كنت قاعدة باتفرج على التليفزيون ولقتيهم بيعرضوا طريقة اكلها أول مرة اشوفها
عجبتني جدا ولقيت مكونتها بسيطة ومش مكلفة وفي متناول إيد الوحد
الأكلة دي فتة شاورما الفراخ
فقررت اني لازم اجربها وفعلا ماكدبتش خبر .. تاني يوم نزلت جبت الطلبات وقمت عملاها وطلعت تحفة بجد
انا حاقولكم على المقادير والطريقة وياريت اللي تجربها وتعجبها تدعيلي ولو ماعجبتكيش ادعيلي برضه
المقادير :
1/4 ك صدور فراخ
2 رغيف عيش شامي
2 كوب أرز
2 كوب زبادي
توم
خل
كاري
ملح
مايونييز
الطريقة :
أول حاجة جيبي كده صدور الفراخ وقطعيها شرايح صغيرة وحطيها في طبق وعليها كوب زبادي وخل وسبيها في التلاجة ساعة على الاقل
وبعد كده هاتي العيش قطعيه مكعبات وحمصيه في الفرن
واعملي الرز بالكاري … حتحطي شوية زيت في الحلة وتحطي مقدار الرز وتحطي معلقة كاري وتشوحي الرز شوية وتضيفي المية .. ولما يغلي وطي النار وسبيه يستوي
نيجي بقى للصوص اللي حيتحط فوق الاكل وهو التومية
ودي عبارة عن كوباية زبادي حطي عليها معلقة مايونيز وراس توم كبيرة مدقوقة بشوية ملح وحطي شوية خل وقلبها
نيجي بقى للفراخ اللي اتبلت في التلاجة .. جيبي طاسة فيها شوية زيت وحطي عليهم الفراخ وشوية كاري وشوحيهم وسبي الفراخ تستوي
نيجي بقى للغرف .. أول حاجة حنغرف الرز ونحط الفراخ عليه من فوق وبعد كده العيش المحمص وآخر حاجة التومية
* ماتحطيش العيش تحت الرز عشان لازم يفضل محمص .. لو اتحط تحت الرز زي الفتة العادية حيطرى وهو حلاوته في إنه محمص
معلش بقى مافيش صور .. بس إن شاء الله حاحول اعمل مواضيعي بصور إن شاء الله
وياريت ماتنسونيش بدعوة حلوة مواضيع هذا القسم برعاية
guehad guehad فتكات رائعة Fatakat 150600 الاسكندرية – مصر