السلام عليكم و رحمة الله و بركاته
كل سنة و انتم طيبيين يا بنات
الموضوع ان انا نفسى نعمل جروب اللبنات فوق المائة كيلو
علشان نشجع بعض ننزل و نكتب كل اسبوع اوزانا و عملنا ايه
و انا هساعدكو من خلال زياراتى لدكتور التغذية دكتور هانى أبو النجا
فى الاول انا هتكلم عن تجربتى و ليه دكتور هانى بالتحديد
و يا ريت كل بنت تدخل تتكلم برضو عن تجربتها علشان لو فى فرصة اسال لها الدكتور عن حاجة
اسمحولى هطول عليكو شوية
انا عندى مشكلة فظيعة و هى السمنة أنا الان وزنى 117 كيلو يعنى محتاجة اتفجر بقنبلة
بس انا اساسا شخصية مقرفة جداااااااا فى الاكل بمعنى انا فى حاجات كتير اساسا مش باكلها مثال
كل انواع الطيور و اللحوم البيضاء
اللحم الاحمر لا اكل منه الا الكفتة فقط
البيض
اللبن
اللحوم المدخنة مثل اللانشون و الباسطرما
مش باحب الارز و المكورنة بمعنى انى باكلهم بس قليل و مش بنهم
اكلى اساسا معظمه خضار و فاكهة
اول سؤال هيخطر فى بالكم يا ترى انا بادخن ازاى ده انا موفرة جدااااااا ههههههههه
انا باعشق الحلويات
بس برضو اكيد ده مش كل حاجة
بصو بقى انا من زماااااااااااان و انا طفلة و انا كنت كلبوظة
و كنت كل ما اروح لدكتور يقولى على رجيم يعتمد على الخضار و الفاكهة و الكيماوى و الحاجات اللى كلكم عارفينها دى
اقعد اقنع فى الدكتور ان انا كده مش هاخس لان الرجيمات دى مش بتأثر فى تركيبة جسمى خااااااااااالص لان مش فى تغيير فى اكلى الطبيعى
فبعد محاولات مع دكاترة كتيييييييير جداااااااا قررت ان الدكاترة دول حوار فاكس و عندهم شوية ورق بيدوه لكل المرضى
و بعدها كل ما احب اخس العب رياضة
كانت بتجيب نتيجة حلوة جدااا
و كان احسن شئ فى الرياضة هو المشى بسرعة متوسطة تقريبا 5 كمتر/س
انا من سنة و نص كان وزنى 85 كجم و كنت حامل
بعد الولادة مش كان فى لبن للبيبى فاهلى هرونى حلاوة طحينية و عصاير و عسل اسود
تخنونى بالعافية و فى الاخر ابنى مش رضع طبيعى بردو
مع بداية رمضان اخدت قرار انا اظبط اكل شوية و بلاش حلاويات و امشى كل يوم من البيت للشغل و دى مسافة 6 كمتر
عملت كده فعلا و بعد 3 ايام هالكة فى الحر كان فى مفجأة مش لطيفة
انا مش وزنى ثابت
و لا خسيت
انا تخنت 3 كيلو
فعرفت ان كده اكيييييييييد فى مشكلة فى حاجة غلط
فقررت ادور على برنامج الرابح الاكبر و اشوف الناس اللى كان اوزانهم فوق ال 100 كيلو و ال 200 كيلو كانو بيعملو ايه؟؟
فاخدت بالى ان فى مدرب معاهم مصرى اسمه دكتور هانى ابو النجا
فدورت على تليفونه و اتصلت بيه و حجزت و كان امبارح اول لقاء
ثانيا احب اعرفكم بقى باللى قاله دكتور هانىى فى اول لقاء
1- قالى اتكلمى عن حالتك فقلت له الكلام اللى انا حكيته لكم الان
2- سالنى هل فى حد فى العيلة مريض سكر فقلت له ماما
3- سالنى هل فى العيلة مريض قلب فقلت له لأ فرد عليا و قالى اصبرى الاول اعرفى ما هى امراض القلب ووضح لى ان حتى الضغط مرض قلب
فغيرت اجابتى و قلت له اه والدتى عندها ضغط
4- سالنى عن بابا الله يرحمه قلت له لأ ده تمام الله يرحمه كان بكامل صحته لحد قبل الوفاة بسنتين جاله سرطان فسالنى بتركيز شديد عن نوع السرطان فقلت له سرطان فى الحنجرة و الغدة الدرقية بسبب السجاير
5- وضح لى ان طالما فى حد من الاسرة جاله سكر او مرض قلب او سرطان فهو جين ممكن يجى لشخص اخر من الاسرة و لكن يمكن تجنب هذا بالاكل الصحى و الطب الوقائى و علشان كده طلب منى شوية تحاليل لسه هاعملها باذن ربنا
6- بدأ يوضح لى ان فى انواع كتييييييييير من الرجيمات الخاطئة فى النت و الدكاترة فى التليفزون و ان استحالة رجيم يناسب كل الناس فى نفس الوقت
7- المادة اللى بتخنى انا ممكن مش تتخن اختى و العكس و ده طبعا بشكل نسبى
مثال السكريات ممكن جسمى مش بيحرقها و لكن جسم اختى او صاحبتى يكون بيحرقها بمعدل افضل و كذلك الدهون و هكذا
8-مافيش حاجة اسمها اكل بتحرق الدهون مثال الاناناس مثلا و قالى يبقى كل واحد تخين نقعده فى غيط انانا بعد شهر يبقى وزنه مثالى؟؟
9- من كل اللى فات احنا هنبحث عن منظومة جسمى مع بعض بيتخن من ايه مش بيتخن من ايه؟؟ و بقدر الامكان مش هتحرم من الحلويات اللى انا باحبها
و الهدف ان بعد ما اخس باذن ربنا ابقى خلاص عرفت ايه اللى بيتسبب فى تخنى و اتجنبه علشان مش ارجع اتخن تانى زيى كل مرة
10- تنظيم مواعيد الاكل مهم جدااااااااا لان ده هيقلل من الاحساس المفاجئ بالجوع اللى بيتسبب فى اننا ناكل اى حاجة تقابلنا او تيك اواى لو احنا فى الشارع
11- الاهداف اللى عاوزيين نوصلها (نحسن صحتنا – نتقى شر امراض ممكن نكون معرضين ليها بسبب الوراثة – يبقى شكلنا حلو – نقلل حجم معدتنا لان حجمها الكبير بيضغط على القولون و بيسبب قولون عصبى و مشاكل فى الشرج)
12- المجموعات الغذائية اللطعام
* الشوربة و تنقسم الى ثلاثة انواع
شوربة صافية و هى عبارة عن (شوربة لحمة – شوربة فراخ – شوربة سمك – شوربة عدس – شوربة خضار)
شوربة بروتين (شوربة سمك بها قطع سمك – شوربة لحمة او فراخ و بها قطع لحوم)
شوربة نشويات (شوربة لسان العصفور)
* البروتين حيوانى او نباتى
حيوانى مثل اللحوم و الاسماك و الطيور و البيض و اللبن و منتجات الالبان
نباتى مثال الفول و العدس و البقوليات
* الخضروات بانواعها
* الفاكهة
* النشويات و تشمل العيش و المكرونة و الارز و توابعهم
ملحوظة:
فى حالة تناول شوربة بروتين او شوربة نشويات يجب ان نلغى البروتين او النشويات من الوجبة بمعنى ان شوربة البروتين فيها قطع لحم = شوربة + لحم اذن لا يجب تناول لحم بشكل منفصل
كذلك شوربة لسان عصفور = شوربة + نشويات اذن يجب ان نلغنى بند النشويات من الوجبة مثل العيش او الارز او المكرونة و هكذا
13- النظام الغذائى الخاص برمضان و ده مؤقتا حتى تظهر نتيجة التحاليل
الافطار الساعة 7 مساء
ماج شوربة
10 ملاعق خضار
150 جرام بروتين (لحمة – سمك – تونة – بيضة) اى بروتين تحبيه او تختاريه
4 ملاعق ارز او مكرونة او ربع رغيف عيش
وجبة السحور الساعة 10 او 11 مساء
* زبادى او اى لبن او منتجاته + فاكهة
* 4 معالق فول + ربع رغيف عيش (سحور بديل)
كده يا بنات انا خلصت ادعولى بقى و يا ريت اللى عندها نية جادة تبدأ معايا تقول
engmpower engmpower 274884_3.gif فتكات نشيطة Fatakat 274884 cairo – egypt