بسم الله الرحمن الرحيم
ازيكم يا احلى فتوكات
اناجايه النهارده اتكلم فى موضوع اكيد سمعتوا عنه بس الفرق فى الموضوع انه تجربتى الشخصيه مش منقول من اى مكان انا هحكلكم ببساطه عن اللى حصلى علشان اللى معندوش خبره فى الحمل زيى اول ما اتجوزت يعرف حاجه جايز يكون ميعرفهاش
انا فضلت حوالى سنه من غير حمل وكشفت انا وجوزى معندناش اى حاجه محبتش ابهدل نفسى عند الدكاتره وسبتها لله
وفى يوم من الايام اكتشفت انى حامل البيريود اتاخرت اسبوع عملت تحليل حمل عادى خالص ورحت للدكتور وقالى كله تمام هنعمل سونار بعد اسبوعين لانه لسه صغير مش هيبان الكلام العادى جدا وكل حاجه طبيعيه وانا كنت طايره طبعا من الفرحه مقولكوش
المهم بعد اسبوعين فجاه نزل دم الاول كان نقط وفى نفس اليوم زاد جدا رحت للدكتور طبعا كشف بالسونار العادى وبرضه قالى كله تمام
وادانى مثبتات وقالى نامى على ظهرك طبعا نفذت كلامه بدون تفكير والدم ابتدى يوقف بس فضل نقط اسبوع كمان ولما رحت للدكتور تانى زودلى المثبتات وفضلت اسبوع كمان برضه نقط لحد ماجالى نزيف شديد والمره دى الدكتور قالى الحمل نزل وخدى حبوب تنزل الدم وخلاص على كده اخدت الحبوب وقلت الحمد لله ومرت الايام ومحستش باى تحسن كانت الحاله بتسوء القيئ والغثيان والدوخه كل اعراض الحمل بتزيد جامد جدا مش بتقل والدكتور برضه يقولى عادى طبع شكيت وسالت على دكتور تانى مكنش عندى اى خبره خالص المهم اعتمادى على دكتورى اللى ربنا يسامحه اخد منى كمان شهر وبعدين رحت لدكتور تانى اول ما شافنى صمم يعمل سونار مهبلى وكانت الصدمه انه عرف انه حمل عنقودى مكنتش عمرى سمعت عن الحمل العنقودى ده قولتله يعنى ايه
قالى ببساطه شديده انه بيحصل فى حالتين
الحاله الاولى ان حيوانين منويين يلقحوا بويضه فالنتيجه تشوه البويضه
الحاله التانيه ان حيوان منوى يلقح بويضه فاضيه فينتج نفس التشوه
ونتيجه لده المشيمه بتتحوصل تحوصل شديد
ودى صوره للحمل الحوصلى او العنقودى بالموجات فوق الصوتيه
طبعا اتصدمت جامد والدكتور قالى لازم اعمل تنضيف سريع لانى اتاخرت وبقيت فى الشهر التالت وطبعا كانت جريمه من الدكتور الاولانى الللا ادانى مثبتات لحمل حوصلى المهم عملت العمليه بسرعه لان كان الموضوع دخل فى تسمم حمل والضغط زاد جدا بعد ما عملتها حبيت اعرف اكتر عن الحمل العنقودى ده وعرفت ان فيه نوعين منه
النوع الاولال العنقودى الجزئى وده بتتكون فيه خلايا للجنين فى الشهر الاول بس مبيستمرش علشان تشوه خلايا المشيمه وممكن فيه رؤيه الجنين فى السونار وبيبقى فى اغلب الاحوال مش طبيعى ودى صورته
شايفين ازاى المشيمه عامله حويصلات حول الجنين
النوع الثانى العنقودى الكلى وده المشيمه فيه بتبقى عباره عن
حويصلات مليانه ماء شفاف والمشيمه بتفرز هرمون الحمل لكن لا يمكن رؤيه الجنين بالسونار ودى صورته
زى ما انتوا شايفين الرحم كله حويصلات مفيش جنين
وبالرغم من ان الحمل العنقودى نادر الحدوث فى التوائم الا انه ممكن يحصل ودى صوره نادره لحمل عنقودى جزئى لتوام
شفتوا ازاى المشيمه متحوصله ربنا يعافينا كلنا يا رب
مفيش سبب للحمل العنقودى ده بتاع ربنا خالص بس بتحصل اكتر بعد حالات الاجهاض وبعد حالات الحمل خارج الرحم وعلى فكره ممكن تتكرر تانى بنسبه لا تتعدى 10%طبعا انا خرجتكم كده عن حكايتى نرجع لها بقى
بعد ماعملت العمليه الدكتور قالى انى اتاخرت اوى فى التنضيف ولازم اخد علاج كيماوى للقضاء على الحويصلات اللى دخلت جوه بطانه الرحم الحقيقه شكيت فى كلامه منا اتعقدت من الدكاتره بصراحه ورحت لاثنين تانيين كبار فى القاهره بس كلهم الحقيقه اجمعوا على كده وقالوا لو كنت اكتشفته بدرى مكنش هيبقى فيه مشكله بس الاهمال اللى حصلى هو اللى وصلنى لكده المهم كان لازم اخد عقار معين كيماوى وكان حبوب مش هقول اسمه لانه خطير مينفعش حد يخده لوحد لازم اشراف دكتور كان لازم اخد العقار ده على 3 جرعات كل جرعه 5 ايام وبين كل جرعه والتانيه 10 ايام وبعد كل جرعه لازم اعمل تحليل حمل رقمى لان الهرمون كان عالى لسه علشان نتابع نزوله مع جرعات الكيماوى واخدت الجرعات والحمد لله نزل الهرمون والدكتور منع الحمل سنه كامله وده شرط اساسى فى الحمل العنقودى ولما الفتره عدت وحملت تانى بفضل الله كان اول حاجه عملها الدكتور سونار مهبلى والصدمه برضه عنقودى لا اله الا الله هنعمل ايه نصيبنا كده الحمد لله طبعا مع السونار تحليل حمل رقمى وده كان فى اول اسبوع من تاخير الدوره وعلى طول عملت تنضيف فورى وعلشان كده الحمد لله مكانش فيه علاج كيميائى بس كان لازم برضه اتابع هرمون الحمل بالتحليل الرقمى كل شهر واستنى سنه بدون حمل برضه وبعد السنه حملت برضه بفضل الله وكانت نفس القصه سبحان الله يارب ابتلاء ثلاث مرات اللهم لا اعتراض الحمد لله يا رب على كل شئ وعدت نفس القصه تانى لأ تالت الحمد لله الحمد لله الحمد لله
انا حاولت احكيلكم قصتى باسلوب بسيط وبدون اصطلاحات طبيه علشان الموضوع يبقى سهل انا عايزاكم تاخدوا بالكم من قصتى دى فى شويه حاجات
اللى جالها حمل حوصلى قبل كده لازم تاخد بالها انه لا قدر الله ممكن يتكرر اول حاجه تعملها فى الحمل الجديد تحليل حمل رقمى وسونار مهبلى فى اول اسبوع حمل لازم وضرورى الحاجتين دول علشان متتعرضش للعلاج الكيماوى بعد الشر عليكوا كلكم وياريت كل حامل فى بدايه الحمل تعمل تحليل حمل رقمى لان هرمون الحمل (اتش سى جى)بيكون عالى اوى وبيتعرف انه مش طبيعى او لو حامل وبينزل دم من غير سبب واضح اعمل سونار مهبلى ارجوكى اطمنى على نفسك والى جنينها بيموت من غير سبب واضح حللى الحمل اللى هينزل علشان تتاكدى انه مش حوصلى جزئى ربنا يبعد عنكم كلكم اى حاجه وحشه ويرزقكم كلكم بالخلف الصالح السليم المعافى يا رب معلش انا طولت عليكم بس كنت عايزه احكيلكم الموضوع كله بالتفصيل علشان الاستفاده وان جاهزه ارد على اى استفسار من اى نوع
بعد ما ديقتكوا معلش بموضوعى احب افرحكم ان انا ربنا رزقنى ب3 اطفال هما قرة عينى وعوض عليا عوض الصابرين الحمد لله وهبقى احكيلكم مره تانيه جبتهم ازاى وقصتى معاهم متنسونيش فى التقييم وادعولى ربنا يباركلى فى ولادى ويشفيلى ابنى اللى اتولد بكليه واحده وده له قصه طويله فيها توعيه جامده هحكيهالكم فى موضوع تانى قريب متبخلوش عليا بالدعاء الله يخليكم اسيبكم فى امان الله
[FONT=’Times New Roman’,’serif’]السلام عليكم ورحمة الله وبركاته
[/font]
سيسو زيزو سيسو زيزو 822446_8.gif فتكات غالية قوي Fatakat 822446 المنصوره – مصر