السلام عليكم يا احلي فتوكات
انا ح احكي اللي حصل لي طول فترة انتظار حمل استمرت سنتين ونصف بدون حمل خااالص ولا مرة
انا بدات من 4 شهور جواز اسال لان جالي نزيف استمر 10 ايام وعرفت من تحاليلي ان عندي اضطراب ف الغدة وبعدها بيومين عملت لي سونار وقالت لي ان عندي تكيسات ع المبايض اثناء الفترة دي حملت بنت خالتي متجوزة بعدي بشهر وطبعا اسئلة واحراجات بالعبيط لدرجة اني تقريبا مبقيتش اكلم حد
المهم اخدت علاج 3 شهور من غير اي تحسن (منشطات ومتابعة تبويض) وتقول لي مفيش ستجابة للعلاج
غيرت الدكتورة بدكتورة تانية واخدت العلاج بطريقة تانية اخدت مانع حمل شهرين وبعدهم راحت مدياني اخد 2 كلوميد مرة واحدة مش واحدة الصبح وواحدة بالليل وحصل تبويض الحمد لله وفرحت يومها زي مافرحت بخبر حملي كنت حاسة ان اخيييرا فيه تبويض وكتر الددكاترة والعاج جاب لي المرض وحسسني ان في امراض الدنيا واني عجزت خلاص هههههه
المهم 3 شهور من غير حمل
وروحت لدكتور تاني عمل لي كل التحاليل تاني واشعة الصبغة ولقي عندي انسداد وكتب لي حقن ف الرحم اخدها كل احد واربع من بعد البريود ماتخلص لغاية اليوم 12 منها يعني الشهر اخد بتاع 3 حقن كده (وممنوع الجماع)
هو اللي بيديها بنفسه ف العيادة
منتهي الالم والاحراج والعذاب بس قلت برده احسن من العملية واسمها مش جراحة وكان نفسي احمل طبيعي
اخدتها كام شهر من غير علاج وبعدين بدا يكتب لي منشطات كنت باخد علاج ف الشهر فوق ال300 جنيه وبعد 3شهور تابعت تبويض(وده طبعا كان غلط لان المفروض مادام بيكتب منشط يتابع تبويض) المهم عرفت ان كتر العلاج عمل لي سمك في بطانة الرحم غير زيادة وزن حوالي 15 كيلو ف كام شهر
وروحت له قال لي اوقف كل العلاج واعيد التحاليل كلها واشعة الصبغة وطبعا ماروحتش تاني لان مافيش داعي يخليني اعيد اشعة الصبغة (تتعاد لو مثلا عملت عملية ولا حادثة ولا اي حاجة تخليه يخمن ان فيه نغيير طرا عليها ولاني اتالمت فيها جدااا وكنت لوحدي عشان معرفش حد ولا حتي ماما وبابا وجوزي كان في الشغل )
وسيبته ولفيت علي دكاترة كتير منهم اللي عرفته من فتكاات ومنمهم اللي عرفته من برا وكتير منهم قال لي الانابيب مافيهاش حاجة ما عدا اتنين قالوا لي فيها التواء الاتنين فيهم نفس الالتواء وده بيمنع الحمل ولازم منظار وكلهم اصلا كانوا جمعوا ع المنظار عشان كانوا شايفين مادام عملت كل حاجة غير جراحية يبقي لازم جراحة وكلهم قالوا حقن الرحم دي مش مفيدة وسااعات كمان بتضر
كنا داخلين علي رجب قلت بلاش اعمله دلوقت خليني اخس الاول وخسيت حوالي 15 كيلو منهم 10 كيلو ف 3 شهور لمجرد وقفت الارز والمكرونات والعيش والفينو واخد نشويات من البطاطس بس وغير كده اكل اللي انا عاملاه عادي
المهم عملت المنظار مع واحد من الاتنين اللي قالوا لي ع الانسداد واخترت اكبرهم سنا والحمد لله ربنا جعله سبب بعد ماكنت تعبت لف ومنهم اللي يقول حقن مجهري بس الحمد لله انا اخر مرة وانا نازلة من عند الراجل اللي قال لي ع الحقن ده قلت مش الاهم الدكتور الاهم ربنا ياذن لي بالشفا
صدقيني والله احسن دكتور في الدنيا مش ع الارض احسن دكتور هو رب العالمين وهو وحده الشافي
وعملت المنظار وخرجت بعدها بنص ساعة مالمستشفي وبعد يومين قمت واتحركت وعادي
وعدي شهرين من غير حمل وانا علي اخري بكل معني الكلمة
وكلمتني مدرسة القران اللي كانت بتديني ف ابتدائي وانا بحكي لها قالت لي الاستغفار قلت لها باستغفر الت لي كل لحظة وطول ما انت قاعدة وركعتين بالليل تفتكري ربنا يرد سائل يطرق بابه كل يوم بعد ما الكل ينام يقوم هو يسال ويطلب ويستغفر….. طبعا لا
ربنا كريم انت بخيلة ومستخسرة ف نفسك وفعلا والله دوام الاستغفار ده باب كبير للرزق والفرج وكل خير
وربنا اذن بالحمل بعدها بشهرين
كنت بدات اخاف بصراحة بس اخدت بكل الاسباب وعملت تحليل بعد الجماع وطلعت لي مشكلة العدد عند زوجي
يعني اخلص م الغدة يطلع لي تكيسات وبعدا التصاقات الانابيب والتواء والعلاج يزود سمك الرحم وبعد ما اعمل العملية يطلع لي العدد
يااااااااربي
كل مرة كده مشكلة ورا مشكلة …… اللهم لا اعتراض
بس توكلت علي الله
ومشيت علي جدول خليني اعرفكم عليه
– عندي دايما قرفة ف البيت ومن اول يوم دورة اخد قرفة 4 ايام واسبوسيد اطفال مرتين عشان يرفع سيولة الدم وينزل مني دم كتير ف البريود لان كان بينزل دم قليل من لغبطة الهرمونات
– من اول يوم لمدة 10 ايام اخد اناناساية كل يوم او لو زنقت ممكن اتنين عصير اناناس
– كل يوم باخد معلقة قسط هندي صغيرة ممسوحة ابلعها بالمياه بجد ممتازة للغدة وللكسل وتديكي نشط اعملوا عنها سيرش وانتم تعرفوا بس بعد الغدا مش علي معدة فاضية
– كل يوم ع الريق معلقة عسل بالخلطة بتاعة طلع النحل وحبوب لقاح وعندي كيس حبوب لقاح كنت بحطه لجوزي ف السندوتشات ف السر كده عشان العدد والسيولة عنده كانت بعافية شوية
– الدايت الصحي وخصوصا دهون البطن لان مشكلة التكيسات ف دهون البطن
الاهم من كل ده الاستغفار الاستغفار الاستغفار والدعاء
رب هب لي من لدنك وليا
رب لا تذرني فردا وانت خير الوارثين
علي فكره الشهر اللي حصل فيه الحمل حاولت اشغل نفسي قدر الامكان يعني كروشيه قراءة اي حاجة حتي لو بالي مشغول اشغل ايدي عشان اتلهي ولما الدورة اتاخرت كنت خايفة اعمل تحليل اصلها ياما اتاخرت ومطلعش حمل وياما عملت تحليل ويطلع سالب ولما شوفت خطين حمل مصدقتش
معقولة انا زي كل الستات ممكن احمل واشوف شرطتين حمل … يارب ما يحرم حد ابدا م الفرحة دي
وربنا كرمني بمريم ونزلت لسبوعها موضوع علي فتكات عقبال كل مشتاق ربنا يرزقه اللي يتمناه
لو افتكرت اي حاجة ح اجي اكتبها ولو اني عارفة انكم صدعتم ع الاخر
بس انا ياما استفدت منكم وياما قريت مواضيع عيني دمعت واتمنيت ييجي يوم اكتب موضوعي وربنا كتب لي وبكره يكتب لكل اللي بتقرا موضوعي باذن الله
لو استفدتم منه ماتبخلوش علي بالرد والتقييم ولو ضيعت من وقتكم اعذروني
ايات فتكات ايات فتكات 67311_3.gif فتكات ست الكل Fatakat 67311 القاهره – مصر
سبحان الله و بحمده