السلام عليكم يا فتوكات يا حلوين
بصوا بقى انا بقالى كام يوم عماله اقراء عن الحمل و الولاده و كانت عندى اسئله كتير اوى بالرغم من انى مش اول مره احمل بس احنا دايما بننسى اللى بيحصل
و عشان تستفيدوا معايا هحطلكم شويه الاسئله اللى كانت محيرانى و لاقيت اجابتها
1- امتى اعرف انى حامل و ازاى اتاكد ؟؟
لما الدوره تتاخر ان شالله يوم ممكن تقدرى تعرفى طيب ازاى ؟؟؟
لو اتاخرت يوم روحى اعملى تحليل الدم الرقمى طيب امتى اعمل تحليل البيت ؟؟
التحليل المنزلى اللى بيتباع فى الصيدليه بتعمليه بعد 4 ايام من تاخر الدوره عشان يكون سليم و لازم يتعمل و انتى لسه صاحيه من النوم ده مهم جدا عشان يكون نسبه الهرمون عاليه فى البول
المعتقد الخاطئ : اننا ممكن نعمل تحليل دم قبل معاد الدوره ما تيجى و نعرف اننا حامل لالالالالا ده كلام غلط لان ممكن يطلع مافيش و انتى حامل لازم تستنى معاد الدوره افضل
عرفتى مبروووووووووووك انتى حامل ( ربنا يرزق كل مشتاق قولوا اميييييييين )
2- اعمل ايه بقى و انا فى الكام دلوقتى و الدكتور هيدينى ايه و يعمل ايه ؟؟
اول حاجه هيسالك عليها الدكتور اول يوم فى اخر دوره كان امتى لازم تكونى فاكره عشان من خلاله هيديكى معاد مبدئى للولاده ان شاء الله
و بعدين هيوزنك لان الوزن مهم جدا جدا فى الحمل ماينفعش نكون تخان و نقول عشان احنا حامل و بناكل لاتنين ده كلام مش صحيح لازم يكون وزنك مش عالى عشان كل ده حمل على رجلك و مشكله وقت الولاده و برضه مش معنى كده اننا نعمل رجيم لالالا الاكل الصحى مهم جدا و انسى بقى الرز و المكرونه و البطاطس و العيش الفينو
و هيقيس ضغطك لانه مهم فى الحمل جدا و لازم تكونى رايحه و عامله صوره دم كامله و تحليل سكر عشان الدكتور يطمن برضه
و انتى كده بتكونى داخله فى الشهر التانى
3- طيب الدكتور هيعمل سونار من اول شهر كده ؟؟؟
اه مافيش مشكله
4- اروح للدكتور كل اد ايه ؟؟؟
الحاله الاقتصاديه و الماديه حاليا مش زى الاول و الدكتور طبعا عايزك عنده لو كل اسبوع مش هيقول لا ,,, لكن توفير للمصاريف ممكن تروحى كل شهر عادى طالما ان حملك كويس
5- ايه اعراض اول 3 شهور ؟؟؟
طبعا انتى روحتى بعد الشهر الاول ادى كده يا ستى شهر عدى من التلاته طيب الباقى ؟؟
هتحسى بدوخه و ممكن يحصل ترجيع و فى حمل مش بيحصل فيه و ممكن يحصل ترجيع الصبح بس طيب ازاى اعالج الترجيع ؟؟الدكتور هيديكى دوا للضروره اوعى تخديه اول ما تحسى بالترجيع عشان الادويه الكتير مش حلو و خصوصا اول 3 شهور اول ما تصحى من النوم خالى جنبك بقسماط كلى واحده اول ما تقومى من النوم دى هتقلل عندك الشعور بالترجيع الصباحى و ممكن فنجان جنزبيل باللبن لباقى اليوم بعد كده
و ايه تانى ممكن احس بيه ؟؟
هتلاقى عندك افرازات كتير ده عادى على فكره مافيش مشكله فيه بس اهم حاجه لو لونها على بنى روحى للدكتور عشان هيكتبلك مثبت للحمل و ماتقلقيش ده طبيعى مش هياذى البيبى ,,, و هتحسى شويه بمغص زى الدوره بس مش هيكون جامد يعنى ده برضه عادى طالما مافيش دم
6- العلاقه الزوجيه اعمل فيها ايه؟؟
ستات كتير بتخاف على البيبى و اصلا مش بيكون ليها نفس لحاجه بس خالى بالك جوزك ليه حق عليكى و ماتخفيش على البيبى ربنا حاميه فى كيس و بالنسبه للعلاقه يا ريت تكون اول 3 شهور براحه و بهدؤ و ماتكونش كتير و بعد كده براحتك بس لو هتولدى طبيعى و الامور عندك كويسه كترى من العلاقه دى لانها بتساعد على الولاده الطبيعى جدا
و لو حسيتى بتعب منها فى اى وقت لازم تروحى للدكتور
7- المفيد و المضر و الافكار الغلط ؟؟؟
حاولى تقعدى وقت فليل على النت لان الاشعه بتاعت الكمبيوتر و اللاب كل ده خطر على البيبى فى اول فتره من الحمل
و مش بالاكل الكتير البيبى هيكون كويس لالالا بالاكل الصحى و الخضار و الفاكهه و اللبن الكتير
بلاش تكترى من اللبن الرايب فى الحمل عشان فيه نسبه املاح هيرفع عندك الضغط و هيحبس الميه فى الجسم فبلاش منه كتير خليه فى المعقول و اللبن الحليب صحى عنه طبعا و الاصح كمان الزبادى لانه بيفيد المعده و الامعاء و بيقلل من الامساك اللى بيجى فى الحمل
الموبايل قللى منه كمان و حاولى تقتصرى فى مكالماتك
ابعدى عن النشويات لانها مش مفيده و مالهاش اى لازمه
لازم اول 3 شهور تاخدى حمض الفوليك لانه بيقلل من تشوهات البيبى و مهم جدا للجهاز العصبى و بعد التالت بتبدا الفيتامينات و الكالسيوم و لازم تتابعى نسبه الهموجلبين فى الدم عشان ده مهم و كترى من الجرير و الكبده
و خالى بالك لو بيجيلك تشنجات عضليه فى رجلك و بطنك كترى من الموز لانه فيه نسبه عاليه من البوتاسيوم اللى بيقلل التشنجات دى
و يا رب ماكونش نسيت اى سؤال و يا رب نقوم كلنا بالسلامه و يرزق كل مشتاق
فراشة حائرة فراشة حائرة images/avatars/pacifier.jpg فتكات هايلة Fatakat 159373 القاهرة – مصر