السلام عليكم حبايب قلبى ..
طبعا فيه منكم عارفين حالتى .. و فيه لأ…
أتا إتجوزت من سنة و نص … و بعد فرحى بشهرين إكتشفت إنى مريضة بطانة مهاجرة ..
الدكتور الله يسامحها عملتلى منظار عشان تشيل كيس الشيكولاتة اللى كان فى المبيض الشمال ..
للأسف كانت عملية غير آمنة بالمرة و حصلى سخونية جامدة جدا بعد المنظار و كنت جموت فيها …
المهم بعدها بكام شهر عملت أشعة صبغة و طلعت الأنبوبة الشمال مسدودة و ملتهبة و فيها مية تمنع الحمل .. و فيه دكتور واحد قالى لازم نعمل عملية و تتقفل .. و باقى الدكاترة قالولى لو احصلش حمل فى خلال 3 أو 4 شهور يبقى هى اللى مانعة الحمل و تتقفل ..
إديت لنفسى فرصة 4 شهور .. و فجأة حملت من غير أى منشطات .. لكن البيبى نزل فى 3 شهور ..
إديت لنفسى فرصة تانية من شهر 11 لحد دلوقتى و بردو ماحصلش حمل ..
و فى الآخر قررت أنا و زوجى نروحوا لمركز جنين فى المعادى و نبدأ فى خطوات الحقن المجهرى …
روحنا النهاردة الصبح الساعة 9 .. المركز كان زحمة ..لكن منظم جدا الحقيقة …
الكشف … 400 جنيه يا مؤمنيييييييييييين
قولت و ماله .. كله يهون عشان البيبى …
أخدوا بياناتى و بيانات جوزى و إدونى فايل فيه أسئلة كتييييييييييييييرة أوى عن كل حاجة تخصنى فى موضوع الحمل و البريود و زوجى و كله كله كله …
مليت البيانات و سلمتهم الفايل ..
شوية و ندهوا على إسمى عشان أقابل د/ حسام أبو المعاطى .. راجل خلوق جدا الحقيقة و ذوق … و هو يبقى مساعد د/حسام زكى صاحب المركز … إتكلم معايا أنا و زوجى و شاف تحاليلى السابقة و الأشعة و كافة شئ يخص حالتى و طمنى الحقيقة …
و قالى غالبا حنعمل منظار الأول .. عشان المية اللى فى الأنبوبة الشمال ممكن تكون سبب فى الإجهاض ..
طلعت من عنده قعدنا تانى فى الإنتظار …
شوية و ندهوا على إسمى … و قابلت د/ حسام زكى صاحب المركز …
راجل محترم جدا الحقيقة و ذوق فى معاملته … كشف علية من غير ما يبص خااااااااااااااااااااااااااااااالص ..
فصصنى بالسونار الهبلى على المبايض و الرحم …
و الحقيقة أول مرة أشوف جهاز سونار بالعظمة دى ..
المهم .. خلص كشف و دخلنا على المكتب ..
قالى بصى يا بنتى حالتك مش صعبة .. و خلينا نمشى خطوة خطوة …
إحنا حنعمل منظار لازم عشان نقفل القناة دى عشان ماتسببلناش فى إجهاض تانى و لو بنسبة قليلة …
تانى حاجة حتعمليلى لستة التحاليل دى " و الحقيقة ورقة كلها تحاليل كتيرة مافهمتش منها أى حاجة "..
و لما نطمن عليكى فى التحاليل و تحاليل زوجك و نشوف المنظار ممكن ماتحتاجيش لحقن مجهرى ..
روجت أنا معيطة … و قولتله بس أنا عايزة أعمل حقن .. عايزة أبقى أم يا دكتور ..
قالى يا بنتى أنا مش قصدى إن حالتك مافيهاش أمل .. بالعكس الأمل كبير إن شاء الله …
و لكن ماقدرش أعمل حقن لو إنتى فعلا حالتك ماتحتاجش … و أصبرى لحد ما نعمل المنظار و نشوف …
و إتطمنى جدا يا بنتى و إن شاء الله حتملى الدنيا ولاد و بنات
طلعت من عنده طايرة يا بنات والله ….
المهم روحت أعمل التحاليل اللى طلبها …
طلعت بكاااااااااااااااام ..؟؟؟؟؟
قولولى بكاااااااااااااام …
طلعت ب700 جنيه يا مؤمنييييييييييييييين
دفعناهم زى الشاطرين و سحبوا منى العينة … و قالولى أستنى شوية عشان دكتور المعمل يشوف العينة تمام و لا ياخدوا تانى غيرها ..
أثناء الإنتظار بقى و أنا كل شوية أسمع زغاريط … أه والله .. ما شاء الله أكتر من 5 حالات النهاردة حوامل يا بنات …
من كتر فرحة الناس بقيت حاسة إن أنا اللى حامل .. و قعدت فرحانة أوى و كان متهيألى أضربلهم زغروطة إسكندرانى تسرعهم
المهم ..الدكتور قال العينة تمام ….
روحت البيت طايرة و كلى تفاؤل مع إنى من جوايا مرعوبة من المنظار بسبب تجربتى الصعبة الأولى فى المنظار …
لكن الأمل كان مالينى و يقينى بربنا كان مريح قلبى الحمد لله ..
المهم على بالليل االمركز إتصل بية و قالى الحمد لله نتايج التحاليل كلها هايلة ما شاء الله
و طلب منى الدكتور إنى أجيلهم بكرة عشان نتفق على الخطة بتاعتنا الفترة اللى جاية ..
لكن إن شاء الله حروحلهم بعد بكرة و كمان جوزى يكون عمل التحليل بتاعه …
والله قولت أحكيلكم و تمشوا معايا خطوة بخطوة ..
تفيدونى و أفيد اللى مقبلين على تجربة الحقن ..و تدعولى دعوة حلوة …
بجد إنتوا بتعوضونى عن فقدانى لأمى و إنى ماعنديش إخوات بنات أحكيلهم …
ربنا يخليكوا لية يا حبايب قلبى ..
دعواتكم .. و إن شاء الله فى موضوعى راح أخليكم تتابعونى خطوة خطوة
*نور مالك* *نور مالك* 33120_2.gif فتكات متميزة Fatakat 33120 الاسكندرية – مصر