السلام عليكم
ازيكم يا فتاتيك
انا عملت عرق روستو توحفة تو حفة توحفة
وقلت لازم اقلكم عليه
نبدأ اول حاجة بالمقادير
عرق لحمة حلو كده وملظلظ
وتوم مقطع عيدان وجزر مقطع عيدان
التوابل بقى ملح وفلفل والاساسى القرفة حبة حلوين كده وبهارات لحمة وشوية توم مفروم
هنخرم اللحمة بالمقورة بالشكل ده
وندخل المقورة على قد مانقدر ونعمل كذا خرم
انا عملت 6 من ناحية و4 من الناحية التانية
ونحشي كل خرم حاجة واحد توم وواحد جزر ولو فيه بقدونس برضه شغال بس للاسف معنديش وندخل الحشو برضه بالمقورة او بصباعنا عادى
بعد كده نتبلها بالتوايل بتاعتنا وندعكها كويس
وبعدين نكتفها بالخيط
ونكون مسخنين شوية زيت فى حلة ونشوحها
ويا ريت لو الحلة تبقى بغطا عشان البوتجاز مايتبهدلش
وكل شويه نفتح ونقلبها
وفى نفس ذات الوقت نسخن ميه
وبعد ما تتحمر من جيع الاجزاء نشيلها ونحمر مكانها التوم المفروم
وهنا بقى هناك 3 اختيارات
الاول انك تسويها فى البريستو هتاخد معاكى ساعة ونص بالضبط
التانى انك تسويه فى كيس الفرن وهتاخد معاكى ساعتين ونص تقريبا
التالت انك تسويها عادى فى حلة على البوتجاز وهتاخد منك 4 ساعات او اكتر
انا سويتها فى البريستو و ده شكلها بعد ما خلصت
وانا كنت محتارة اعمل ايه خضار جنبها
قطعت شوية بطاطس مع طماطماية وبصلاية صغيرة وباقى الجزر وحطيت عليه باقى الصوص
وسيبته على النار 20 دقيقة وبعدين حطيته فى صينية فى الفرن يتحمرطلعت جميلة جدا جدا جدااااااا
وفى نفس ذات الوقت عملت الصوص تخين شوية
حطيت معلقة دقيق وقلبتها مع معلقة صغيرة سمنة وضفت عليها الصوص وقلبت كويس وبسرعة
ولما غلى وبقى تخين صفيته بالمصفى
ودى بقى صورة اللحمة بعد ما اتقطعت والجزر والتوم باينين وجنبها الصوص
ودى صورة مع الرز والبطاطس
متنسوش تدعولى دعوة حلوة
والتقيييم نفسى اتقيم كده وابقى قيمة وموضوعى ينزل فى التوقيع
ويا رب تجربوها وتقولولى مواضيع هذا القسم برعاية
bembem bembem فتكات هايلة Fatakat 28174 دمياط – مصر