حبيت احكيلكم علشان الكل يستفيد من اخطائى ربنا يقوم كل واحده بالسلامه يارب
المفروض ان الميعاد اللى اتحددلى للولاده يوم 19-12 لكن يوم 8-12 بالليل حسيت بميه نزلت عليا
قلت عادى شويه مايقلقوش لكن مافيش 5 دقايق ولاقيتها حنفيه مايه واتفتحت خوفت ومارضيتش اقلق جوزى لانه
بيشتغل بالليل وبيرجع على الساعه 3 الفجر كده …المايه كانت كميتها فظيعه يابنات لدرجه انى حطيت فوطه وش
بعدها بدء مغص بسيط فاتصلت بالدكتوره قالتلى لا لسه وماتقلقيش من المايه بكره الصبح كلمينى
استحملت الالم وحاولت انام معرفتش جهزت اللى باقى فى الشنطه والصبح كنا فى المستشفى لما فحصتنى قالتلى نزلت مايه اه
لكن لسه حوالين البيبى مايه كفايه والرحم مافتحش خالص دانتى لسه بدرى عليكى ممكن بكره ولا بعده كمان
ماما طبعا سمعت الكلام ده قعدت تقطمنى وانتى كل شويه هاتجرجرينا للمستشفى وانتى بتتدلعى
واستحملى شويه وماينفعش الكلام ده وانتى لسه قدامك بدرى
وقعدت تهلكنى فى الشقه يعلم ربنا يابنات الوجع فيا وكنت بغسل المواعين مش مستحمله خالص
وماما مشيت وقعدت لوحدى استحمل واشرب فى نعناع ابدا اختى جت بالليل كنت مش مستحمله خالص بقه
والطلق كان يجى كل 5 دقايق واقول لا برضه هايقولو انى بتدلع الم جامد جدا وبرضه صبرت لحد الساعه 12 وربع بالليل
كنت خلاص بقه جبت اخرى كلمت الدكتوره قالت روحى على المستشفى
وفعلا جوزى ساب شغله وجه جرى ونزلت كنت خلاص بقه بتيجى الطلقه بحزقه لتحت وصويت بقه ماقولكوش
بينى وبين المستشفى 10 دقايق بالظبط بس المشكله انى مكنتش مستحمله
اول مانزلت من باب العربيه كانت راس البيبى بتضغط جامد جدا ونزلت وكنت ماسكه فى رقبه جوزى مش قادره وجايبن كرسى
انى اقعد جوزى زعق جامد لانهم جايبن كرسى عادى اى مستشفى اقل حاجه فيها كرسى متحرك حتى
بس حتى لو جه مكانش هاينفع لان البيبى كان نصه بين رجلى اصلا
وانا مش عارفه اقول من كتر الطلق اللى ورا بعضه
لولا ربنا يستر دكتور الاستقبال فهم وخلوهم يشيلونى ودخلو بيا الاسانسير
والدكتور ضغط على بطنى ونزل نصها التانى
وعلى ماطلعت العمليات كانت بنتى فى ايده صرخ فى الممرضات مقص بسرعه
ودخلونى العمليات وكنت فى حاله هيستيريا خوفا على بنتى لانى شوفتها ماصرختش
تخيلت انها ماتت ومارضيتش اتخدر واعيط واقولهم طمنونى الاول ابوس ايدكم اطمن الاول
والدكتوره الله يسامحها حتى ماجتش تسندنى اطلع على سرير العلميات وتقولى اطلعى بس
قلبها جامد قوووى واتركبلى الكانيولا ودكتور الاطفال دخل وقالى اتطمنى بنتك زى الفل والله
ومافيش 10 دقايق وكانو دخلونى اوضتى
فوقت وكل همى اتطمن على بنتى لحد ماجوزى جه وطمنى وقالى انا لسه كنت معاها واذنتلها فى ودنها
هم كبير انزاح من على قلبى بجد ربنا يطمن كل ام على طفلها ويدى كل زوجه الزريه الصالحه التى تقر بها عينها
بجد يابنات اول ماتحسو بالم لازم تروحو المستشفى ماتستهونوش
انا بنتى اتولدت بره العمليات ومافيش تعقيم والدكتوره اللى كانت هاتولدنى حتى مالمستهاش
واستنت جوزى على باب العمليات وخدت 1500 جنيه اجره ايديها بس
بس يعلم ربنا مش مسامحاها لانها كانت عارفه انى مش هاستحمل لبليل وهيه اللى قالت لجوزى كده بس قالت
قال ايه علشان ماتوهمنيش ادعولى وادعو لبنتى مايكونش فيها حاجه من اللى حصل ده
3asfoora 3asfoora 114144_2.gif سوبر فتكات Fatakat 114144 الجيزه – القاهره