السلام عليكم يا فتاتييييييكي
بصوا بقى انا اللي خلاني اكتب الموضوع اني جربت التومية كتير وقليل مرة اعملها بالبطاطس زي ما كنت بعرف بس مش بتطلع اد كده ومرة بزلال البيض بردو لا مش زي بتاعت الجامعة ابدااااا (قبل ما اتخرج كنت باكل سندوتش في الجامعة سورى عليه تومية تحححححفة) المهم لما اتخرجت مبقتش بروح كتير فيأست طبعا اني اعمل زيها
قووم ايه بقى جربتها على طريقة واحدة في احدى المواقع الاخرى الله يبارك لها …لاقيتها احلى من برة كمان قلت لاااا لازم اقولها لفتوكاتي حبايبى اللي استفادت منهم كتير
معلش طولت عليكم ندخل بقى ع المقادير
فصين توم كبار (او3 صغيرين)
معلقة صغيرة عصير ليمون (عصرة نص لمونة كده)
رشة ملح
كوباية الا ربع زيت ذرة
6 او 7 معالق كبار نشا
كوباية ونص مية
الطريقة..
الاول تحطي النشا على المية على نار هادية لمدة حوالى 3 دقايق لحد ما تبتدى المية تتقل زى المهلبية كده وتطفي عليها وتسيبيها تبرد (ودي اهم تكة علشان تكون التومية لونها ابيض ناصع) ولما تبرد تحطي في الخلاط الثوم وعصير الليمون والملح (رشة بسيطة متكتريش) وعليهم النشا بالمية اللي هي المفروض بردت تحطيها عليهم في الخلاط وتشغليه
وهو شغال تضيفي الزيت يادوب خيط رفيع مش مرة واحدة لحد ما الكمية تخلص وبس خلاص والله احلى من بتاعت برة ومقاديرها سهلة جدا موجودة في كل بيت
بصي انا مش هقولك قيمي وخلاص بس جربيها واتحداكي لو ما جيتي تقيمي بعدها
في امان الله
مواضيع هذا القسم برعاية
noora.elnahas noora.elnahas 552038_1.gif فتكات هايلة Fatakat 552038 القاهرة – مصر