المشاركة الأصلية كتبت بواسطة ***ضي القمر*** 
بصوا يابنات كلنا عارفين الي بيخس بسرعة بيرجع يتخن الي خسوا بسرعة برضه فبلاش طبعا الريجمات الكميائية لانها كمان مضرة ودلوقي عايزة اعرف كل واحدة هتمشي علي ريجيم معين هتعرفهولنا ولا هنتفق علي ريجيم ننزل فية من 1 او 2 كيلو فالاسبوع بصوا يا جاعه أنا صحيح مش معاكوا فى الجروب لأنى إنضميت متأخر بس من خبرتى مع الدايت اللى بتخس بسرعه فعلاً بتتخن بسرعه .. أنا مثلاً هدفى كيلو واحد فى الأسبوع ، أيون كيلو واحد بس معناها إنك ممكن تخسى من 8-10 كيلو فى شهرين يعنى مقاسك ينزل درجتين فى شهرين بس وده إنجااااااز رااااائع
من غير رغى كتير ، أنا وزنى دلوقتى 81 ك ومحتاجه أوصل لوزن 73 ك (بعد كده بيبقى شكلى وحش قوى ) ، يعنى إن شاء الله 8 كيلو وناويت والنيه لله إنى فى عيد ميلادى فى شهر 4 أكون وصلت للوزن ده
ودى إن شاء الله قواعد الريجيم بتاعى ياريت تنفعكوا وتطبقوها والله مش هتحتاجى تروحى لدكتور دايت :
– الأكل :
الفطار : مفتوح بس بدون مبالغه لأنه أهم وجبه فى اليوم وعلشان ما تاكليش كتير بعد كده
الغدا : خضار + بروتين+ نشويات (النسبه الأكبر للخضار واللى بعدها للبروتين ثم النشويات وقليل جداً من الدهون)
العشاء : قبل النوم ب 3 أو 4 ساعات وغالباً إما علبة زبادى أو حبتين فاكهه أو ساعات بعمل مج كاكاو باللبن المنزوع الدسم – أنا بشربه من غير سكر بس ممكن تحليه بسكر دايت وده بيشبع أوى ويدفى و مفيد جداً
– ممنوع تماماً :
المقلى ، المخلل ،الحلويات مثل الكيك والجاتوه والبسكوت والحلويات الشرقيه اللى بتدمر شكلنا دى ، دهون الفراخ واللحمه ، اللب والسودانى
– يسمح ب :
قليل من المكسرات الغير محمصه يومياً خصوصاً اللوز والفستق ، الفاكهه بكل أنواعها (حتى الموز أو البلح المهم تاكلى كميات معقوله) ، يوم فرى أو يوم تاكلى فيه اللى نفسك فيه لإن ده مهم قوى لعملية حرق الدهون
– شرب 8 – 10 أكواب من المياه يومياً ، شرب الكثير من الأعشاب خصوصاً القرفه التى تساعد على حرق الدهون وذلك للشعور بالدفئ والإمتلاء
– المشى مرتين أسبوعياً لمدة نص ساعه (مش بقولك كل يوم بس المرتين دول هيفرقوا قوى فى الوزن وتوزيع الدهون والحاله المزاجيه)
– الإستعانه بالله وتجديد النيه إن إحنا بنعمل كده علشان صحتنا وعلشان لبسنا ما يكونش ضيق علينا وعلشان أزواجنا وعددى النيه بقى زى ما تحبى
محتاجه قوى أفكاركم أو تعليقاتكم .. بأمر الله أنا هبتدى بكره رغم إنى منتظره الدورة الشهريه وعامله زى المفجوعه بس بجد حاسه إن النظام ده بسيط وفيه دلع وحاسه إنى لو قدرت أبدأ دلوقتى يبقى بأمر الله هقدر أكمل
Trendy Trendy فتكات متميزة Fatakat 799321 تونس – تونس