السلام عليكم و رحمة الله و بركاته
إزيكم يا فتكات؟
امبارح كنت راجعة من الكلية سعيدة و انا لما ببقي مبسوطة بدخل اطبخ عديت علي مترو ماركت اشتريت الحاجات و شمرت و دخلت في المود
و بما اننا بيت عنده مشكلة مع الدهون و الزبدة و عندنا هسهس الاكل الصحي قلت اعمل حاجة خفيفة
انا معرفش لو هي اكلة معروفة ولا لأ بس هي جت معايا مرة بالصدفة و طلع طعمها حلو فبقيت بعملها علي طول
باستا بالمشروم و البروكلي و الوايت صوص
من غير رغي كتير ندخل في المكونات
بروكلي- ماشروم فريش (بيبقي طعمه احلي بكتير من المعلب)- مكرونة اي نوع – فصين توم صغيرين (ممكن تزودوا براحتكم بس احنا مش بنحب نحط توم كتير في الاكل) – بيستو صوص – علبة صغيرة كريمة طبخ
الاول البروكلي, غسلته و بعدين سخنت ماية في البويلر و حطيته فيها لمدة دقيقة تقريبا و طلعته من الماية المغلية علي ماية متلجة علي طول,
ده عشان يحافظ علي لونه اخضر كدا و ميدبلش و عشان مياخدش وقت في التشويح
الماشروم مجرد بيتغسل كويس بمية باردة
المكرونة بنسلقها بس مش قوي تبقي al dente كدة و نحط مع المية شوية ملح و نقطة زيت عشان متعجنش
في بان تيفال هنسخن معلقة زيت صغيرة و كل ما كان اقل كل ما كان احسن و نشوح فيها توم
و هنحط عليها الماشروم المتقطع لحد ما ينزل مايته و يستوي
و في بان تانية نعمل نفس الكلام مع البروكلي بس البروكلي هياخد وقت اطول شوية
بعد ما يستووا الاتنين هنحطهم علي بعض و نشوف محتاجين ملح و فلفل قد ايه و نشوحهم مع بعض شوية
و بعدين نحطهم علي المكرونة و معاهم معلقة صغيرة بيستو صوص عشان هو طعمه قوي اصلا و نسويهم علي النار شوية عشان ياخدوا من طعم بعض
ده شكل البيستو صوص اللي استخدمته و جنبه الكريمة بتاعت الوايت صوص
الوايت الصوص بقي, هو شبه البشاميل العادي بس بيبقي فيه كريمة و بيبقي سائل اكتر من البشاميل و في ناس بتحب تزود عليه جبنة شيدر او بارميجان
انا مصورتهوش عشان كنت مركزة انه ميكلكعش بس هو بنحط زبدة علي النار و عليها دقيق و لما الدقيق يمسك نبدأ نضيف لبن و بعدين نضيف الكريمة و نفضل نقلب لحد ما نوصل للقوام اللي احنا عايزينه, كل واحد حر في الكثافة اللي هو عايزها بقي.
انا محطيتهوش علي المكرونة عشان ممكن حد يحب ياكل المكرونة و هي خفيفة لوحدها.
ساعة الاكل انا ملحقتش اصور عشان جالنا ضيوف و الاكل اتهجم عليه بس دي صورة من اكلي انا تاني يوم
و احب اسجل من موقعي هذا ان لو في يوم من الايام فتحوا مطعم و بقوا بيقدموا فيه باستا بالماشروم و بروكلي انا محتفظة بحقي في نسبة من ارباح الطبق ده متقلش عن 98% مواضيع هذا القسم برعاية
♥Dou♥ ♥Dou♥ 526927_2.gif فتكات رائعة Fatakat 526927 القاهرة – مصر