كل سنة وانتوا طيبين يا فتوكات وربنا يبلغنا كلنا ليلة القدر
ويارب يعود عليكم ايام العيد بالفرحة والسعادة والخير
ويصلح حال بلدنا ويوحد الشعب ع كلمة الحق ويولى عليها من يصلح قولوا امين
زى ما فى العنوان كده انا طبعا بقعد اتفرج ع الفتوكات ومواضيعهم الجميلة وعزموتهم فى قسم الطبخ فانا اتغظت جدا ومفيش حد عزمنى وقالى تعالى اتفضلى ولا اى حاجة قولت انا هعزم نفسى وخلاص
عملت بقى ايه رز بالخلطة الى حبيته جدا من بعد معملته وفراخ بالزبادى فى الفرن طلعت والله من غير مجاملة الاتنين طلعوا احسن من بتوع المحلات وخصوصا لانى اكلت قبل كده برا رز بالخلطة بس الى انا عملته طلع احسن بكتير ومن اول مرة و عملت ع قدى بس لان الى عندى فى البيت مبيحبوش الرز بالخلطة وانا قولت كمان عشان لو الاكل مطلعش حلو وانا اول مرة اعمله مدبسهمش معايا يقوموا عليا هههههههههه
انا مصورتش الخطوات عشان انا بدات اعمل الاكل متاخر قبل الاذان بنص ساعة واكلت ع العشاء انتوا اعملوا حسابكم بقى انتوا طبعا هتضعفوا الكمية لانى عملت ع ادى بس
مقادير الرز :
1/2 كوب رز
1 كوب مرقة فراخ او لحمة او ماء
1 بصلة صغيرة
1 فلفل اخضر صغير
كبدة فرخة واحدة او قنصة
فلفل اسود ، ملح ، كارى ، كركم
زيت
الطريقة :
هنبشر البصلة ناعم ونقليها فى معلقة زيت ونقطع الفلفل صغير ونقليها مع البصل ونقطع الكبدة او القنصة ونقليها معاهم لغاية لما يصفر نحط المرقة او الماية ونحط نص معلقة صغيرة ملح وربع فلفل اسود ومعلقة كارى ممسوحة وربع كركم ونقلب لغاية لما المرقة تغلى وبعدين نكون غسلنا الرز قبلها ونحطه ونقلب ونسيبه لما يغلى والماية تنشف شوية وبعدين نوطى النار خالص ونغطيه ونسيبه لغاية لما يستوى .
دى صورته وانا حطيت حوليه من الحاجات الى كانت مع الفراخ للتزيين .
صورة تانية
مقادير الفراخ :
ربع فرخة
نص علبة زبادى
خل
نص لمونة
كل البهارات ( ملح ، فلفل اسود ، شطة ، زنجبيل ، زعتر ، كركم ، كارى )
كيس كاتشب
بصلة مفرومة
طماطماية صغيرة
فلفلاية خضرة صغيرة
الطريقة :
هنحط الخلطة دى كلها ع بعض ونعمل بيها الفراخ كويس وطبعا هنقطع البصل والطماطم والفلفل وندخل فى الجلد كده كويس ونحط ع الفراخ ونسبها فى التلاجة شوية هو المفروض اقل حاجة ساعتين بس انا سبتها حوالى ربع ساعة وحططها فى صنية وغططها بورق المنيوم وفى الفرن ع درجة متوسطة وبعد ربع ساعة شفتها كانت قربت تستوى بس بتاخد وقت عبال لما الماية الى نزلتها تنشف شوية وبعد لما خلص كانت مستوية جدا كانت قربت تفرفت طعمها بقى تحفة وحراقة وجميلة الخلطة بتاعتها تتاكل لوحدها ودى صورتها .
صورة اخرى
انا كده خلصت ودى صورة مجمعة للامامير لو تكرمتوا طلب صغنون دعوة بظهر الغيب والتقييم لو مفيهاش تقل عليكم
مواضيع هذا القسم برعاية
amira alamora amira alamora 898284_5.gif فتكات متميزة Fatakat 898284 بورسعيد – مصر