل اللى جنبة و قلتلة عايزة كوفرتة تايجر عليها وش النمر كدة.. زى اللى موجودة فى المحل اللى جنبك قالى لا اللى فى المحل اللى جنبى دية للعرض فقط..

رحت رايحة المحل الاولانى قلتلة هى للعرض بس.. قالى اة اصل هى لسة جاية امبارح و انا حتى مكنتش ناوى ابيعها بس عشان خاطرك هتبقى ب 300 مش 350 و دة اخرى

حسيت كدة ان المحليين دول اللى جنب بعض تبع بعض اصلا و الراجل اللى فى المحل التانى قالى على الكوفرتة انها للعرض بس عشان يخلينى احس انها حاجة لقطة يعنى

سبتة و مشيت لتالت مرة و لفيت على المحلات كلها و سألت على مفرش السرير اللى عاجبنى و ركزت فى السعر بقى

لقيت ان محدش راضى ينزل اكتر من 550 فعرفت ان دة اخرهم

لحد ما وصلت بقى للمحل الاخير اللى كان قصاد المحل الاولانى ابو كوفرتة ب 360

لان المحلات قصاد بعض و انا فضلت ماشية على نفس الصف و حودت مع المحلات للصف التانى اللى كان قصاد المحل الاولانى

لقيتة عارض المفرش حاولت انزل معاة قالى اخر ب 550 قلتلة خلاص هاخدة

و بعدين قلتلة طب عندك بقى الكوافرتة اللى على وش نمر

قالى اة عندى.. قلتلة بكام قالى ب 230هههههههههههههههههه
قلتلة وريهانى

قالى طب تعالى معايا انا عندى نوعين.. رحت معاة طلعت برة المحل خالص و مشيت معاة نفس الصف لحد الاخر فى محل تانى خالص و جبهالى من الدور الفوقانى اللى تقريبا يبقى مخزن

راح موريهانى.. لقيتها نفس الاولانية طبعا انا زقططت

وورانى واحدة تانية جايبة جسم النمر كلة مع نقط التايجر فى باقى الكوفرتة

يعنى جسم النمر فى النص و باقى الكوافرتة ذهبى *اسود

عجبتنى اكتر من الاولانية بصراحة و كانت ب 230

حاولنا ننزل مرضيش و قالى و الله العظيم دة سعرها و مش قادر انزل فيها خالص

جبتها بردة من عندة

و حسيت انى راضية عن نفسى بصراحة و كبست الراجل التانى
اللى كان عايزنى اخد نفس المفرش ب 600 و نفس الكوافرتة ب 300

ابن اللذينة

مش عارفة بقى اسعار البطانيات و الملايات اية لانى مسألتش غير على البطانية التايجر الاولانية خالص الدبل فيس و كانت ب 400

بس اكيد سعرها اقل من كدة بكتير لان واضح ان الراجل الاولانى دة كان غلس و فاكر انة يقدر يضحك عليا

يا رب اكون جبتهم بسعر كويس فى الاخر و متضحكش عليا اوى برضة

و الحمد لله.. و يا رب يكرمنى و يوفقنى

اسيبكم بقى مع الصور كالعادة

هصورلكم المفرش بس هصور بس الورقة اللى متعلقة اللى مبينة شكلة

و هصورلكم الخددية بتاعة الكوفرتة

بس قبل اى حاجة سموا كدة و قولوا ما شاء الله الله اكبر

و طبعا الدعوة متنسوش

ان ربنا يوفقنى انا و خطيبى و يجمعنا مع بعض فى الحلال و على خير فى اقرب وقت ان شاء الله و ان ربنا ييسرلنا امورنا

على فكرة يا بنات المفرش دة انا كنت شفتة فى الغورية لما رحتها يوم الجمعة بس مش عارفة سعرها هناك كام

يا رب اكون افدتكم

مدام راغب مدام راغب 538876_1.gif فتكات ست الكل Fatakat 538876 كل المدن – مصر

سبحان الله و بحمده