السلام عليكم ورحمة الله وبركاته
ازيكم ياأحلى بناتيت
انا بصراحة كنت ملتزمة الصمت من فترة طويلة عن الموضوع ده بالذات اللي هو طبعا محير كل الستات ومجنن اغلب البنات
المهم يابنات انا هدخل في الموضوع على طول ان شا ءالله وهقولكو انا بعمل ايه عشان اقلل الدهون الداخلة لجسمي وفي نفس الوقت بحتفظ بجمال الاكل وطعمه الحلو اللي كلنا بنحبه واللي حابة اي استفتسار تيجي تسألني هرد عليها ان شاء الله
نبتدي على بركة الله
1- لما بشتري فراخ وحابة اسلقها مثلا عشان استخدم شوربتها بعمل ايه؟؟؟ بصوا طبعا لما بسيب الفرخة عشان تتنقع حبة في مية وخل وملح عشان تنضف من الزفارة قبل ما احطها في الحلة يابنات بشيل الجلد من عليها نهائي واي حتت دهن كده هنا ولا هنا بشيلها تماما وكده الشوربة بتطلع شوربة فراخ نضيفة جدا من الدهون مفيهاش ولا حاجة دهنية تشربي الشوربة وانتي مطمنة وتعملي بيها الملوخية والذي منه . والله يابنات هي هي بل بالعكس احلى مليون مرة واصح من لما بتتسلق بالدهون .
ونفس الحكاية بعملها مع اللحوم بالنسبة للمفروم بنزل اشتريها من الجزار وبطلب يقطعها قطعية نضيفة جدا مفيهاش دهون نهائي واقوله افرمهالي على كده وبيعمل كده فعلا وما شاء الله اللحمة بتكون تحفة برضه ونفس الحكاية في البوفتيك او اللحمة القطع .
2- انا بستخدم في كل اكلاتي كلها يابنات "زيت الزيتون " ايوة يابنات كل الأكل وبجيب اضافي معاه كده زيت نور اللي نازل جديد ده اهو يسد جمبه بس طبعا زيت الزيتون لا يعلى عليه طب انا امبارح عملت ملوخية بشوربة الفراخ اياها وقليلتلها بزيت زيتون والله يابنات بأمانة جبارة وطعمها ما تفرقيه اصلا عن اللي غرقانة بسمنة بلدي والذي منه وزي ما بقلكو الرز بعمله بيه المكرونة العادية والبشاميل اي حاجة حابة احمرها ده يعني لو بحمر اصلا بحمرها بزيت الزيتون وبجيب النوع اللي هو عصرة أولى على البارد اللي هو اسمه زيت بكر وبستعمل نوع يوناني اسمه لوتفيو على ما اذكر بس والله يابنات ممتاز هو الكيلو ب40 جنيه وقد يزيد على حسب بس والله امانة ما فيه زيه وازاي هيكون فيه احسن منه مهما قالوا …. ماهو ده الزيت اللي كان بيستخدمه رسولنا الكريم صلى الله عليه وسلم … والله يابنات والله انا بستعمله تقريبا من شهر 2 اللي فات وربنا شاهد عليا راحة في المعدة ما بعدها راحة وجربيه كده وهتشوفي وفي نفس الوقت الوزن مبيزيدش منه نهائي.
3- ثالثا يابنات ياللي بتعانوا من البطن وياستات يااللي بتعانوا من البطن بعد الولادة هقولكو سببها ايه " العيـــــــــش"…. اه العيش شوفتوا بقا انا بقالي حوالي 5 سنين مبطلة العيش العادي ده تماما مباكلهوش واصلا تقدروا تقولوا موقفة المعجنات تماما اللي هي العيش وكل منتجاته وتخيلوا يابنات اللي يشوفني دلوقت يقول ولا اتجوزتي اصلا ولا حملتي ولا خلفتي من شكل بطني اللي كأنها بطن بنت وتكاد تكون مختفية وده من تقليل العيش مع اني كنت وانا بنت كان و زني 89 كيلو ولما مشيت على نظام مفيش عيش ده وصلت ل75 كيلو
طب هتقولولي والاكلات اللي لازمن فيها عيش وحتمن ولابد اقولك فيه كيس عيش اسمه مرغوف على ردة بيتباع عند البقالين وعند فتح الله ب2 جنيه خمس ارغفة بجيبه واحطه في التلاجة منين ما تهفني نفسي او تكون اكلة لابد فيها عيش باكل منه بس طبعا متفتريشوعندي برضه على طول عيش سن في التلاجة عندي بس يابنات مبكترش كل حاجة في حدود كويسة وجربي كده تشيلي العيش من نظامك وتدخلي العيش السن بس تدخليه صح مش عمال على بطال وتابعي بطنك اللي هي اول حاجة هتروح فيكي بعد ما تبطلي المعجنات وجربوا وقولولي .
4- رابع حاجة يابنات السكر بصوا انا كنت بشرب كبايةا لشاي دي ب4 معالق سكر ولما قللت كانت ب3 من اول ما بدأت رجيم الاول عشان اخد نفس الطعم ومكرهش الشاي كنت بحليه بعسل كان بيبقا نفس الطعم واهو العسل اقل ضرراً من السكر وده عن تجربتي معاه يعني مش كلام بالبق وخلاص المهم وبعد كده بقيت باخدا لشاي بمعلقة سكر واحدة فقط وبعد كده استغنيت وجبت سكر دايت بس نوع نضيف اسمه بلندي موجود في فتح الله العلبة 100 قرص ب10 جنيه وبتقعد معاكي متقلقيش ومفيهوش اسبارتم يابنات والعصير لما كنت بعمله ونفسي اشرب منه وطبعا كان بيكون محتاج سكر كنت بحطي كباية وبحليها منه وطبعا الحاجات المسكرة اللي هي الحلويات ممنعتش نفسي بس باعدت بين فترات تناولها يعني مثلا كل اسبوع مرة ممكن تاكلي حتة هريسة قطعة جاتوه الخ… متحرميش نفسك بس باعدي الفترات .
5- طب خامس حاجة هقعد انا وجوزي من غير ما ناكل مكرونة بشاميل مثلا طب ازاي لا مينفعش طبعا بعملها على طول وبعملها دايت او اخف الاضرار بلبن بس كامل الدسم من غير دهون خالص ما عدا حبة زيت صغنوين بيتحطوا في قعر الصينية وتعالي اسألي جوزي بقا على طعامتها والله والله اخف بكتييييييير من اللي مليانة دسم دي على الفاضي واهي دهون داخلة الجسم وجربوا ومش هتندموا واي استفسار انا معاكو ان شاء الله
بالنصايح دي يابنات انا محافظة على وزني الحمد لله يعني بمعنى مش حارمة نفسي كتير بس جسمي مش بيزيد الا لما اهبل مثلا واكل عيش او كحك والحاجات دي انتو عارفين بقا العيد بس عاوزة اقلوكو اني مبيزدش برضه كتير وبيبقا سهل جدا اني ارجع الوزن ده تاني
ده نظامي في حياتي حبيت اشاركو بيه يمكن يفيد واحدة فيكو ان شاء الله
مستنية ردودكو واستفتسارتكو وان شاء الله نخس كلنا بصحة ومن غير حرمان بعون الله وتقبلوا تحياتي ياجميلات
ولو عجبكو الموضوع قيمو عشان ينفع حد تاني ان شاء الله
والسلام عليكم ورحمة الله وبركاته
نمنمة المسلمة نمنمة المسلمة 160183_1.gif فتكات رائعة Fatakat 160183 الإسكندرية – مصر أم الدنيا