السلام عليكم ورحمة الله وبركاته
ازيكم يا اخواتي الحبيبات في منتدنا الحبيب فتكات
حبيت اكتبلكم تجربتي في استخدام خل التفاح للتخسيس وأحذركم من استخدامه عشان تخسوا بسرعة ..
جاتلي فترة وكنت عايزة اخس من 5-7 كيلو ودخلت مدونة الرشاقة هنا وانضميت لجروب جميل اوي بتاع الدكتورة مي وشجعنا بعض على الرجيم وكان كله تمام انا بقى عملت ايه كنت بخفف في الأكل وبلعب تمارين خفيفة كانت منزلاهها الدكتورة في الجروب بالإضافة اني كنت بكتر شرب الماء وكمان بشرب يوم المشروب السحري (شرايح ليمونه +نصف معلقة كمون +رع معلقة قرفة او اقل + بشر جنزبيل بمقدار نصف معلقة )
وكنت بضيف عليهم معلقة عسل ابيض واوقات من غير ، المقادير بمعلقة صغيرة ، قبل الغداء بثلث ساعة
واليوم التاني بشرب معلقة صغيرة خل التفاح على كوب ماء بعد الغذاء .
فهمتوني يوم المشروب السحري ويوم كوب الما المضاف عليه خل التفاح
خسيت فعلا وكنت بخس اول واحده في الجروب بس نزلت في المستوى العادي حوالي كيلو و700 جرام على ما افتكر في اسبوعين وتقريبا استمريت شهر في الرجيم والنظام ده
بعد يجي شهرين تقريبا حسيت بوجع في جمبي اليمين من تحت زي الزايدة كده ، المهم رحت عملت اشعات عادية وسونار واشعة صبغة طلع بقى ان عندي الكلية اليمين ساقطه عن مكانها الطبيعي لدرجة ان الحالب ملتوي وهو اللى عمل التعب ده
الكلية دي قى سبب سقوطها ان الدهون اللى بتشيل الكلية ساحت وذابت !!!!!!!!!!! وكنت اول مرة اعرف ان الكليتين مرفوعين بالدهون !!!!
لما الدكتور شاف الاشعات والتحاليل قالي انت كنت تخينة وعملتي رجيم وخسيتي ! قلتله ايوة بس ماكنتش تخينة اوي وكمان ماخستش غير 3 او4 كيلو تقريبا وفي وقت مناسب ، يعني ما خستش بسرعة !!
قالي مش مهم المهم انك خسيتي قلتله ايوة وخفت اقوله على المشروب السحري والخل عشان ما اتصدمش فيهم لاني كنت مؤمنه جداا بيهم ومتأكده ان مالهمش اضرار نهائيا وقربت كتير ان خل التفاح أمان جداا على المعدة مدامت ممتلئة !!!!
وبالصدفة كنت بحكي لصديقة ليه على اللى حصل معايا لاقيت وشها اتقلب وانا بحكي لها وفي الآخر قالتلي انا اعرف بقى واحد ماتت بسببه !!!!!!!! قلتلها ازاي؟؟؟
قالتلي كانت عايزة تخس بسرعة والدهون اللى تحت الكلية ساحة ودهون تحت الرئة ساحت ودهون كتير داخل الجسم نفسه ذابت وتقريبا كلنا مانعرفش عنها حاجة ولا نعرف انها ممكن تتأثر وتذوب هي كمان وتبقى خطر على حياتنا !
بالمناسبة الدكتورة مي كانت بتقولي حطيه مع الاكل احسن وماسمعتش الكلام لاني كنت زهقت منه من كام سنة وانا بحطه على السلطة…
وواحده تانية كانت معانا في الجروب كانت متابعه مع دكتورة تخسيس وكانت دايما بتنصحيني بلاش تشربيه وكان دايما ردي جاهز اني بشربه بعد الغدا يبقى مافيش منه أضرار!!!
الحمدلله على كل حال بس مش لازم يحصلنا حاجة عشان نتعلم صح ياريت ما تعملوش زيي وخلي بالكم حتى من الاعشاب العادية اللى في بيوتنا أكيد بيكون ليها مقادير معينة ومده لآخدها مش مع نفسنا كده نمشي بدماغنا …
معلش طولت عليكم بس حبيت انقل لكم تجربتي مع خل التفاح ومع الاعشاب عشان تاخدوا حذركم وربنا يعافينا ويعافيكم من الامراض والأوجاع
على فكرة كل واحدة فينا جسمها غير التانيه ، مش لازم اللى نفع معاكي وكان آمان معاكي ينفع معايا وآمان معايا يارب تكونوا استفدتم من حكايتي.
دمتم في حفظ الله
ممكن تستغفروا الله معايا
استغفر الله وأتوب إليه
استغفر الله وأتوب إليه استغفر الله وأتوب إليه
نور الإسلام14 نور الإسلام14 102838_2.gif فتكات رائعة Fatakat 102838 الكويت – الكويت