اذيكم حبايبي انا لان لاقيت في موضوعي اللي فات بعض الاخوات بيطلبوا النصيحه بنج كلي ولا نصفي حبيت ادخل افيدكم زي دايما ما بتطمنوني
انا ولدت يوم الخميس وكنت طلبت من الدكتور بنج كلي لما سمعت عن مشاكل البنج النصفي وكده بس يما دخلت غرفه العمليات ربنا بعتلي دكتوره ربنا يباركلها في صحتها وولادها لما لاقتني رافضه البنج النصفي قعدت معايا اكتر من نص ساعه تقنعني بالفرق بين الكلي والنصفي والمزايا والعيوب وهيه كالاتي عشان الكل يستفيد :
البنج الكلي اه صحيح هاخده من اول العمليه ومش هاحس بحاجه خالص لحد ما ابتدي افوق لكن انا كنت مرعوبه من لحظه الافاقه بعد العمليه لان البنج الكلي بياثر علي الجسم ككل ودي انا شوفته في ولاده اختي الاولي
البنج النصفي بقي بكون فايقه طول العمليه والله ربنا يباركلها الدكتوره بتاعه التخددير كانت معايا هاديه جدا ومحستش بالحقنه خالص وابتديت احس ان رجلي بتنمل واتخدرت علي الاخر
طبعا اثناء العمليه بيكون في ستاره بيني وبين نصي التحتاني عشان مش اشوف العمليه ابتدت امتي وكده وفعلا انا محستش ان الدكتور ابتدي غير لما سمعت صرخه البيبي ربنا يخليه ليه
والله يا جماعه انا كنت مرعوبه من البنج النصفي لكن بعد ما جربت انا برشحه بكل قوه
1: هاتشوفي البيبي لحظه ولادته ربنا يفرح قلب كل ام وكل مشتاق يارب
2:هتطلعي من العمليات فايقه جدا ومبسوطه لان الحمد لله ربنا عداها علي خير وهتطلعي غرفتك وانتي فايقه وهتقعدي حوالي ساعتين او3 ساعات واول لما البنج يبتدي يطلع تطلبي المسكن وفعلا دي اللي حصل معايا
وكانت النتيجه اني كنت فايقه الحمد لله وطلعت غرفتي عادي جدا ولا بتوجع ولا حاسه بحاجه وعمالين نهززر علي البيبي لحد بقي ساعتين كده وابتدي التعب بس هو مفيش حاجه من غير تعب وكله يهون عشان خاطرهم
وكمان نصيحه انا اخدتها منكم ولما عملتها نفعتني جدا المشي ثم المشي ثم المشي ولدتي ببنج كلي او نصفي مش مهم المهم عليكي بالمشي والله الحمدد لله بيعجل بالشفاء وكان المشي عندي اسهل من القعده والنومه
انا لاني مش عايزه اتعب حد معايا ولان جوزي تعب وكان قلقان علي البيبي لانه مابيرضعش فربنا الحمد لله الهمني اني استخدم عصا المقشه اني اسند بيها واقوم نفسي كل شويه عشان اتحرك وفي النهايه عليكي بالدعاء والاستغفار وادعي ربنا يرزقك بساعه سهله وربنا يقوم كل الحوامل علي خير ويرزق كل مشتاق يارب بالذريه الصالحه ان شاء الله
ياقوته ياقوته 153637_2.gif فتكات رائعة Fatakat 153637 الزقازيق – مصر