ازيكم يا فتوكات
انا النهاردة مبسوطة جدا عشان اول مرة اعمل صنف من اوله لآخره
هو مش صنف اوي بس انا شخصيا مكنش في دماغي قبل كدا لحد ما جربته عند واحدة صاحبتي بعدين دخلت عليه شوية تعديلات و عملته النهاردة و طلع ظريف جدا و كمان سريع فحبيت اشاركم بتجربتي
للاسف انا ملحقتش اصور بس هحاول اشرح علي اد ما اقدر
لعمل صينية مربعة :
المقادير:
رول جولاش ( انا استخدمت الزهار او اي نوع متعودة تستخدميه )
1/8 جبنة رومي مبشور
2 مثلث جبنة نستو
1 مربع جبنة كيري
1 اصبع هوت دوج ( انا استخدمت امريكانا )
1 ثمرة طماطم
1/2 بصلة صغيرة
2 ثمرة فلفل الوان صغيرة ( انا مستخدمتش الاثنين كلهم اتبقي منهم حتة
زيتون اسود أو أخضر ( حسب الرغبة ) انا استخدمت اسود بحبه اكتر
كوب لبن
بيضة
ملح + فلفل + قرفة
سمن او زبدة
الطريقة :
سهلة جدا بتقطعي الطماطم و الفلفل قطع صغيرة و تطحني البصلة في الكبة او تقطعيها بس المهم تبقي ناعمة جدا
و تقطعي الهوت دوج شرائح رفيعة و تخلطي كل المكونات دي مع الجبنة و الزيتون في إناء بس من غير ما الجبنة تعجن منك و تطلع في ايدك طبعا
و بعدين تجيبي السمن و تسيحيه ع النار و تجيبي صينية مربعة منخفضة الحافة
و تدهني الصنية سمن بالفرشاة و بعدين تبدأي تفرشي الجلاش طبقة طبقة و كل طبقة تدهني سمن تاني لحد ما تخلصي نص الكمية
بعدين تحطي الحشو الي احنا محضرينه من قبل كدا بالتساوي و لو حسيتي انك محتاجة تزودي او في حتت فاضية زودي
و بعدين تكملي فرد طبقات الجلاش لحط ما تخلصي باقي الكمية
بعد كدا هتقطعيها قطع طبعا تختاري الحجم حسب ما انت عاوزة
و تجيبي كوباية اللبن و تحطي معلقة صغيرة ملح و فلفل و قرفة بس متكونش مليانة اوي و ياريت تدوقي اللبن عشان تتأكدي من الحدق بتاعها
اكسري البيضة في كوباية اللبن و قلبي كويس
وزعي محتويات كوب اللبن جيدا علي الصينية و اتركيها قليلا لتشرب اللبن و تكوني في الفترة دي ولعتي الفرن عشان يكون سخن و تدخليها الفرن
هتاخد 20 دقيقة تقريبا و بالهنا و الشفا
ملحوظات : يمكن التعديل في المكونات حسب رغبتك و اضافة او حذف اي شىء و يمكن الاستغناء عن الجبنة النستو و الكيري دول انا الي ضفتهم عشان كانوا موجودين عندي و انا بحب الجبنة
يمكن استبدال الفلفل الملون بفلفل اخضر عادي مواضيع هذا القسم برعاية
:::Alice::: :::Alice::: 577688_2.gif فتكات هايلة Fatakat 577688 cairo – Egypt