السلام عليكم
ازيكم يافتوكاااتي يارب تكونوا بخير
جمعة مباركة عليكم يارب وعلي المسلمين جميعا
المهم بقالي كتير محطتش اي مواضيع في قسم المطبخ بالرغم اني عملت حاجات كتير بس الكسل
فقررت اشاركم بوصفة الجلاش دي ويارب تعجبكم وتجربوها
وهو جلاش بالجبنة الرومي بس مش اي جلاش
كل اللي هتحتاجيه
لفة جلاش
والحشوة اللي تحبيها
ولو هتعمليه بالجبنة الرومي يبقي هتحتاجي فلفل رومي مقطع وزيتون
و بيضة كوباية لبن ورشة ملح وفلفل اسود وروز ماري ولو بتحبي الجنزبيل رشة صغيرة هيبقي تحفة
والطريقة كالاتي
هتفردي 3 ورقات جلاش عشان مايقاش خفيف وانتي بتلفيه ويتقطع
وهتحطيه ع طرفة الحشوة وتدهني الجلاش قبل ما تلفيه بزيت عشان يستوي من جوا وتلفيه زي الاسطوانة كده وبعدين تلفيه حوالين نفسه كأنك هتعملي وردة
وترصيه في الصينية بتاعتك اللي هتدهنيها زيت برضو
لفة الجلاش انا عملت منها 6 قطع زي ماهتشوفوا في الصورة
وهتحطي بيضة ع كوباية اللبن والملح والفلفل والروز ماري وتقلبي وتحطيهم ع الصينية
و تكة اضافية بس بتدي طعم لا يعلي عليه هي رشة زيت زيت زيتون ع الوش قبل ما تدخلي الصينية الفرن
وسيبيه لحد ما يستوي وياخد لون وممكن تحطيه تحت الشواية ياخد لون من فوق وتطلعيه
طبعا شكله لوحده كفاااية
وحاولي تفصلي كل قطعة عن التانية بسكينة وقدميه كده
بجد يابنات تحفة و الواحدة اصلا كفاية بتشبع جدا
جربوه وغيروا من الطريقة العادية وقولولي رأيكم
لو عجبك الموضوع يافتوكة ماتنسينيش بدعوة حلوة وخدي التقييم في ايدك بقي
في أمان الله مواضيع هذا القسم برعاية
MOoOony MOoOony 1075995_1.gif فتكات رائعة Fatakat 1075995 Cairo – Egypt