السلام عليكم يا احلي اخوات في الدنيا
الحمد لله اتجوزت من شهر وعايزة افيدكم زي ماستفدت كتييييييييييير من هنا وكنت بدخل اقرا بس .عملت العضوية علشان اقول وافيدكم
ويا رب يسهل لكل البنات يا رب ويتمم لهم علي خير يا رب
الجهاز
اول حاجة بتخلي البنت محتاسة ونفسها تشتري كل حاااااااجة ..بصي خديها مني نصيحة العبرة مش في الكتير .العبرة انك تجيبي الحاجة اللي هتستفيدي بيها وتفكري مرة واتنين قبل متشتريها علشان حرام تحطي فلوسك في حاجة مش مهمة
عن نفسي جبت الاساسيات بس بس اخترتهم بعناية وكمان الالوان والتناسق والحمد لله بشهادة الجميع شقتي عجبت كل اللي شافها مع اني حاجات كتير مش جبتها بس التناسق والذوق والترتيب اهم حاجة
مجبتش الميكرويف ولا غسالة الاطباق ولا التويستر ولا الفرن الكهربائي ولا الديب فريزر مش هحتاجه دلوقتي..في نيتي اجيب الميكرويف بعدين ان شاء الله
الاجهزة البوتجاز يونيفرسال وحلو معايا جدا الحمد لله مع ان ناس كتير كتبت هنا قالت مش حلو والغسالة الاتوماتيك باردو يونيفرسال وحلووووووووووة جدا جدا وانا اخترت الموديل اللي فيه بتنشف وتمكوي لانها عملية اكتر بالنسبة لي
التلاجة توشيبا تلاتة باب ووهم .بتاخد حاجات كتير والفريزر كبير وكمان درج الخضار كبير وحلو
المهم وانتي بتجيبي حاجتك تصلي استخارة قبل متنزلي وادعي ربنا يكتب لك الخير علشان صدقيني اللي بييجي بييجي مرة واحدة وسيبيها لله
الكيتشن ماشين جبتها براون مالتي كويك 5 وحلوووووة قوي قوي وكبيرة يعني اعصر فيها الطماطم علي مرتين بس واخزنها وكمان المفرمة وبعمل الكيك بس مش فيها مطحنة
المطحنة لوحدها مونوليكس وبطحن توابلي فيها وحلوة
وكمان مفرمة مينتا الاتنين في بعض حلوة لما اعمل اكل كميته صغيرة وحلوة قوي عاملة واحدة لفرم التوم والبصل والتانية لو بعمل صوص شيكولاتة او حاجة حلوة علشان الريحة
السخان اوليمبيك والمكواة والمكنسة فيليبس وهايلين
اللبس
مجننا طبعا
ودة علي حسب امكانياتك و ذوقك بس فيه اساسيات يعني
الاندرات القطن كتري يعني دستتين حلو ويا ريت تنزلي تجيبيهم جملة من الموسكي اوفر
البراهات مش تكتري قوي يعني كفاية من 10 ومقاسك هيتغير
اللانجيرهات نوعي من قصير وطويل وشوفي ذوق جوزك الاول وعامة باردو مش تكتري يعني من كل لون حاجة ومتكرريش لون ولا موديل كفاية 12 او 15
حاجات صغيرة بس بتفرق
من الحاجات اللي جبتها وافادتني جدا
التربو الادراج شايل السكر والمكرونة وحاجات كتير وشيك جدا
الفتالة اللي بتدور وتتعصر دي حلووووووووووووة من اناهردة لبكرة كانت ماما جايباها بحوالي 130 جنيه
الجوانتي اللي بيلمع التراب كنت جايباه من محلات 2 ونص وهايل جدا بيشيل التراب وكمان بيلمع المرايات من غير جلانس
هاتي فوط للمطبخ كنت جايباها من المترو الخمسة بعشرة جنيه جبت خمسة لونهم غامق للمسح وخمسة لونهم فاتح بنشف بيهم الاطباق والفاكهة ..حلوين كتري وميهمكيش
نصايح عامة
حبيبتي ربنا يكرمك بس خدي بالك من تكات كدة الانطباع الاول يدوم يعني ترتيبك لحاجتك وتنسيقك ليها في الاول هيبقي دة انطباع الكل عنك ..
خليكي ليدي في معاملتك وشيك حتي في طريقة تقديمك حاجتك لضيوفك وزي ماقلت مش بالعدد ولا بالكتر بس ممكن الحاجة تقديميها باكتر من شكل وطريقة ودة اللي يفرق ست لست
سيبها لله ومتتوتريش وكل حاجة هتمر ان شاء الله بأمره
عيشي احلي ايام حياتك وافرحي ومتخليش حاجة تعكنن عليكي لانك هتبقي مشدودة غصب عنك .صدقيني كله بيعدي
دة اللي انا فاكراه دلوقتي
ربنا يصلح حال البنات جميعا ويفرحكم
ويا رب يجعلني من حوامل الشهر دة ..
قولوا امين
اسيبكم دلوقتي وارجع لكم تاني ان شاء الله
في امان الله
Habibt Kajoo Habibt Kajoo فتكات جديدة Fatakat 1103189 الجيزة – مصر