ازيكو يا احلى فتوكات انا جايبة لكم النهاردة طريقة طبخ الخبيزة طبعا كلكم شاطرين بس ممكن يكون فيه بنات جداد لسه فى موضوع الطبيخ و ما يعرفوهاش او ممكن ما يكونوش بيعملوها فى بيتهم زى حالاتى كده ما كناش بنعملها فى بيت ماما خالص علشان بابا ما بياكلهاش
انما بقى لما اتجوزت لقيت جوزى بيحبها جدا فبالتالى اتعلمتها من حماتى و بقيت فيها شاطرة جدا بشهادة الجميع يالا نسمى و ندخل على المقادير
1 – خبيزة متقطفة و مغسولة
2 – كزبرة خضراء
3 – ثوم
4 – شوربة
5 – طماطاية كبيرة او 2 صغيرين
6 – ملح و فلفل و بهارات و كزبرة ناشفة
7 – معلقتين رز ناشف
اول حاجة هنغسل الخبيزة كويس جدا بعد ما نقطفها باننا نحطها فى حلة تحت الحنفية و ننشلها من المية فى مصفاة و نكرر العملية كذا مرة لحد لما نلاقى المية بقت رايقة و مفيهاش تراب و لا رمل
بعد كده نحطلها مية نضيفة و نرفعها على النار علشان تتسلق كويس و نعرف انها استوت بعد حوالى نصف ساعة نطلع ورقة و نضغط عليها باصابع الايد لو اتهرت بين صوابعك و انت بتفركيها يبقى كده استوت لو جامدة و ما رضيتش تتفرك يبقى لسه و نسيبها على النار شوية كمان
بعد ما تستوى نصفيها فى مصفاة و نسيبها تهدى شوية
و بعد كده نحطها فى الخلاط بتاع العصير و نحط معاها الطماطم و الكزبرة الخضراء و الشوربة و نضربها كويس لحد لما تنعم
نرجعها الحلة تانى و نضيف لها الرز المغسول و المنقوع شوية و نسيبها تستوى لحد لما نلاقى الرز استوى و الخبيزة تخنت و بقى لها قوام و ما بقتش سايلة زى الاول
و ما ننساش نظبط الحدق و نضيف الملح و الفلفل و رشة بهارات صغيرة
و الخطوة الاخيرة اننا بنعمل لها طشة زى بتاعت الملوخية بالضبط ندق التوم معاه كزبرة ناشفة و نحمرهم فى ملعقة سمن و لما لونها يبقى ذهبى نطشها على الخبيزة
و نسيبها تاخد غلوة مع التوم 3 دقايق و نطفى و انا بعملها لازم بيكون معاها صلصة كمونية و دى طريقتها سهلة اننا بنجيب توم مفروم و عليه كمون و نحمره فى سمنة و نضيف له الطماطم المعصورة و شوية كمون كمان و ملح و فلفل و لما تتسبك الطماطم نزودها شوربة و لما تغلى نطفى و نغرفها
و عملت فراخ مشوية كلنا بنعرف نعملها ماشاء الله المدونة مليان طرق مختلفة للفراخ المشوية و قدمت معاهم رز بالشعرية و مخلل جزر و لفت و فلفل كمان صنع ايدى و حياة عينى
دى صورة لطبق الخبيزة
و دى صورة السفرة كلها و الاطباق الى عملتها و على راسهم طبق الخبيزة وصفتى النهاردة يارب يكون عجبكم
ادعو بالرحمه والمغفره لاختنا في الله batoot40
مواضيع هذا القسم برعاية
batoot40 batoot40 337466_5.gif ممنوعة من المشاركة Fatakat 337466 الغربية – مصر