أحلى مسا على أحلى بنات
موضوعنا النهاردة من بره يبان إنه اتهرس في 300 فيلم عربي قبل كده هههههه .. بس النهاردة أنا هقولكم على تكاية هتعجبكم قوي إن شاء الله خصوصا اللي بتحب تعمل حمام مغربي بس بتزهق وبتتعب من فترة القعاد في البخار أو تحت المية السخنة أو وقتها مش مساعدها عشان العيال وكل الكلام اللي أنتم عارفينه ده. و الاحلى من ده إنها هتضمنلك إنه الجلد الميت هيطلع فعلا كل مرة هتعملي الحمام
بطلتنا النهاردة هي الصابونة العبقرية, صابونة الغار … سلام مربع يا جدع
كل المطلوب منك إنك تخشي الحمام تنزلي مية سخنة على جسمك لمدة دقيقتين و تغسلي جسمك بالصابونة وتشطفيها كويس
وبعدين هترجعي تغسلي جسمك تاااني بالصابونة بس المرة دي هتقعدي بيها دقيقتين تانيين
و ترجعي تشطفي جسمك كويس جدا من الصابون وتجيبي الليفة بتاعتك وابتدي على بركة الله
هتشوفي إزاي الجلد الميت هيبتدي ينزل من أول فركتين بكل سهولة إن شاء الله
خلصي جسمك بقى كله يا ست البنات في ربع ساعة أو نص ساعة لو بطيئة إن شاء الله وأشطفي جسمك بمية بارده وادهني زيت اطفال
أو لو حابة تعملي ماسك طمي بعد الحمام المغربي, براحتك بقى.
مانتي عملتي أهم خطوة اللي هي فرك الجلد الميت.
والله يا بنات قسم أحاسب عليه .. بقيت بعمل الحمام في نص ساعة بالضبط لما بأبقى مستعجلة! وبكرره كل اسبوعين.
عشان أنا كمان عندي ابني ربنا يخليه عنده سنة ومش معترف باختراع النوم فـعلى طول بيصول ويجول في الشقة ولازم يعمل مصايب طبعا
أنا عارفة إنه فيه بنات كتير من انصار الصابون المغربي هتطلع تدافع عنه دلوقتي هههههههههه بس والله يا بنات أنا بنقلكم تجربتي بكل أمانة و حبيت أساعد بنات تانية أكيد عندها مشكلة الوقت اللي بيضيع تحت بخار أو المية السخنة. خصوصا إني مجربة الصابون المغربي طبعا والأصْلي كمان
حان وقت السؤال اللولبي!!
اجيييب الصابوونة منييييين؟؟؟؟؟
أنا بصراحة اللي جربتها هي صابونة الغار بتاعت نفرتاري هتلاقيه في كارفور .. تهمة كبيرة كده ب 30 جنيه بتقعد معايا كتييير عشان بقطعها صغير وكل شوية أطَلع حتة منها. ومجربتش غيرهـا والله عشان أنا عارفة واحدة هتسألني على الصابونة اللي جبتها من عبدالحميد العطار اللي تحت بيتهم ههههههههه
لو عجبك الموضوع متنسيش التقيم بقى ودعوة حلوة كده ربنا يخليلي بابتي ومامتي ويهديلي جوزي وابني
بحبكم مواضيع هذا القسم برعاية
nunee nunee فتكات رائعة Fatakat 286393 الجيزة – مصر