ازيكوا يا فتاتيك يارب تكونوا بخير
من زمان وانا عايزه انزلكوا طريقتى فى عمل الفلفل المشوى كمقبلات
لكن بصراحه كنت دايما انسى اصوره لكن المره دى الحمد لله افتكرت
هوه طعمه حلو جدا وينفع كمقبلات او مع الوجبات او كحشوه للمعجنات
لكن انا عن نفسى ساعات اكله لوحد مع عيش محمص كعشاء او تصبيره بين الفطار والغدا او العشاء
المقادير
فلفل اخضر (يفضل انه يكون من النوع الكبير ويكون تقيل مش خفيف )
زيت زيتون او ممكن زيت ذره اوعباد لكن طبعا زيت الزيتون افيد واطعم
ملح
وبس كده
الطريقه
بنغسل الفلفل وننشفه بفوطه
وبعدين لو عندك شبكه زى دى مثلا بنحطها على البوتاجاز
وبعدين نرص عليها الفلفل علشان يتشوى
وبنكون مجهزين حله او علبه بغطاء علشان اول مايتشوى الفلفل نحطه فى العلبه ونغطى عليه علشان نكتم البخار
وبعد كده يبقى تقشيره سهل
وممكن لو مش عندك شبكه تشوى الفلفل مباشره على النار لكن هاياخد وقت وهايبقى متعب
وبعد ماتخلص كميه الفلفل كلها نسيبها فى الحله مقفول عليها لغايه ماتبرد ونبتدى نقشرها
اللى هيه القشره السودا الخفيفه اللى اتحرقت من الشوى
لكن اوعى تغسلى الفلفل اوتكون ايدك مبلوله وانتى بتقشريه
اولا هايضيع طعم الشوى ثانيا الفلفل هايبوظ وهايتكون عفن فى الزيت
انا كنت كل شويه اقشر كام فلفله واغسل ايدى وانشفها كويس واكمل تقشير
وبعدين بنفتح قرن الفلفل من تحت نصين علشان نعرف نشيل البذر بالشكل ده
وبعدين نرش عليه ملح بسيط
وبعدين نقطعه سلايس كده يعنى شرايح رفيعه بايدينا
ونكون مجهزين البرطمان او العلبه اللى هانحط فيها الفلفل ويفضل انها تكون زجاج
ونملا نصها زيت زيتون
وكل مانقطع شويه نحطهم فى الزيت
لغايه مانملا العلبه
ونغطيها كويس ونشيلها فى التلاجه ناخد منها كل مانحتاج بس بشوكه جافه مش مبلوله
انا عملت كيلو فلفل طلع العلبتين دول
وانا عن نفسى باحب اقطع العيش الفينو بالورب واحمصه شويه فى الميكروويف واحط عليه الفلفل كده
ان شاء الله لو جربتوه هايعجبكوا جدا
معلش يا فتاتيك
انا دايما اضغط على كلمه اعتمدى الموضوع بالغلط قبل مايكمل
مسطوله بقى معلش مواضيع هذا القسم برعاية
ام لوزه وبسبوسه ام لوزه وبسبوسه 283570_14.gif فتكات رائعة Fatakat 283570 الرياض – مصر