فى الأول الحمد لله حمد الشاكرين كما ينبغى لجلال وجهه وعظيم سلطانه ربنا رزقنى بالحمل بعد مشوار علاج وتشتت وتعب أعصاب ربنا يجعله فى ميزان حسناتى ويرزق زوجى أضعاف حسناتى لصبره عليه ورعايته واهتمامه بيه ويخلى أمى وأبى واخواتى ويباركلى فيهم وقفوا جنبى بجد كمان أشكر دكتور على مطاوع ودكتور إيهاب فكرى وهما دول أبطال قصتى الباقى كومبارس وأدوار ثانوية ماعدايا أنا البطلة هههههههه معلش طولت عليكم بس أنا هاحكيلكم بالتفصيل
أنا بقالى 3 سنين متجوزة هى مدة قليلة هاتقولوا كدة طبعا كنت بروح لدكاترة وبعمل متابعة تبويض واخد منشطات واللزمنه كل شهر وأصرف أقلها 500 جنيه وكل شهر تحاليل وماحدش فاهم حاجة وأغير من دكتور لدكتور وأسافر المنصورة وأسافر القاهرة ويقولوا عقم غير مبرر وفى النهاية طلعوا هما اللى مش بيفهموا مفيش حاجة اسمها عقم غير مبرر فيه حاجة اسمها دكتور مش بيعرف يشخص فى الآخر حسيت إنى فى دوامة قلت خلاص هالجأ للحقن المجهرى وكنت مقتنعة بنظرية أنا بصرف كل شهر مبلغ كبير والله أعلم هاحمل امتى ماأنا ممكن أقعد سنتين تلاتة كمان أخد أدوية ومنشطات عشان بس تزود الإحتملات ماهى المنشطات بتعمل ايه غير كدة قلت يابت مصاريف بمصاريف اللى هاتصريفيه فكة فى سنتين جمديه وروحى اعملى حقن مجهرى ماانتى لو قعدتى سنتين هاتصرفى نفس المبلغ حسبت حساباتى وجوزى ربنا يكرمه حسب حساباته وأبى ربنا يكرمه حسب حساباته لإنى أخدت منه سلفة وتوكلت على الله فى رمضان ورحت مركز إنجاب بورسعيد
هاتقولولى بقى مركز جديد وقلة الخبرة وكدة برده كان عندى نظرية عن الموضوع إن المركز جديد وحالاته قليلة يعنى الفشل فى حالة فشل للمركز ولذلك هما هايبقوا أحرص ناس على نجاح العملية عكس المراكز الكبيرة العدد فى اللمون واللى ينجح ينجح واللى يفشل يفشل نسبة وتناسب ( ايه رأيكم فى نظرياتى مش عبقرية أنا )
الزيارة الأولى : وطبقا لنظرياتى رحت أنا وزوجى وكانت مقابلتنا مع دكتور على مطاوع وهو ابن الدكتور محمد مطاوع شاب فى العشرينات الأول قلت صغير وقليل الخبرة وبعد عرفت إنه لسه راجع من فرنسا ودرس الموضوع ده هناك وفرنسا لمن لا يعلم عاصمة أطفال الأنابيب فى العالم وفيها عباقرة طب العقم وأطفال الأنابيب كمان هو ماشاء الله عليه فى وشه قبول ويريح الواحدة ويديكى وقتك فى الكلام مش بيقلب فى الكشف ممكن يقعد يتكلم مع الزوجين ساعة وأكتر كمان اهتمامه بالحالة بشكل هتلاقوه فى كلامى بعدين وقلبى اطمن أكتر لما عرفت إن دكتور المعمل ومتخصص الأجنة هو دكتور إيهاب وهو دكتور عبقرى بجد كان فى مركز آدم وساهم فى 16ألف عملية حقن مجهرى كان هو المسئول عن الأجنة كمان هو درس علم الأجنة فى الولايات المتحدة والمركز فيه أحدث أجهزة تخصيب وصلت مصر وكفاية إنها أجهزة جديدة يعنى الأعطال برده لسه بدرى عليها وده هاينجح الحقن ( نظرية من نظرياتى برده أنا ناوية أهريكم نظريات أصلى وقتها ماكانش حيلتى غيرها )
كانت أول مقابلة عبارة عن إنى أخدت كل تحاليلى وأشعتى بالصبغة وتحاليل زوجى ورحنا أول ماشاف تحاليلى قالى عندك تكيسات واضحة أنا اذبهليت وكان شكلى زى ماانتم شايفين عمر ما حد من الدكاترة الأفاضل قالى الموضوع ده مع إنى سألتهم ألف مرة سؤال صريح عندى تكيسات ؟والإجابة لا يامدام انتى ماعندكيش حاجة المهم قالى أعملك سونار ورحت عالسونار بخ مفيش تكيسات بس فيه دهون عالمبايض قالى هاعمللك منظار كى للمبايض قلتله لأ أبوس ايدك لأن واحدة قريبتى عملته وحرقلها مبيض ومدام مصاريف خلاص نتوكل على الله احنا نعمل حقن مجهرى قالى تمام وعطانى علاج سيدوفاج لحد الدورة وكتب لى على تحاليل مع الدورة وحدد لى المعاد اللى بعده وقالى لو عزتى أى حاجة اتصلى بيه فى أى وقت
فضلت أخد السيدوفاج وتعبنى جدا خصوصا مع الصيامبس الحمد لله ربنا قدرنى وأعاننى عليه
الزيارة التانية:رحت خامس يوم الدورة وخدت تحاليلى معايا برولاكتين وحاجات تانية مش فاكراها والله عطانى حقن تحت الجلد اسمها لوكرين الحقن دى ألمانى وفيه مصرى تمنها 615 جنيه بس هو من الأول قالنا إن هو اللى هايجيب الحقن ويحاسبنا لأنه بيطلبها بتجيله جديدة على عكس مانجيبها من الصيدلية وهو هو نفس الثمن بس الميزة فى الحقن اللى عنده إنها جديدة والمادة الفعالة بخيرها بس هى أضمن عشان عملية الحقن قلت يابت بدل اللف اشتريها منه وخلاص أضمن وأحسن كمان الحقن دى مش من بورسعيد بتيجى من القاهرة من العزبى أوسيف كنت باخد كل يوم فى نفس الميعاد حقنة لحد الدورة اللى بعدها ومش تقف الحقنة دى خالص الا لما يقول لأنها مهمة جدا
الزيارة الثالثة: أخدت فيها حقن التنشيط هى حقن اسمه بريجون فرنساوى برده من المركز كان الكورس عامل 3750 جنيه حقنتين كل يوم مع متابعة تبويض بعد 10 حقن يعنى خمس جرعات وخمس أيام لأن كل حقنتين فى سرنجة خلصت الخمس أيم ورحت كان فاضلى فى الكورس خمس حقن خلاهم هو 6 كل تلاتة فى سرنجة على يومين وحددلى ميعاد السحب كل ده ولما بعوز حاجة بتصل بيه وبيقابل مكالمتى بكل ترحاب وبيتكلم ومش بيتأفف زى الدكاترة التانيين
يوم السحب : جهزت شنطة فيها شبشب وفوطة وحاجات ليه ورحت المركز دخلت غرفتى وزجى حضر العينة وأخد دش لأن الأوضة فيها حمام غيرت هدومى وجت الممرضة دخلت معايا ودكتور البنج بنجنى ماحستش بنفسى إلا وأنا عالسرير نايمة حسيت بألم فى بطنى ورغبة شديدة فى التبول ودخلت الحمام ونزل منى طوفان بول كأنى ماعملتش من 10 أيام فضلت شوية وجوزى جابلى أكل لللأسف رجعته كله مفيش ساعة وقمت مروحة نمت نومة حلوة وصحيت اتغديت ومارست حياتى عادى مع الألم اللى كان بيزول يوم ورا يوم وكان دكتور على بيتصل يطمنا عالبويضات والأجنة ويدعى لنا اننا ننقل أجنة عاليوم الخامس يعنى أجنة متطورة مستعدة للألتصاق بجدار الرحم وبالفعل رجعت أجنة فى اليوم الخامس
يوم الإرجاع : رحت يوم الإرجاع وده بقى يوم دكتور إيهاب أنا دخلت أول مرة لابسة هدومى وعباية وهيصة تحت هدوم العملية كمان دخلت غرفة العمليات أول مرة بالنقاب المرة دى دكتور إيهاب قال لأ تدخلى العمليات بلس العملية وبس الجو اللى انتى عاملاه ده ممكن يدمر كل شىء قلت وعلى ايه رحت الأوضة خلعت كل هدومى ولبست لبس العملية بس كنت مكسوفة جدا وجوزى عمال يزغرلى ماهو لا نقاب ولا طرحة ولا يحزنون وكل شىء انكشفن وبان عملت الإرجاع وهما قعدوا يقولولى استغفرى واذكرى الله عشان تهدى وطبعا الحمد لله ربنا عالم بحالى نقلونى وكان المفروض أمشى بعد ساعتين بس حجزت أوضة وقلت مش ماشية الا بالليل لأنى هاروح عند ماما وهى ساكنة فى الدور الأخير كمان دكتور على لما عرف قال لأ لازم تقعدى اليوم كله المهم روحت عالساعة 9 بالليل وجوزى ماشى بالراحة جدا بالعربية ووصلت وطلعت السلم بالراحة ونمت عالسرير وماقمتش لحد التحليل يادوب الحمام وبس الدكتور كاتبلى على لبوس مثبت اسمه برونتو جست وبرشام مثبت بروجست وفوليك أسيد وكان كل لما يحصلى حاجة أتصل على طول بدكتور على كمان والله ياجماعة مش هاتصدقوا الدكتور كان بيتصل يطمن عليه شوفتوها قبل كدة دى ومن لهفتى حللت بعد الإرجاع بسبع أيام وطلعت حامل قالى اصبرى 3أيام وحللى رقمى وحللت وبالفعل طلعت حامل الحمد لله من أول مرة
اللى عاوزة أى سؤال أو استفسار أنا موجودة أجاوبها هى العملية المكز بياخد 8500 جنيه والأدوية بتعمل من 5500 ل6000 جنيه بس الواحدة تعمل حسابها على 15000 ألف فيه مصاريف جانبية الواحد مش بيحسبها زى اللبوس والحقن والتحاليل وغيرها وربنا يوفق كل واحدة فى مشوارها
قصص مشرفة عن المركز: واحدة عملت حقن 12 مرة وفشل وهى مع المركز الوقتى حامل فى توأم
واحدة كانت معايا قعدت 14 سنة وتلات مرات حقن فاشل وربنا كرمها دى معايا يوم بيوم ربنا يتمملنا على خير
واحدة قعدت 17 سنة وكل الدكاترة قالوا مفيش أمل وربنا كرمها
واحدة من دمياط صورة أولادها فى المركز 3 توائم عسلات تبارك الله على جمالهم
المركز محقق نجاح والله ياجماعة يعنى ممكن فى المرة الواحدة ماشاء الله زيرو حالات فاشلة وشفت بعينى الدكتور وهو بيقول 4 حالات ناجحة فى يوم واحد والأربعة كانوا فى نفس اليوم
دكتور إيهاب بيقول احنا متفقين اننا مفيش أكتر من أربع حالات يوميا عشان نقدر نركز ونطلع شغل مظبوط
وفى الآخر والله كله بإرادة الله أولا وآخرا بس لازم الواحد ياخد بالأسباب
ادعولى ربنا يتمم حملى على خير وييسر لى ولادتى ويرزقنى بطفل سليم معافى ويبارك لى وفى أبوه اللى تحملنى كتير
ساكنة القلب ساكنة القلب 519909_1.gif فتكات هايلة Fatakat 519909 بورسعيد – مصر
سبحان الله و بحمده