السلام عليكم ورحمه الله وبركاتهانا بعانى مع مشكله مع بنتى ومش عارفه احلها ازاى
اولا بنتى عندها نشاط زايد جداا ودة مش كلامى دة كلام المدرسه بتاعتها بمعنى انها مش بتقدر تقعد فى مكانها عشر دقايق على بعض
الاول هى عندها ست سنين
وطبعا الحركه بتاعتها بتأثر على مستواها الدراسى وعلى زميلاتها فى بعض الاحيان
هى كثيرة الحركه والكلام عصبيه جداا ودة من وهى بيبى رضيع يعنى متقلوش علشان انا عصبيه فهى بقت كدة مع اعترافى انى دلوقتى بقيت عصبيه لاقصى مدى ممكن تقولوا اتجننت او فى نص ضرب عندى
المشكله انها طول الوقت بتعند وتعلم اختها العند تزعق فيها
لو خرجنا بتبقى عايزة تشترى كل حاجه وانا طبعا مش بطاوعها خالص عايزة كل اللعب والحاجات الحلوة يا اما تقعد تعيط وتفرج الناس علينا وانا لاحياة لمن تنادى
لو دخلنا مطعم تفضل تبص على الناس وتبدا تتحرك
جربت معاها كل الطرق :1:احنا صحاب وتعالى نتكلم مع بعض الاقيها مش بتبصلى خالص وتبدا تفرك ومش عايزة تسمعنى واحاول انى اخليها تبص لعينى علشان تركز وطبعا انا بدن فى مالطى
2:تقعد فى النتوتى واخصص مكان تفضل قاعدة فيه حوالى خمس دقايق او عشرة وطبعا بنرجع زى الاول واكتر
3:ازعق وممكن اصرخ تسكت شويه وترجع تانى للى بتعمله
4:الضرب كانت الاول تعيط ودلوقتى ممكن حتى ماتتأثرش خالص يا اما تعيط ثانيه وترجع للى بتعمله تانى وتقولى انتو مش بتحبونى
بتتحرم من الكارتون والحاجه الحلوة والمصروف فى المدرسه طبعا كلا على حدة
المشكله الاكبر كان فى امتحانات نص السنه هى اولى ابتدائى لغات وفى دوله عربيه والدراسه تقيله وبتصل بالمدرسه بتاعتها صدمتنى قلتلى بنتك مستواها رائع معايا جوا الفصل بس للاسف فى الامتحان بتستعجل جداا وعايزة تخلص بسرعه وطبعا دة بيوقعها فى اخطاء كتير مع العلم انى كنت كل يوم اقولها راجعى يا قمر بعد اما تخلصى تقولى يعنى ايه اقولها اقرى كويس السؤال واقرى الاجابه واتاكدى منها او اجمعى كويس او اطرحى صح وفكرى قبل ما تكتبى
والمدرسه كانت بتقولها نفس الكلام بس طبعا هى مفيش والمدرسه اصلا كانت بتعملهم كل اسبوع امتحان يعنى هى متعودة على الامتحانات طول السنه ولما كانت تنقص وازعل منها تقولى انتى بتزعلى ليه وفيها ايه لما مجبش الدرجه النهائيه وطبعا اقولها لو جبتى الدرجه النهائيه هنشترى لعبه حلوة كاتحفيز ليها بس ولا هى هنا
انا عارفه هتقولولى لسه صغيرة بس فعلا الشكوى منها فى المدرسه بتاثر على الواحد عايزة اقولكم انى اتعقدت من انى اسال عليها فى المدرسه من كتر الشكوى فى كى جى بطلت اسال السنه دى
يا بنات انا عايزة بجد حل لانى تعبت جداا نفسى اخرج زى الناس من غير ما نرجع متنكدين
نفسى انها تكون شاطرة فى المدرسه
نفسى تبطل عند فى اختها وعصبيه مع اختها
انا يا بنات فكرت انى اشترك لها فى اى لعبه تفرغ فيها طاقتها بس مش عارفه تكون ايه انا قدامى سباحه وكاراتيه اختار ايه
بالله عليكم ردو عليا ومفيش حد يدخل ويخرج من غير ما يرد
وادعولى يا بنات بالله عليكم ان ربنا يهدي البنات وانى ابطل عصبيه لانى تعبت
انا اسفه انى طولت عليكم
نوران ونورسين نوران ونورسين 359652_1.gif فتكات هايلة Fatakat 359652 الشارقه – الامارات العربيه
سبحان الله و بحمده