السلام عليكم ورحمة الله و بركاته
بقالى كتير اوى ماكتبتش مواضيع يمكن من اكتر من شهرين لظروف غصب عنى
كنت باجى و ارد قليل حتى لانى كنت باخد مضادات حيوى تهد جبل
والله فعلا وحشنى انى أكتب مواضيع فى قسمى اللى بحبه
المم انا جيت النهاردة بطبخة ناس كتير بتعملها بس الحقيقة انا بحط الطبخة دى للمبتدئات
أما بخصوص الرز اللى ف العنوان فا ده رز تحفة لما جربته اول مرة اتنسف بجد كان عندى عزومة و الرز ده اتاكل بسرعة الصاروخ
و فعلا اللى يجربه مش هيبطل يعمله
و الملوخية بقى دى طريقة جديدة شوية على بعض الناس سواء فى عمايلها او تخزينها
معلش رغيت كتيييير
يلا نبدأ
بسم الله
الأول نيجى للأرانب
الأرانب اكبر مشكلة فيه هيه زفارتها فلازم لازم تتنضف كويس
انا دايما بنضفها زى الفراخ يعنى الول اغسلها بمية كويس و بعدين احطها فى حاجة واسعو و أحط عليها ملح كتيييير و دقيق و أدعك الأرانب او الفراخ بيهم و بعدين اغسلهم بالماية تانى و ارجعهم تانى فى الحاجة الواسعة دى
و بعدين اقطع ليمون كتير و اعصرهم على الأرانب او الفراخ و احط عليهم خل حبة حلوين كده و انقعهم نص ساعة كده و بعدين أغسلهم بالماية و اصفيهم
و كده بتبقى زى الفل ما شاء الله
هنا كان عندى أرنبين
نضفتهم و قطعتهم شوية من النص بس مفصلتهمش عن بعض
( في ناس بتفصلهم خالص و تعملهم قطعتين او أربعة زى ما تحبى بس انا اتعودت اعملهم كده زى زالدتى ربنا يخليهها يارب )
فيه طريقتين عشان تسلقى الأرانب يا تاخديها فى حلة و تشوحيها هتلاقيها نزلت ماية و بعدين شربتها ساعتها تحطى ماية و تبدأى تسلقيها و تكملى بخطواتى اللى جاية يا تعملى اللى انا هعمله دلوقتى
نحط ماية فى حلة على النار و اول ما تغلى نحط طماطماية و بصلة مقشرة و نحط معاهم الأرنب
و الماية يادوب تغطى الأرمب ماتكونش كتير اوى عشان الشوربة تطلع طعمها حلو و ماتحطيش هنا اى بارات الا لما تطلعى الريم الأول
هنا الريم بدأ يظهر
ناخد الريم او الرغاوى دى و نشيلها
و ياريت يكون جنبك طبق غويك فيه ماية كتير تشيلى الريم تحطيه فيه و تطلع المعلقة اللى بتشيلى بيها نضيفة خالص
و هكذا لحد ما يبقاش فيه ريم او رغاوى خالص عشان الشوربة مايكونش فيها اى شوايب او زفارة
هنا الريم كان ابتدى يقل
لما الريم يخلص خالص نضيف البهارات بتاعتنا
اللى هيه :
ورق لورا
حبهان حب
فلفل حب
ملح
مستكة ( 3 حبات او 4 )
و على نار هادية نسيبا لحد ما تستوى
حوالى ساعة الا ربع و ساعات ساعة كاملة
و هنا كانت استوت الحمد لله
هتلاقى كمية الماية قلت شوية حلوين
تشيلى بقى الأرانب فى طبق و تصفى الشوربة و تدوقيها لو محتاجة ملح او فلفل تظبطيها
هاقسم الشوربة نصين او تلت و تلتين يعنى
تلت هاعمل بيه الملوخية و الباقى للشوربة
نحط سمنة فى حلة و نسيحها و نجيب لسان عصفور او شعرية ( حسب ما بتحبى الشوربة )
و نقلبها كل شوية لحد ما تحمر
نحط عليها الشوربة ونغليا و نسيا لحد ما تلشعرية او لسان العصفور ما يستوى و بعدين نطفى عليها
نيجى بقى للملوخية
الحقيقة الطرية دى طريقة حماتى ربنا يخليها يارب و يجازيها كل خير يارب
بتعملها فى الخلاط اه والله فى الخلاط
اول ما قالتلى عليا استغربت اوى و خفت ماتطلعش مظبوطة بس انا اكلتها عندها كذا مرة قبل ما اعرف هيه بتعملها ازاى و عمرى ما جاه فى بالى انها بتعملها بطريقة تانية غير خراطة الملوخية
بس لاحظت انها دايما بتكون الملوخية خضرا كده و طازة
بس لما عرفت انها بتخزنها و بتطلع بالشكل ده قلت ما بدهااااش لازم اجربها
و على فكرة الطريقة دى بتخليها تظبط مابتفكش ولا تفصل ابدا باذن الله
يعنى تنفع جدا للمبتدئات ان شاء الله
اولا نيجى للتخزين
معلش معنديش صور لطريقة التخزين بس هيه طريقة فى منتهى السهولة
انتى هتقطفى الملوخية عادى
و تغلى ماية على النار
و تنزلى فيها الملوخية المتقطفة دى لثوانى يادوب هتدبل شيليها و صفيها و تبرد حطيها فى اكياس و على الفريزر
انا حماتى بتعمل و تديلى باخد على الجاهز بقى ههههه
هاصورلكم شوية من اللى عندى فى الفريزر و احطها هنا لما اخلص الموضوع
نيجى بقى لطريقة العمل
انتى هتاخدى كيس من الأكياس دى و تسيبيها تفك براحتها خالص من بالليل مثلا
ممكن تعملى ديفروست فى الميكروويف لو مستعجلة عليها
بس اوعى تحطي الكيس فى ماية سخنة
تمام كده ؟؟
تغلى الشوربة كويس
و تحطى الكيس بتاعك ( او نصه او الكمية المناسبة اللى تتعمل على الشوربة اللى عندك )
هتحطي الملوخية فى الخلاط كده و تحطى عليها الشوربة بتاعتك او نصها لو الخلاط مايكفيش كل الشوربة
بس لازم تكون الشوربة بتغلى غير كده مش هاتنفع الطريقة دى خدى بالك
هنا اتخلطت كويس جدا هيه باينة فى الصورة زى المعجون لانى مش حاطة كل كمية الشوربة
المفروض الورق بيكون متقطع صغير اوى زى خراطة الملوخية بس هو مش باين فى الصورة دة عشان الفلاش و الاضاءة بس فى صور الملوخية النهائية هتشوفوا انها ماتفرقش عن الملوخية اللى متخرطة
و بعدين تاخدى كل الى فى الخلاط ده بعد ما يتفرم كويس و ترجعيه الحلة اللى كانت فيها الشوربة مرة تانية
و سيبها تغلى مع التقليب
نكون و قتها بنعمل التقلية
هنجيب زيت او سمنة او الاتنين مع بعض نسخنهم و نحمر فيهم التوم
تابعونى المشاركة اللى جاية مواضيع هذا القسم برعاية
zatoona magnoona zatoona magnoona 479996_3.gif سوبر فتكات Fatakat 479996 jeddah – saudi arabia