ازيكوا ياحبايب قلبى
كنت محتارة اعمل غدا ايه بعدين شفت حلقه احد الشيفات وطقت بدماغى قلت يلا اقوم اعمل الاكله دى وهيه كبدة بالردة بس مش مقليه بالزيت مسوايها بالفرن بمعلقتين زيت بسسسسسسسس
وطبعا سلطة الكبدة اللى كلنا لما بنروح اى محل كبدة بنلاقيها عملتها وكانت رووووووووعه وغلبت بتاعت بره
نبتدى بسم الله
المقادير للكبدة بالردة
نص ك كبدة شرايح وتكون رفيعه حوالى ربع راس توم مفروم فرم ناعم او تقريبا 7 فصوص وقرن فلفل احمر حامى وبصلايه وسط متقطعة قطع
وليمون ومعلقه خل والبهارات انا حطيت بقدونس مجفف وبابريكا وكمون وفلفل اسود وكمون وكسبرة ناشفه وعلى طرف المعلقه بهارات كفته
ونقلبهم كلهم على بعض ونسيبها تتبل حوالى من ساعتين الى 3 ساعات
اجهز الردة مع شويه بقسماط وحبه ملح وكمون وبابريكا وبقدونس مجفف وفلفل اسود وكسبرة واقلبهم
ونبدا نغطي الكبدة بالردة ونجهز صاج يكون مدهون زيت خفيف بالفرشه كدة ندهن زيت ونرص الكبدة البانيه فى الصاج وعلى الوش ارش معلقه ونص زيت او معلقتين بس عشان تحمر من الوش وادخلهم الفرن حوالى 4 الى 5 دقايق ونطلعها ونقدمها وبتكون طريه وحلوة وبنفس الوقت كريسبى
ومفهاش زيوت كتير
والصور اهوه بالتفصيل
معلش مش مصورة بعض المكونات
هنا بقى جهزينها وغطيناها بالردة ودهنت الصاج زيت ورصيتها بالشكل دة
نرش معلقتين زيت صغيرين كدة على الوش عشان يحمر ويبقى كريسبى شويه
ودى كدة بعد ما حطيتها بالفرن وشغلت عليها فوق وتحت خلال 3او 4 دقايق كانت استوت ودة شكلها النهائى
ودى زووووم اكتر عشان تشوفو كريسبى ازاى ومش فيها زيوت خالص مالص
ويارب تعجبكم وتنفع الريجيم جدا لانها مفهاش زيوت
اللى جاى بقى سلطة الكبدة زى بتاعت المحلات وللاسف المحلات مش بيعملوها بكبدة دة بيعملوها بالفتات اللى بيقع من الردةفى الزيت وبيستخدموه لما بيصفوا الزيت
وهى كالاتى
ربع كيلو كبدة مقطعه صغير اوى
بصلايه وسط مفروم
فصين توم مفرومين
قرن فلفل احمر او اخضر مفروم ويكون حامى او بارد حسب الرغبه انا عملته حامى
كوب لسان عصفور ممكن احمرة او لا اختيارى بس الافضل الشيف يسرى قال يكون مش محمر
نص لتر مايه او 2كوب ونص
حوالى ربع كيلو طماطم معصورة
لكن انا حطيت معلقتين ونص صلصه
وملح وكمون وفلفل اسود وكسبرة ناشفه
الاول احمر البصل بعدين انزل بالتوم والفلفل الاحمر وبعدها انزل بالكبدة المقطعه قطع صغيرة
واشوحها لما تستوى نص سوا وبعدها انزل بلسان العصفور واشوح شويه ولما يتشوح شويه احط كميه المايه واقلب وبعدها اضيف الصلصه او الطماطم المفرومة
واتبلهم بالتوابل المذكورة فوق والملح
واسيبها تستوى عالنار واقلب بين الحين والاخر عشان لسان العصفور ميلزقش بقعر الحله
حوالى 8 الى 10 دقايق وتستوى وتقدم ضمن السلطات مع الكبدة
وبالصور اهوه بالتفصيل
هنا اشوح البصل الاول والتوم والفلفل
بعدها انزل بالكبدة المقطعه
وبعدين بلسان العصفور واشوحهم شويه
وبعد كدة اضيف المايه واقلب واضيف الصلصه او الطماطم المفرومة
واسيبهم يستوا ودة شكلها النهائى
ودى صورة اقرب
ها ايه رايكم زيها ولا لا وانضف طبعا لاننا عاملينها بالبيت
ويارب يعجبكم ومتنسوش التقييم بقا مواضيع هذا القسم برعاية
غادة الكاميليا2017 غادة الكاميليا2017 422485_11.gif فتكات ست الكل Fatakat 422485 …………… – بلاد الله الواسعه