السلام عليكم ورحمة الله وبركاته
حبايبى الفتوكات
وحشتونى وحشتونى وحشتونيييي ووحشتو عيونى على رأى الست ورده
النهارده عملت غدا بسيط وهو بصاره و قرنبيط و بتنجان مقلى
وكتير لما اشوف موضوعات البصاره ا اتكلم مع صاحباتى او سلايفى الاقى طريقتهم مختلفه عن طريقتى فى البصاره
قلت طيب لما اقول طريقتى للفتوكات وخصوصا ان البصاره بتاعتى بتعجب اى حد بياكلها
ودى صوره للسفره كامله للتشجيع
نص كيلو فول مدشوش +كزبره وشبت وبقدونس من كل صنف حزمتين +بصل+توم+دقيق+زيت+كراويه
هنا بحط الفول فى حله واملى عليه مايه علشان اسلقه واخرط عليه الخضره والبصل
وهنا الفول بعد ما اتسلق
بعد ما الفول يبرد شويه باخده على الخلاط واطحنه
وهنا بعد ما طحنته ورجعته للحله واضفت عليه الملح ونيجى بقى للاختلاف فى الطبخه عن باقى طرق طبخ البصاره
هنا انا بضيف الكراويه اولا بتدى طعم وريحه مميزين جدااا وحلوين جداا بجيب الكرويه واحمصها فى طاسه على النار لحد ما تطلع ريحتها وبعدين اطحنها فى الطحان بتاع الخلاط واحط منها معلقه كبيره على البصاره ده اول اختلاف
نيجى بقى لتانى اختلاف
بجيب طاسه واحط فيها شوية زيت واحمر فيها شوية دقيق يجى معلقتين تلاته كده واحمرهم كأنى بعمل سد الحنك يعنى الدقيق يحمر وبعدين اخد كبشتين من الباره على الدقيق واقلب بسرعه وافك الدقيق بالبصاره وبعدها اضيفه على الحله كلها واقلبهم فى بعض الدقيق هنا بيدى ريحه وطعم وقوام حلو اوى للبصاره
نتابع مع بعض الصور
هنا بخفف الدقيق بعد ما اتحمر واقلب بسرعه
هنا اضفت الدقيق على الحله وبقلب بسرعه
هنا خرطت بصلتين للتقليه وحطيت عليهم راس توم مدقوقه وخرطى شوية بقدونس للتزيين
وهنا رفعت البصل والتوم على النار يتحمرو
بنشل البصل والتوم المتحمريين فى طبق وبسيب شويه فى الزيت
الشوية اللى سبتهم فى الزيت مع الزيت اللى حمرت بيه بضيفهم على حلة البصاره واقلبهم فى بعض كويس
وبغرف البصاره فى اطباق واينهم بالبصل والتوم المتحمر وارش عليهم شوية بقدونس واتفضلو يا قمرات احلى طبق بصاره
بجيب راس قرنبيط واسلقها فى مايه وملح وكمون ومعلقة سكر
السكر مش بيخلى ريحة القرنبيط الغير مقبوله تطلع وتعبى البيت
نيجى لعمل العجينه
بجيب حزمتين بقدونس و شبت واحد عليهم حوالى 4 فصوص توم واضربهم فى الكبه وهنا فى الصوره فى بقدونس بس لانى اخدت الشبت كله فى البصاره ونسيت اشيل شويه للقرنبيط
وبعدين بعد ما اضربهم مع بعض فى الكبه اضيف عليهم طماطمايه كبيره واضربهم تانى
وبعدين اضيف عليهم حوالى 4 بيضات وملح وفلفل وكمون ومعلقة صغيره بيكنج باودر واضرب
كل اللى يقابلك فى الليله دى اضربى ولا يهمك هههههههه
بعد كده بنفرغ العجينه فى طبق ونجيب زهرة القرنبيط لو كبيره بنقطعها اتنين او تلاته على حسب حجمها ونغمرها فى العجين وعلى الزيت السخن طوالى
هنا غمرتها فى العجين
وحطيتها فى الزيت السجن بس نسيت اصورها وهى بتتقلى
واتفضلو احلى طبق قرنبيط
يارب موضوعى يعجبكم يا قمرات
والى اللقاء فى موضوعات اخرى ان شاء الله
مواضيع هذا القسم برعاية
فتوكه مصريه37 فتوكه مصريه37 216201_3.gif فتكات ست الكل Fatakat 216201 القاهره – مصر