السلام عليكم و رحمة الله و بركاته
وحشتونى اوى بجد
و بقالى فتلرة عايزة انزل كام موضوع بس الظروف بقى
المهم
هادخل فى الموضوع على طول
جايبالكوا النهاردة طبق البيكاتا و زى المطاعم
و اعمليه و دوقيه و احكمى انتى
انا اول ما اتجوزت ماكونتش بعرف أظبط البيكاتا دى ابدا كنت بعملها بالدقيق و الصوص احيانا كان مش بيبقى حلو
اه كان ماشى حاله بس بعد ما غيرت للطريقة دى
شوفتها فى مدونة تانى لواحدة جزاها الله كل خير كانت واخداها من شيف
و فعلا لقيت ان كده احلى كتير و بجد كأنى طالباه من مطعم
والله مش بشكر فى نفسى اعمليه و شوفى انتى
و الطريقة دى لا فيها دقيق و لا تخافى الصوص يتقل و يجلّد لما تسيبيه شوية
نيجى للمهم
المقادير :
شرايح بوفتيك مش مدقوقة
( كنت ناوية اعملها بوفتيك عادى بس ادقها بس كنت متعورة و ده اللى طلع فى دماغى اعمل بيكاتا بدل البوفتيك المقلى )
زبدة و زيت ( لتحمير اللحم )
بصل
مشروم مقطع ( انا ماكنتش لسه قطعته )
كريمة
ملح و فلفل
بهارات لحم
ورقة لورا
كثبرة ناشفة
حبهان (هيل) صحيح مش مطحون
صلصة الصويا الخفيفة
مكعب ماجى ( او شوربة لو عندك )
( انا عادة مش بيكون عندى شوربة لان الفريزر بتاعى مش كبير و مش فيه مكان لاى حاجة زيادة فا دايما بحط ماجى )
هنجيب مقلاه واسعة و نحد فيها الزبدة و الزيت ( انا بحب احمر اللحم بيهم بحس طعمهم بيكون احلى من الزيت لوحده )
بعد ما الزبدة تسيح نحط شرايح اللحم
و لما يبيّض من تحت نقلبه
و ده شكله بعد ما اتحمر
نشيل الشرايح على طبق برة
انا هنا قطعت المشروم
نحط بقى فى نفس المقلاه البصل و المشروم
و نقلبهم شوية على النار لحد ما يبقى شكلهم كده
نحط عليهم شرايح اللحم اللى شيلناها فى طبق
نقلبهم و نضيف الملح و الفلفل و التوابل كلها و الصويا صوص و مكعب الماجى
نقلبهم و نضيف ماية ( لو حاطين شوربة بدل مكعب المرقة مانحطش ماية )
على نار عالية شوية نسيبها تغلى و لما تغلى نوطى عليها و نغطيعا خالص و نسيبها تستوى
بس نسيب فيها شوية صوص
و دى بع ما استوت ( انا بحبها well done فيكو تعملوها ميديام اقصد لون الشرايح يكون افتح من كده )
نشيل الشرايح و نحطها فى الطبق اللى هنقدمه فيها
نروح تانى للصوص بتاعنا
ده شكله بعد ما شيلنا منه اللحم
نحط عليه شوية كريمة و نقلبها
حسيناها محتاجة شوية كريمة او خفيفة يعنى نزود كريمة
و اول ما تغلى نهدى النالر عليها و نسيبها 5 دقائق
و نحطها على الشرايح و ده كان شكلها النهائى
و قدمتها مع رز بالمكسرات
و بطاطس مهروسة مع الحليب و الزبدة و معاهم ملح و فلفل
و عملتها على شكل كورة و عملت فيها فتحة فى النص ورقعتها من الجوانب شوية و حطيت فيها صوص كانت طعمها حلو اوى بجد ما شاء الله
معلش الصور مش حلوة بس اصل الكاميرا بتاعتى ما كنتش مشحونة فا صورت بكاميرا أقل
و بجد شكله احلى كتير فى الحقيقة
اتمنى تجربوه و يعجبكم
و اى استفسار انا فى الخدمة
و اللى يعجبها الموضوع تدعيلى دعوة حلوة انا و جوزى و ابنى مش مهم تكتبيها المهم تقوليها من قلبك
جزاكم الله خيرا
فى امان الله يا احلى صحبة فى النيا مواضيع هذا القسم برعاية
zatoona magnoona zatoona magnoona 479996_3.gif سوبر فتكات Fatakat 479996 jeddah – saudi arabia