عاملة لكم النهاردة الكشك و طبعا عارفة ان كتير منكم عارفين طريقته بس حبيت اوريكم طريقتى السهلة
وكمان علشان لو فيه بنات ما يعرفوش يعملوه
المقادير
كوب و نصف لبن و كوب ونصف شوربة
و لو عايزة تزودى اللبن طبعا يكون احسن
نصف كوب دقيق
بصلاية متوسطة مقطعة صغير
ملعقتين رز مستوى يكون بايت عندك
ملح و فلفل و بهاراتك المفضلة
الطريقة نضع الشوربة لوحدها فى حلة على النار و لما تغلى نضع فيها ملعقتين الارز المستوى
تانى خطوة ندوب اللبن فى الدقيق بالمضرب السلك و يكون اللبن بارد
لما الرز اللى حطيناه فى الشوربة استوى اوى يعنى 10 دقائق و ننزل باللبن المخلوط بالدقيق على الشوربة بس نخلى بالنا ايد بتقلب و ايد بتصب الخليط
مهمة اوى الخطوة دى يا بنات علشان ما يكلكععش
و طبعا انا كنت بصور بايد و بحط بايد بس حطيت نقطة و بعدين سبت الموبايل و قلبت بسرعه
هههههه
و نشوف القوام لو تخين نخففه بشوية لبن و لو خفيف نزود دقيق بس يكون مدوب فى شوية لبن صغيرين
بعد كده نحمر البصل المقطع فى طاسة
لما البصل يحمر ننشل شوية من الزيت و نحطهم لوحده فى الطبق حوالى نصفه او اكتر شوية
و الباقى بنطشه فوق الكشك
نقلبه على بعض و يغلى غلوة لمده دقيقة و نطفى و نغرفه فى الاطباق
ده البصل اللى انا حجزته علشان ارشه على وش الكشك
و فيه كده معلومة حابة اقولكم عليها
علشان تطلعى البصل المحمر مقرمش و مش شارب زيت و انت بتحمريه خللى الزيت كتير شوية و النار هديها ما تعليش النار خلى البصل ياخد راحته فى السوا
و ده اساسى طبعا فى الكشرى لازم البصل المحمر جنبه
و دى صورة الكشك بعد ما غرفناه
و يارب اكون عرفت اعمل الموضوع حلو عشان انا جديدة فى القسم ده و طبعا عاوزة منكم تشجيع
مواضيع هذا القسم برعاية
batoot40 batoot40 337466_5.gif ممنوعة من المشاركة Fatakat 337466 الغربية – مصر