السلام عليكم ورحمة الله وبركاته ,
أخواتي العروسات … كتبت الموضوع ده عشان محدش يتخم في الغسالة دي زي وخاصة ان اي عروسة شاريه الأجهزة معمرة مش سنتين وتتغير
غسالة وايت بوينت الإيطالي عندي من أربع سنوات
كانت مميزة في اول سنتين وصوتها واطي جدا وهادية برغم ان فيه ناس تانية اشتكت ان صوتها عالي
بعد سنتين لقيتها مثلا مرة متعصرش كويس
كنت بطنش … واقول اهي مرة وخلاص
جت بعد 3 سنوات لقتها مشتغلتش خالص
جبت بتاع الضمان وقالي ان الكارت الاكتروني اللي مسؤل على الديجتال باظ وهيتكلف جديد 450
و المفاجأة الكبرى قالي ان ضمانها خلص طيب إزاي وهي ضمانها خمس سنوات
يقولي خمس سنوات ده على البودي والحلة
لكن سنة واحدة على الكارت اللي فيها
وللعلم قالي ان الكارت باظ بسبب الكهربا المتغيرة في بلدنا
المهم ان بتاع الصيانة كان راجل امين ومغيرش الكارت وصلحه ب 300 جنية تخيلوا في تالت سنة ليها
ونقطة مهمة جدا ان بتاع الصيانة قالي متشغليهاش مرتين ولا بعض لازم يكون فيه على الأقل 3 ساعات بينهم زي ما مكتوب في الكتالوج
عشان الكارت ميسخنش ويتحرق الفيوزات فيه
وعلى فكرة كل اللي غيره فيوزات مش اكتر
بعد سنة كمان فجأة وهي بتعصر لقيت الحلة وقعت
توقعت ان اما الصليبة اللي في الحلة اتكسرت او السوستة باظت
اتصلت بالضمان وجه وشافها
قالي ان الحلة اكسرت ومحتاجة حلة جديد بالف جنية
طبعا انا كنت هموت فيها يعني اجيب غسالة جديدة افضلي من الغسالة دي حتى لو هرميها
قلت له مش حضرتك بتقولوا ان الضمان خمس سنوات على الحلة
رجع قالي الحلة ضمانها 3 سنوات فقط ولا باين سنتين كمان
المهم هي محتاجة حلة ب الف جنية
وفعلا قررت اني هشرتي غسالة جديدة
بس ناس دلوني على راجل بيصلح كويس
وجه شافها وقالي ان فعلا الصليبة اللي مكسورة مش الحلة
لكن عشان فكها صعب جدا لأنها متبرشمة برشمة صعبة لأنها مستوردة فبتاع الصيانة عايز يغيرها كله ويريحوا نفسهم
الراجل اخدها وفضل يصلح فيها وأخد 300 جنية
يعني الغسالة تقريبا حتى الآن متصلحة ب 600
غير انها صدت من تحت ومن مكان فتح الباب صدت برضوا
دي الغسالة الايطالي اللي كنت جيباها ب 2750 وكانوا طايرين بيها ماما اصلا كانت راحة تجبلي زانوسي
لكن الراجل فضل يشكر فيها وحست انها هتجيب غسالة تفضل امد الدهر
وحتى الآن الاعلانات على ودنه عليها وضمانها 5 سنوات وكلام غريب جدا
عشان كدة قبل ما تجيبي اي جهاز لازم تشوفي قطع غيراه
حتى لو سعره حلو هاتي اللي في مصر احسن لأن قطع غيار المستوردة اغلى من الجهاز نفسه
وحتى الآن لو فكرت اجيب غسالة جديدة كمان كام سنة مش عارفة اجيب نوع ايه
لازم الاقي ناس بتشتكي من معظم الأنواع
يلا خير للأسف معدش فيه ضمير والمستوردين بيستوردوا اسوء حاجة ودرجات تالته ورابعة والمصنعين في مصر بيطلعوا الحاجة سيئة جدا
ربنا يرزقنا اننا نخلص في شغلنا لله
وربنا يوفق كل العرايس لأفضل اجهزة إن شاء الله
———————–
انا كنت عايزة ازود ان مشكلة الغسالة :
1 – ان قطع غيارها غالية
2 – ان الضمان مش امين وقايل 5 سنوات ويرجع لما تيجي تصلحي يقولك سنة على الكارت او 3 سنوات على الحلة
3 – ان مافيش اصلا شهادة ضمان زي اي شركة محترمة لأ ده الضمان على وصل التوصيل
وانا كنت بكلم عميلة في الشركة بسالها الضمان على الحلة كام قالتلي 5 سنوات قلت لها طيب انا حلتي باظت
رجعت وخرجت وقالتلي لأ معلشي 3 سنوات بس
طيب مش لسة قايلة خمسة
المهم لما شدت معاها جابتلي اللي اعلى منها
وقالتلي مش حضرتك معاك الشهادة وهي عارفةى كويس ان مافيش شهادة قلت لها مافيش والضمان على الوصل قالتلي إزاي لازم شهادة وحضرتك كدة مش مشغلة الضمان
المهم اي كلام عشان ميصلحوش الحلة
اتصلت ببتاع الصيانة اللي جالي قالي لأ طبعا احنا مش بندي شهادة والضمان على الوصل
المهم والنتيجة انهما كذابين
يمامة المسجد . يمامة المسجد . 163072_1.gif سوبر فتكات Fatakat 163072 المنصورة – مصر