السلام عليكم يا فتوكات ازيكم جميعا
انا النهاردة كان عندي بطة مسلوقة من امبارح ماما سلقتها وسابتها اعملها زي ما ىانا عايزة
احنا بنسلق البط من غير جلد .. حدد يقولي ازاي هقولكم خلقة ربنا لأننا مبنعملش حاجة بالجلد وبيبقى كله دهون وبيخلي اللحمة تشرب الدهون
لكن لما بيتسلق من غير جلد بتبقى لحمة حمرة حمرة مفيهاش دهون ولا يحزنون
علشان الناس الي بتعمل ريجيم والناس الي بيطبخو لباباهم ومامتهم زيي كدة
بصو يا جماعة
قررت اعمل البط محمر
وعملتله تتبيلة عبارة عن
كوب زبادي
2 فص توم
عود نعناع
عود ريحان
ملح فلفل كمون كبابة صيني
طمطمابة كبيرة
بصلة صغيرة
معلقة كبيرة مسطردة
ملعقة زيت زيتون
(كان نفسي احط زعتر وروز ماري بس معنديش)
أخدت نص البطة بس
وقطعت الورك حتتين واصدر حتتين
وبعدين جبت علبة تلاجة
وحطيت فيها
الزبادي+ الملح والبهرات+ الزيت+المسطردة
وبعدين ضربت الطماطم مع البصل في الخلاط وحطيتها فوقيهم
وقطعت التومة مع شوية فلفل وقصطعت الريحان والنعناع ودقيت التومة مع البهارات والملح والريحان والنعناع وحطيتها ع التتبيلة(لو عملتي كدة انسي ريحة التوم البشعة.. وعهملكم موضوع عن كيفية التخلص من ريحة التوم والبصل من ايديكي )
خططت اللحمة بالسكينة على خفيف تشريط بس مش لحد العضم
ونقعت اللحمة فيها في التلاجة وغطيت العلبة
جيت بقى على الفيجيتار
مفاجأة
مفيش بقسماط ولا فيجيتار
ولا حتى فينو ناشف
فقمت جايبة دقيق وعليه ملح وتوابل ومعلقة مريمة مطحونة وفلفل وكمون وكبابة صيني وقرفة
وعليه نص معلقة صغيرة بيكنج بودر وقلبت
وجبت بيضة وعليها شوية لبن وفلفل اسمر وضربتها
وبعدين بقيت احط اللحمة في الدقيق ثم في البيض ثم في الدقيق
لحد ما خلصت
جيت بقى على باقي التتبيلة والبيضة واللبن
أرميها؟!!!!!!
لا حراااااااام
وهو دا الي عايزة اقولهولكم
اوعو ترمو النعمة ابدا
وانتي بترمي كدة افتكري ان فيه ناس مش لاقية حتى مية تشربها وانتي بترمي اكل
المهم
جبت شوية دقيق كمان
وزودت عليهم توابل وملح
وزودتهم على الدقيق الي اتبقى بعد البط
ورحت حاطة البيض الي باقي على باقي التتبيلة وقلبت
ورحت نازلة بيهم على الدقيق
وعجنتها وبقي ازود دقيق لحد ما بقت عجينة جميلة خالص وطرية
وبعدين فردتها بين طبقتين كيس وقطعتها بالكباية مدورات
وبعد ماقليت البط
بقيت افردها بايدي رقيقة خالص خالص واحطها في الزيت بس تكون النار هادية علشان تستوي من برة وجوة
وطلعتلي فطاير صغيرة جمييييييييلة وريحتها حلوااااااااااااااة
وكمان كميتها كويسة جدا .. كلنا وشبعنا واتبقى الحمد لله
والفطاير مقرمشة من برة وجوا هشة وفيها هوا وجميلة جدا
انا عارفة ان فيه ناس هنا بتعملل تتبيلات احسن من دي
وبتعمل اكل زي الفل
بس حبيت اقولكم محدش يرمي حاجة
ولما تحطي في بالك ان مفيش حاجة هتترمي
ربنا يحلي الأكل ويبارك فيه ويكفي ويفيض
متنسوش تدعولي
في امان الله مواضيع هذا القسم برعاية
قلبي _على_ديني قلبي _على_ديني 562803_1.gif فتكات متميزة Fatakat 562803 المنوفية – مصر