السلام عليكم ورحمة الله انا حبيت اشاركم تجربتي في الحقن المجهري مع دكتور اشرف ابو علي و مركز المدينة علشان كل واحده بتفكر تروح الاماكن دي تاخد بالها و تفكر الف او مليوووون مره . في الاول انا اقسم بالله ان كل اللي حقوله حصل معايا فعلا و اني مش بالف حاجه من عندي
البداية كانت اني متزوجه من سنتين و محصلش حمل و روحت كشفت و طلعت الحمد لله كويسه و مفيش اي مشكله عندي الحمد لله بعد كده قولنا خلاص يبقى نشوف الحقن المجهري اعدت ادور كتير على احسن دكاترة و فعلا لاقيت اسماء ممتازة بس في النهاية ربنا شاء اني اروح لدكتور اشرف بالرغم اني قريت انه مادي بس قولت مش مشكله طالما هو شاطر و نسب النجاح عنده عاليه زي ما قريت
اول ما روحت كشفو عليا و دكاترة مبتسمه و كان كل همهم او بمعنى اصح همهم الوحيد انا عرفت الدكتور ده ازاي او زي ما قالو انتي عرفتينا منين فكنت بقولهم من النت و و قعدنا مع دكتورة مبتسمه و هاديه و بتضحك و بتسمع و ركزو اوي على بتسمع دي و قعدت تسالني انا و زوجي على المعلومات اللي بيحتاجولها و بعدها دخلنا للدكتور و قال بالنص كده بعد ازيكم تمام من المعلومات اللي معايا يبقى كده حقن مجهري فقولناله تمام و بدأت في العلاج و من هنا بدأت المعاناه
الاول اقنعوني تماما ان الحقن التحضيريه دي مش بتاخر البريود خالص و انها حتيجي في ميعادها مظبوط و اروحلهم تاني كمان اسبوع و حتكون البريود عندي تاني يوم علشان ابدأ في الجد المهم الاسبوع عدى و البريود مجتش زي ما قالو و قالو ايه ده ازاي المفروض كانت تيجي في ميعادها خلاص كملي و تعالي كمان اسبوع لما نزلت من عندهم سالت صيدلي قالي الحقن دي بتاخر البريود اسبوع و فعلا طلع كلامه صح و جت بعد ميعادها باسبوع * دي اول حاجه بدأت تخلي الفار يلعب*
يومها برضو طلبو مني اعمل انا و زوجي تحاليل في معمل المدينة و لما نزلنا لهم لاقيتهم بيقولولي مين كاتبلك التحليل ده قولتلهم الدكتورة قالولي تمام ادينا اسمك بالكامل و حنتصل بيهم نسالهم هما قصدهم ايه باللي طلبينه ده لان مفيش تحليل بالاسم ده ليكي
لما روحتلهم بعد كده و اخدت التحاليل معايا و تابعو التبويض قالولي تمام و بدأت اخد الادوية و كل ده و انا مش فاهمه اي حاجه و كل مسالهم ايه اللي في السونار ده يقولولي دي البويضات و تمام و لما اجي اسالهم يقولولي اسالتك كتير كده ليه و محدش يرد عليا
بعد ما روحتلهم سبع مرات اخيرا تكرمو و تعطفو عليا و قعدوني مع بنتين كل همهم تظبيط شعرهم دول بقى اللي حيفهموني يعني ايه حقن و ايه كم الادوية اللي باخده ده كل اللي قالوهولي كل دوا بتاع ايه و ان نسبة النجااااح 50 – 60 ٪ بسس يعني من كل 10 بيعملو العمليه 5 او 6 بس اللي بيحملو طبعا بعد الجمله دي انا و زوجي جالنا احباط و يأس و مكنوش فاهمين يعني ايه اجنه درجه اولى او ثانية و يوم الارجاع الثالث او الخامس بيتحدد على اساس ايه و كان ردهم على السؤال ده لما الدكتور يشوف انه كده تمام على الاجنه في المعمل و محتاجين يتنقلو للرحم خلاص
كانو دايما بيخلوني اروح لهم الساعه 2 او 3 علشان الوقت ده بيكون بتاع الناس اللي من بره اسكندرية و هما دايما بيقعدو يحكو قد ايه هو دكتور ممتاز و مين عملت عنده و العملية نجحت علشان يحسسوني ان الدنيا وردي و بمبي خالص و يقعدوني لحد الساعه 5 مفيش اي مشكله و بدون اي سبب مقنع و طبعا الجو حر و مفيش شبابيك و مش عايزين يشغلو التكييف و كل مره بروح بفرهد و بتعب جدا
المهم بعد كل التعب و الزهق و الحقن و عدم الفهم و الدكاترة اللي ابتسامتها رااااحت خااالص و الوش المكشر المرهق بعد اول مره و دايما بيحسسوكي انتي ايه اللي جابك زي ردهم على التليفون بحس انهم نفسهم يقولولي حد يتصل في وقت زي ده و بيسأل كمان
جه اليوم بتاع الحقنه التفجيرية كان الصبح المفروض اخد ابره بس نصها بس مش كلها و لما جه ميعادها كنت نايمه و قومت اخدها و رجعت نمت تاني و لما صحيت اكتشفت اني اخدتها كلها مش نصها طبعا جريت كلمت رقم الطوارئ اللي كانو كاتبينه و لما سالت الدكتورة قالتلي خلاص مفيش مشكله و لما تروحي المركز قوليلهم قولتلها تمام . لما زوجي صحى و حاكيتله قالي كلميهم عند الدكتور اساليهم برضو كلمتهم و مقولكوش على الرعب اللي حاكتني فيه الدكتورة ربنا يسامحها و قعدت تزعقلي و اخدتي جرعه مش بتاعتك و انزلي بسرعه اعملي تحليل e2 و تبلغيني بيه و بسرررررررعه و دلوقتي و بتزعق جااامد و بتقولي تقولي لهم في المعمل تدخل بسرعه الجهاز و تكلعلي النتيجه و ده امر الدكتورة فعلا لبسنا و نزلنا و عملت التحليل و من الساعه 5 و نص بتتصل بيا ها النتيجه ايه قولتلها لسه الساعه 6 عرفت النتيجة و اتصلت بيها قالتلي طيب حكلم الدكتور و ارد عليكي قولتلها ماشي بقيت كل ساعه الا ربع اتصل بيها ها اعمل ايه تقولي اصبري مش كفايه اللي عملتيه لسه الدكتور مردش عليا قولتلها انتي قلقتيني يعني راعي ظروفي تقولي خلاص لو قلقانه انتي امشي على نظامك عادي و خدي الابره التفجيريه في ميعادها غير لو اتصلت بيكي و قولتلك غير كده
الساعه 9 اتصلت بيا تخيلو الساعه 9 و سايباني كل ده تقولي خدي الابره تاني كامله و روحي اعملي تحليل و قوليلي النتيجه و اكدت عليها اخدها قبل التحليل و لا بعده قالتلي لا قبله
و فعلا تاني يوم اخدت الابره و روحت عملت التحليل و طلع 9000 و شوية لدرجة ان الدكتور اللي في المعمل كلم دكتورة تانية و قالها الحقو المدام (اللي هو انا) و انا كلمت الكائنه اللي كانت بتكلمني و لاقيتها بتقول 9000 و شوية طيب حشوف الدكتور و اكلمك و مفيش عشر دقايق "على فكره كنا يوم الجمعه و ساعة الصلاة و الدكتور مسلم" لاقيتها بتكلمني و بتقولي خدي ابره تانية كامله بسررررررعه قولتلها طيب حاضر زوجي و هو جاي من الصلاة حقوله يجيبلي قالتلي طيب
بعد الصلاة بساعه لاقيت اخيرا دكتور بيكلمني و بيقولي انتي حالتك كذا كذا و حتاخدي الابر دي قولتله بس انا اخدت الصبح اخد تاني قالي انتي ازاي تاخدي علاج و بعدين تروحي تحللي مش المفروض تحللي و بعدين نقولك تاخدي ولا لا قولتله الدكتورة اللي قالت كده استغرب و سكت و يومها اخدت الابره التفجيرية
مركز المدينة ده بقى لوحده قصه تانية
*الصراصير في كل حته و الذباب ما شاء الله لدرجة ان غرفة العمليات فيها صاعق دبان اه والله زي ما بقولكم كده
*يوم السحب دخلت العمليات و لما فوقت لاقيتني في غرفه العناية المركزة بس ميغركوش الاسم هي غرفه عادية جدا مصدر التهوية فيها الشباك علشان مش عايزين يفتحو التكيف بدل ما نسقع
*اخدين 8000 جنية علشان العملية و مش هاين عليهم يدفعو اربعه جنيه يجيبولي بيهم عصير بعد ما فقت لانهم قالولي زوجك مش بره علشان يجبلك العصير من الكانتين اللي هو اصلا جوه المركز لما نشوفو نقوله يجبلك و انا مروحه ادوني الادوية الجديده و قالولي يوم الارجاع لما تصحي متدخليش الحمام و تشربي مايه لحد ما توصلي قولتلهم تمام
* قبل يوم الارجاع بيوم كلموني قالولي بكره الارجاع " للعلم انا اتسحب مني يوم الاحد و الارجاع كان يوم الاربعاء يعني بعد اربع ايام لا ثلاثه ولا خمسه" و قالولي لازم تيجي الساعه 7 قولتلهم بس انتم بتفتحو اصلا 7 ونص قالي لا تعالي من سبعه قولتله ماشي
* طبعا صحيت الصبح مقدرتش و دخلت الحمام و شربت اتنين لتر مايه بعد كده و روحت المركز الساعه 7 و ربع مكنش في حد هناك غير موظف الاستقبال حتى الفراشين مكنوش وصلو و فضلت قاعده لحد ما جت الساعه 8 و نص و مبقتش قادره و حموت و ادخل الحمام قمت قولت للممرضه قالتلي خلاص فضي نص و سيبي نص او اعملي كله و اشربي مايه قلتلها خلاص حدخل الحمام و اشرب يادوب دخلت الحمام لاقيتهم بينادو عليا و كنا الساعه 9 لاقيت الممرضه بتقولي مش انا قلتلك تدخلي الحمام و تشربي قولتلها انا ملحقتش قالتلي خلاص روحي اشتري مايه و تعالي بسرعه
*نيجي للمهم المكان اللي اتعملي فيه الارجاع عباره عن طرقه في ممر كل من هب و دب يدخل يتفرج عليكي و محدش بيقولك في ايه ولا الدكتور فين كله اصبري الدكتور جاي جه الحمد لله الدكتور اشرف و اعدنا ربع ساعه مستنين بتاع المعمل يجيب الاجنه و اذ فجأه الاقي ثلاث رجاله واقفين معرفهمش كل اللي بيعملوه انهم بيتفرجو تخيلو و محدش يقولي بيتعلمو لان كان في واحد فيهم مستخبي ورا الباب و الدكتورة اللي ماسكه السونار للدكتور كانت نايمه و كنت حساها حتقع عليا
ملحوظه يوم السحب ادوني دوا و قالولي لاوم يتاخد معاه سوديفاج يوم الارجاع ادوني نفس الدوا من غير سوديفاج ولما سالتهم قالولي لا طبعا ميتاخدش معاه
رجعت الاسبوعين في البيت و عملت التحليل و الحمد لله طلع صفر و كلمتهم اقولهم لاقيت الدكتورة بتقولي طيب ؟؟؟؟؟؟ قولتلها طيب انا اعمل ايه قالتلي وقفي كل الادوية و البيريود حتجيلك كمان اسبوع و تاني يوم فيها تيجي علشان نحضرك للمجمد
تاني يوم لاقيت البريود جت و استغربت جدا و اتصلت بيهم على اساس ان النتيجة لسه طالعه لاقيت الدكتورة بتقولي طيب بكللل برووووود و سكتت قولتلها طيب البريود جت و انتم قولتولي حتيجي بعد اسبوع قالتلي يعني انتي عايزة ايه دلوقتي؟؟؟ قولتلها عايزة اعرف ايه الخطوه الجايه قالتلي لو عايزة تشوفي الدكتور تعالي في اي وقت و تحجزي لو عايزة تكرري التجربة يبقى تعالي بكره و برضو تحجزي قولتلها طيب الدكتور حقوله ايه ولا حيقولي ايه قالتلي علشان يقولك استجابتك للدوا و كان فعال معاكي ولا لا فكنت عايزة اقولها طيب لو انا استجابتي ضعيفه كملتو لييييه و قالتلي اللي الدكتور حيقوله ليكي غير اللي حيقوله لغيرك اسباب الفشل كتيره و في الاخر قفلت السكه بهبد السماعه
معلش انا عارفه اني طولت اوي عليكم بس انا حبيت احكي علشان كل واحده رايحه لهم تبقى عارفه هي داخله على ايه و ربنا يرزقنا جميعا بالذرية الصالحه
Tomorrow better Tomorrow better 1129334_1.gif فتكات حبوبة Fatakat 1129334 اسكندرية – مصر