السلام عليكم ورحمة الله وبركاته
انا عارفة ان شوربة العدس سهلة
بس فيه ناس كتيييير جداااااااااا مش بتعرف تعملها وانا اول ما اتجوزت ما كنتش اعرف اعملها ولا عمري اكلتها بس لاقيت جوزي بيحبها قولت لازم ولابد اني اتعلمها والحمد لله بقيت باعملها وبتطلع تحفة بجد
ان شاء الله تجربوا طريقتي دي وتعجبكم
_______________________________
نيجي للمهم بقى
1-المقادير:
1- كوبان عدس متنقي ومغسول ومنقوع ربع ساعة
2- طماطمايتين متقطعين + بطاطساية وسط متقطعة رفيع + جزراية وسط متقطعة رفيع ( ممكن نبشر الجزر والبطاطس)
3- بصلاية متقطعة مكعبات صغيرة جدا ( ممكن نبشرها)
4 – فص توم مدقوق نااعم جدا
5 – كبشة مكرونة اد ضمة الايد
6 – معلقة كبيرة صلصة طماطم
دي بقى البهارات
1-معلقة صغيرة ممسوحة كمون
2- شوية فلفل اسمر
3- ملح حسب الرغبة
4 – شوية شطة ناعمة
2- طريقة التحضير:
اول حاجة هنحط كل المكونات (العدس والطماطم والجزر والبطاطس ) مع بعض بس من غير البهارات
ونغمرهم بالمية ونحطهم على النار… اول ما يغلوا هنوطي عليهم خااالص لغاية ما كل حاجة تستوي وحجمهم يتضاعف…
دي المكونات مع بعض
وهنا بعد ما بردت خااالص ( زي ما هنشوف العدس شرب المية اللي كانت فاضلة وبقى تقيل جداا)
كده احنا تمام هنيجي بقى للمهم ان شاء الله
اول حاجة هنجيب حلة ونحط فيها شوية زيت وفوقيهم البصلاية ونفضل نقلبها لغاية ما تدبل خالص بس ما نخليهاش تحمر يدوب بس تصفر بسيط زي الصورة اللي على اليمين
بعد كده هنجيب مصفى تكون مقاس الحلة اللي صفرنا فيها البصلاية لو مش موجوده نصفي العدس في اي حاجة تانية وبعدين نصبو فوق البصلاية
دي المصفى اللي انا استخدمتها حاطاها فوق الحلة
دي الوقت بعد ما العدس كان برد تماما هناخده نضربه في الخلاط
هناخد نص الكمية وعليهم نص كوباية مية ونضربهم في الخلاط كويس قوي زي الصورة اللي تحت
وبعد كده هنروح نحطهم فوق المصفى وناخد نص الكمية التاني بردو وعليه نص كوباية ميه ونضربه في الخلاط ونروح نفضيه في المصفى
ونفضل نقلب بالمعلقة كويس جداااااااااااااااااااااا لغاية ما العدس يتصفى خالص ( في ناس مش بتصفيه على فكرة ) بس اضمن انك تصفيه
الصورة اللي جاية هتوضح
1- العدس في المصفى
2- بعد ما قلبنا العدس ونزلناه في المصفى
_______________
هنا بقى صورة العدس بعد ما اتصفى وبقى ناعم
هنجيب بقى البهارات كلها وهنحطها فوق العدس ونقلبه كويس وهو لسه على البارد قبل ما يسخن (عشان الكمون ما يكلكعش )
كل شوية هنيجي نقلبه في الوقت ده (واحنا مستنيينه يغلي)
هنجيب معلقة الصلصة مع نص كوب ميه وندوبها كويس جدا زي الصورة كده ونسيبها على جنب لغاية ما نستخدمها
دي صورتها بعد ما دوبناها في الميه
بعد كده هنجيب طاسة ونحط فيها شوية زيت صغيرين جدااا ونحط عليهم المكرونة ونقلبها باستمرار عشان ما تتحرقش اول ما تتحمر نضيف التوم وتقليبتين ونطفي بس تشمي ريحة التوم تطفي على طول
في الوقت ده هتكون الشوربة سخنت كويس هنضيف الصلصة اللي دوبناها في المية ونقلبها كويس قوي
واول ما الشوربة تغلي هنضيف المكرونة والتوم
ونوطي عليها لمدة 10 دقايق مع التقليب من وقت للتاني وبعد كده نطفي النار ونسيبها ربع ساعة متغطية قبل التقديم
______________________________
(لييييه هنطفي قبل ما المكرونة تستوي ؟؟؟ )
لما نطفي والمكرونة لسة ما استوتش في الربع ساعة اللي قبل التقديم هتكون المكرونة كملت سواها براحتها وما عجنتش وهتكون الشوربة هديت وطعمها بيتركز اكتر عشان المكرونة بتشرب السوائل الموجودة وبتخلي الشوربة تتقل شوية
دي بقى بعد ما استويت خالص وبعد ما الربع ساعة عدت شوفوا بقيت تقيلة ومركزة اكتر
كده الشوربة خلصت
بس ما تمشوش …………………………
.
يتبع
.
.
. مواضيع هذا القسم برعاية
ام يارا ولارا ام يارا ولارا 668967_6.gif فتكات ست الكل Fatakat 668967 الاسكندرية – مصر