السلام عليكم
ازيكم يا فتوكات انا النهاردة جيبلكم وصفة جميلة وسهلة اوى
وهى اننا حنغير فى حشوة الرقاق التقليدية
طبعا معطمنا بيعملو بلحمة مفرومة
انا قلت ليه منغيرش فى الحشو يعنى ممكن فراخ ممكن سجق
ممكن بحباش البيتزا
كمان كان فى عضوة هنا كانت حشياه بالكبد والقوانص
يعنى اهو تغيير
تعالو نشوف الطريقة :
جبت نص كيلو رقاق ونص كيلو سجق ممكن تقللي براحتك طبعا بدأت بالرقاق سقسقته فى الشوربة
ورصيته راقات بين كل راق معلقة سمنة سايحة عشان يبقى مورق ميبقاش ملزق زى ورق الكراسات
حطيت نص الكمية وبدات احشي بالسجق
( السجق سلقته فى مية وصفيته وقطعته قطع صغيرة وعليها قطعة جبنة شيدر مبشورة وفلفل اخضر وطماطم مقطعاها صغنونة )
وبدأت ارص النص التانى من الرقاق خلاص خلصت ؟
لا طبعا لسة .. قطعته قطع قبل ما يدخل الفرن طبعا وبعد ما اتقطع جبت ( كوب لبن وعليه بيضة مخفوقة ونترة فلفل اسمر عشان ظفارة البيض طبعا ) وقمت حطاهم على الرقاق المتقطع فى الصينية
سبته حوالى خمس دقايق كدة وحطيته فى الفرن على درجة حرارة 200 لمدة 25 دقيقة وطلعته يبرد شوية واتقطع واتاكل طبعا
قدمته مع بطاطس محمرة وكاتشب وكانت غدوة جديدة وخفيفة
اسيبكو مع الصور
هنا لما تقطع وحطيت علية اللبن والبيض
وهنا هنا لما طلع من الفرن انا تعمدت اطلع لونه كدة عشان لو اتحمر عن كدة حيقرمش وانا عوزاه يبقى طري زى الفطير
وهنا لما اتقطع واتقدم مع البطاطس والكاتشب
جربوه ان شاء الله هيعجبكو
سلام مواضيع هذا القسم برعاية
Sara Bernar Sara Bernar 187595_1.gif فتكات غالية قوي Fatakat 187595 الاسكندرية – مصر