السلام عليكم ورحمة الله وبركاتة
وحشتونى يافتوكات
النهاردة عملت غدا جديد وطلع حلو قوى ماشاء الله ومختلف فقولت اصور بقى واوريكوا الوصفات
اولا شرايح اللحمة بصوص الخل والتوم
الوصفة دى شوفتها على النت البت الفت وبعدين قولت هو انا هعملها كدة زى ماهى !! ميصحش طبعا انا لازم احط التاتش بتاعى وهو الفلفل الالوان
المقادير
شريحتين لحمة او بوفتيك او ستيك او اسكالوب اى اسم تحبية براحتك
فلفلة صغيرة خضرا
فلفلة صغيرة صفرا
فص توم مهروس
حوالى معلقة كبيرة خل
قطعة زبدة
معلقة كبيرة زيت عشان الزبدة متتحرقش
ملح
فلفل اسود
كسبرة ناشفة
الطريقة
هنحط الزبدة والزيت على النار فى طاسة تيفال ونسيحهم
هنحط اللحمة ونشوحها على الجمبين كدة
هنشيل اللحمة فى طبق وفى نفس الطاسة هنشوح الفلفل والتوم ونطفيهم بالخل كدة
هنرجع اللحمة تانى ونحط التوابل
هنحطلها شوية مية بس منغطيهاش يعنى
ولما تغلى هنغطى الطاسة ونحطها على نار هادية خالص
وكل شوية نبص عليها لو احتاجت مية نزودلها بسيط ونقلب فى اللحمة كدة عشان تتشرب من الصوص التحفة بتاعها ودة شكلها لما استوت
طعمها راااائع فعلا وخفيفة والله
ثانيا الرز بالكارى والجبنة
الوصفة دى شوفتها النهاردة الصبح فى التليفزيون لنجلاء الشرشابى ولما لقيت مكوناتها عندى بفضل الله ونعمته عملتها على الغدا
المقادير بالكمية اللى انا عملتها
كوب ونص رز
بصلة صغيرة
معلقة شاى مليانة كارى وممكن كركم لو مفيش كارى
ملح
فلفل اسود
شريحتين كبار جبنة رومى مطحونة فى الكبة(هى كانت حاطة اكتر من كدة بس كمية الرز عندى قليلة فحسيت الجبنة هتبقى كتير فعملت شريحتين كبار بس لكن كمية الجبنة انتى وراحتك مش محدودة يعنى)
مية
زيت
الطريقة
هنقطع البصلة مكعبات ونحط عليها الزيت
هندبلها بسيط خالص يدوب تطلع ريحتها
هنحط الكارى ونقلب
وبعدين هنشوح معاهم الرز شوية
ونحطلة المية بتاعتة عادى خالص ونضيف الملح والفلفل بس نخلى بالنا منكترش الملح لان الجبنة حادقة
هنطحن الجبنة فى الكبة
ولما الرز يستوى خالص هنحط علية الجبنة ونقلب ونطفى بس نخلى معلقة شاى جبنة على جمب
طعمة جميل جدا وجديد
وبعدين حمرت بطاطس وبعد ما اتحمرت رشيت عليها معلقة الجبنة اللى كنت سايباها
ودة الرز واللحمة فى طبق التقديم وبالهنا والشفا
مواضيع هذا القسم برعاية
دودى وبسسس دودى وبسسس images/flowersavatars/avatar0020.gif عضوة فى ذمة الله Fatakat 309416 المنصورة – مصر