أنا جايبالكوا طريقة جديدة للمكرونة هى طريقة ليبية أصل ماما عاشت فترة فى ليبيا وعلمتهالى بجد رووووووووووووووووووووووووعة أحلى مليون مرة من المكرونة العادية
المقادير : كيس مكرونة إسباجتى
5 قطع لحمة متقطعة مكعبات صغيرة
كوب حمص شام مسلوق
3ملاعق بسلة خضراء
3 ملاعق فاصوليا خضراء
بصلة مفرومة ناعم
قرن فلفل حار
لتر ماء
لتر عصير طماطم
توابل (ملح – فلفل – كمون – شطة حمرا )
3 ملاعق سمنة أو زيت
ملحوظة : * المقادير دى تكفى 3 أشخاص تقريبا ممكن بأى تضاعفى الكمية على حسب عدد أفراد الأسرة
* الحمص لازم تنقعيه 12 ساعة قبل سلقه عشان يستوى بسرعة ومايغلبكيش فى السوا
الطريقة :
أول حاجة تجيبى حلة تيفال وتحطى فيها السمنة أو الزيت وتحطى عليهم البصلة وتقلبيها شويه لحد ما تدبل (تدبل فقط مش تصفر)
وتحطى اللحمة المتقطعة مكعبات وتشوحيها مع شوية فلفل اسود
طبعا هتنزل ميتها .. تسيبيها لما تتشرب وبعدين تحطى لها كوب مية تستوى فيه وتغطيها لحد ما تتشرب
وبعدين تحطى البسلة والفاصوليا وقرن الفلفل الحار – وده أهم حاجة فى الأكلة كلها – وتقلبيهم شويه ع النار
وبعدين تضيفى عصير الطماطم (خلى بالك كل ده ماحطيناش الملح عشان اللحمة تستوى بسرعة) وتغطيها لحد ما الطماطم تستوى وتقصر وتستوى تمام
بعد كده تضيفى المياه (لتر تقريبا) وتحطى الملح والفلفل والكمون والشطة الحمرا وتغطيها لحد ما تغلى
أول ما تغلى تكسرى المكرونة وتحطيها فيها (ده الجديد إن المكرونة هتتسلق فى الخلطة دى مش فى مياه لوحدها)
وتحطى معاها الحمص المسلوق .. وغطى ووطى البوتاجاز
وكل شويه قلبيها كويس عشان ما تلزقش ولو لقيتيها محتاجة شوية ميه حطى مفيش مشكلة لحد المكرونة ما تستوى وتكون طبعا شربت المياه كلها
واغرفيها بأى وكليها سخنة مولعة وادعيلى مواضيع هذا القسم برعاية
أيام الطفولة أيام الطفولة 365557_1.gif فتكات نشيطة Fatakat 365557 الرياض – السعودية