باختصار يا بنات احنا مجموعة مع بعض عملنا قبل كده تجمعات للرشاقة والحمد لله نجحت وفى مننا ناس وصلت لوزن كويس انا واحدة منهم كنت 107 وصلت ل88
واصحابى قالوا نعمل تجمع جديد وندخل معانا ناس جديدة ونكمل لحد ما نخلص علشان ننعش التحدى جوانا فاى عضوة عاوزة تدخل معانا تشجعنا ونشجعها تتفضل تنورنا على فكرة يا بنات مش شرط انى ارد بنفسى على اى سؤال او استفسار اى بنت من اصحابى احسن منى بردوا وتعرف اللى بعرفه لاننا اتناقشنا كتير ومن زمان فى موضوع الرجيمات فاى عضوة لها استفسار وعاوزة تسال واى صديقة او حتى عضوة جديدة ترد عليها فعادى كلنا نفيد ونستفيد من بعض بس اللى اثق فيهم من معرفتى الشخصية بهم
رولا ورشا وشعاع نور وكادية وهالة وعبير اسالوهم او اسالونى واحنا اكيد هنسالكم بردوا واللى تعرف حاجة ياريت متبخلش علينا بها
اللى يميزنا عن اى جروب تانى ايه؟
1- بنهتم بالجانب النفسى جدا وبنحاول نعرف سبب عدم القدرة على الرجيم وبنقويها
2- اننا معندناش حد بيخرف وكلنا بقينا فاهمين تكتنيك اى علاج او رجيم او حتى تمرين رياضى ولا احسن دكتور من الممارسة العمليه طبعا
3- بنتكلم فى مواضيع تانية تخص الحياه الزوجية وكيف تهتمى بنفسك وتستغلى الوقت صح وتنسى الاكل
4-الحمد لله الجروب كله بنات مثقفة وتعليم عالى ومتفهمين وملهمش فى الخرافات خالص عقول هتعجبك وتريحك وشخصيات متنوعة بين الطفولة والرومانسية والجدية والثقافة وبنحب بعض اوى الحمد لله وربنا يديمها علينا نعمة
شروط المسابقة
1- كتابة اليوميات بصفة يومية
2-لعب الرياضة يوميا ولو ربع ساعة
3-ذكر الوزن اسبوعيا و كمان المقاسات خصوصا للى هتلعب رياضة كتير لان ممكن تربى عضلات ووزنك يزيد عضلات ومقاساتك تقل علشان تتفهمى طبيعة الرجيم بلاش تخلى الميزان مرايتك متنسيش مقاساتك كمان اكتر عضوة خست هتبقى مسئولة عننا لمدة اسبوع ولها شعار الرابحة الاكبر
4- عدم ذكر اى يوميات تحبط من همة الاخرين وعدم ذكر اى طعام من شانه اخراب الرجيم
5- اليوم المفتوح عند الحاجة او الاحساس على عدم القدرة على التواصل فى الرجيم او ثبات الوزن فقط وليس اسبوعيا يوم مفتوح فى الاسبوع بيرجع كل اللى نزليته فى الاسبوع عن تجاربنا جميعا صدقونى
ياريت يا بنات تلتزموا معانا بالشروط علشان دى مصلحتكم قبل ما تكون تشجيع لنا ولكم وربنا يقوينا جميعا ونوصل لاهدافنا وافتكروا انكم متخنتوش فى يوم وليلة فياريت ميجيش فى النص حد يياس مش مفروض هتخسى كل يوم كيلو لان اكيد انتى متخنتيش كل يوم كيلو فبلاش الياس فى نص الطريق لو سمحتم وربنا يقويكم
اى اخت عاوزة تشترك معانا ياريت تسجل اسمها ووزنها فى اول مشاركة لها وتكتب يومياتها فورا حتى لو النهاردة كلتى شىء غلط ابدئى يا ستى من اول ما شفتينا وبلاش كل يوم تقولى بكرة قومى العبى رياضة هتشتتى الاحساس بالجوع مش كل احساس بالجوع بيكون حقيقى احيانا عطش واوقات نفسى
مع تحياتى نوجا…
نوجاا نوجاا 157086_20.gif سوبر فتكات Fatakat 157086 الجيزة _ فيصل – مصر