مساء الفل يابنات يارب كلكو تكونو بخير وصحة ورشاقة ويارب كل واحدة توصل للوزن اللي بتحلم بيه وتثبت عليه
بصو بقى انا هحكيلكو تجربتي بالتفصيل اولا انا كنت طول حياتي رفيعه جداااااا وجسمي كان تحفة زي اي بنوته مصرية وبعد الزواج برضو زي اي ست مصرية اصيلة اصبحت من حزب شجرة الجميز وخصوصا بعد الخلفة والرضاعة والنأنأة وانا بأكل العيال واتباع المثل اللي بيقول وجع البطن ولا كب الطبيخ وطبعا ده المبدأ الرسمي لكل الستات
المهم من كام سنة كده جتلي صحوة ضمير وقررت اخس وروحت لدكتور وعملت دايت 9 شهور كاملين وخسيت 35 كيلو ورجعت زي ماكنت بنت وزي ماضميري صحي فجأة دخل في غيبوبة فجأة برضو ورجعت ريما لعادتها القديمة ورجعت تاني لنفس الوزن وياحسرة قلبي على فلوس الدايت والهدوم اللي جبتها وعلى جسمي اللي رجع تاني زي انثى الدرفيل والحمد لله على كل حال
المهم يابنات اكتشفت انو طول مانظامي في الاكل غلط مهما خسيت هرجع تاني لاني مااتغيرتش وانما عملت حاجة مؤقته وسرعان مانفسي هتغلبني وارجع لعاداتي الغلط وهلم جرا
وبما اني عارفة وانتو كمان ان الاحساس بالشبع مركزه المخ مش المعده وان المخ بيحتاج حوالي 20 دقيقة للاحساس بالشبع ايا كان الكمية اللي بنهبرها فكان المنطقي اني اقلل اللقمة او المعلقة عشان اخدع مخي وآخد كمية قليلة بس الحقيقة ان التطبيق صعب حبتين خصوصا مع اللي اتعود يزلط الاكل زيي
وبعد مخمخة وتفكير لاقيت انو احسن حل اني آكل بالشوكة والسكينة وده يابنات فايدته ان الشوكة مابتشلش كمية كبيرة مهما حاولتي وخصوصا مع الرز والمكرونة وثانيا انك على بال مابتقطعي اللحمة او البانية بالشوكة والسكينة بتاخدي وقت وبكدا فعلا بتشبعي بنص الكمية والله يابنات هتقومي مش قادرة تاخدي نفسك من نص الكمية وتحدي بس بشرط تمضغي برضو الاكل ببطء وتحاولي تستمتعي بمذاق كل لقمة كده وماتخليش حد يتريق ويقولك عيشي عيشة اهلك والكلام ده لانو تعاملك نفسو بالطريقة دي هيديكي احساس بالمتعه كده والآدمية في التعامل مع الاكل وكمان هيضيع وقت زي مااتفقنا
التركة اللي جاية دي كمان فرقت معايا قووووي وهي طريقة تقديم الاكل لان العين بتاكل قبل البؤ ولما بتقدمي الاكل بطريقة حلوة ده بيعمل اشباع نفسي وحسي يعني حطي البانية على طبق علية بقدونس متقطع زي المطاعم وحطي الرز كلو في طبق التقديم مع المغرفة وكل واحد يحط مغرفة واحدة ولما يخلصها يحط تاني لو حب وكمان استخدمي الطباق الصغيرة خالص لانها بتديكي شعور بانك كلتي كتير جداااا وفي الاخر هتلاقيكي كلتي نص الكمية وشبعتي ومش عارفة تاخدي نفسك كمان وتحدي يابنات والله العظيم هتدعولي
واخيرا انصحكو بكتاب رائع اسمه كل كل ماتشتهي وانقص وزنك للدكتور احمد الديب بجد الكتاب ده رااااااااااااائع من هنا لحد السنة الجاية وهيغير حياتك بجد
وتذكرو كلام حبيبنا المصطفى " نحن قوم لا نأكل حتى نجوع واذا اكلنا لانشبع "
ولا تنسوني من دعائكم ويارب اكون فيدتكو
dalia 77 dalia 77 259997_8.gif فتكات رائعة Fatakat 259997 القاهرة – مصر
سبحان الله و بحمده