حبايبي الحلوين ورجعتلكو تاني بطبق جديد وهو الفته
اه شويه رز وعيش محمص وشويه شوربه واقلب 
ده مفهوم الفته عند كتير مننا انها الاكله السريعه اللي بنعملها علشان نرتاح من الطبيخ ووجع القلب
ده كان زماااااااااااااااااااااااااااااااان
الفته ليها اصولها وتكاتها اللي بتخلي كل اللي يدوقها عندك يقول يا تري ايه السر
ندخل علي الطريقه وطبعا مع التكات
رز ابيض عادي
صلصه الطماطم متسبكه مع توم وخل
لحمه بلدي محترمه ويفضل موزه مسلوقه ومحمره
عيش شامي متقطع مكعبات ومحمر في زيت دره او سمن بلدي
لحد كده مافيش جديد
الجديد في التكات
والاااااااااااااااااان مع فقره
تكااااااااااااااااااات نوسه
1- الرز الابيض العادي جدا مافيهوش اي حاجه جديده بس بلاش فلفل اسود علشان بيغمقه
2- العيش وهو اهم حاجه في الفته
في ناس بتستسهل وتحطه في الفرن يتحمص وخلاص ولما تنزل عليه الشوربه يبقي اقرب لالكل الفراخ
هانجيب عيش شامي مش اسمر ونقطعه بالمقص انا عامله مقص مخصوص للعيش وللاكل عموما مش باستخدمه في اي حاجه تانيه
طب ايه فايده المقص يا نوسه
سؤال وجيه جدا
المقص هايقطع العيش مكعبات متساويه
لانك لو قطعتيه بايدك هايبقي واحده كبيره وواحده صغيره وعند التحمير هاتلاقي واحده نيه وواحده محمره وكمان هايبقي شكله مش حلو
نحمر العيش في زيت دره او عباد وننشله بسرعه علي مصفاه مخرمه ونسيبه يصفي الزيت اللي فيه
بجد العيش كده احلي الف مره وبيبقي طعمه جااااااااااااااااااامد
3- هانحمر اللحمه في سمن بلدي ونطلعها نرش عليها ملح بفلفل
4- مكان التحمير بتاع اللحمه هانعمل الطشه منها مش هانرمي السمنه البلدي ومنها هاناخد طعم تحمير اللحمه
نحمر كميه توم معتبرين
ونطشها بالخل وظبطي ملحك وفلفلك
هنا بقي قدامك حل من الاتنين اما اننا نسيبها كده للي بيحب الطشه بالخل والتوم
واما اننا ناخد شويه علي جنب الاول من الطشه وبعدين نضيف عصير طماطم متصفي ونسيبها تتسبك شويه ودي طريقتي المفضله
5- شويه التشه اللي شيلناهم هانحطهم في طاسه ونحط عليهم شويه شوربه ونحط العيش وناخده لفه مع التشه والشوربه وعلي طول نحطه في طبق غويط وفوقه الرز والصوص علي الوش وقطع اللحمه
وماننساش نزينها برضه ونقدمها بشكل يفتح النفس
بجد طعمها رهييييييييييييييييب واكتشفت ان في ناس كتير مش بتعملها كده وبيعجبوا قوي بيها لما بيدوقوها فقلت انزلها في موضوع
جربوها مش هاتندموا
والي لقاء في موضوع اخر من مواضيع نوسه
مواضيع هذا القسم برعاية
نوسه الملحوسه نوسه الملحوسه فتكات غالية قوي Fatakat 269320 التجمع الخامس – مصر